१. विभङ्गवारो

नहेतुपच्चयादि

२७६. नअरूपावचरं धम्मं पच्चया नअरूपावचरो धम्मो उप्पज्जति नहेतुपच्चया – अहेतुकं नअरूपावचरं एकं खन्धं…पे… (याव असञ्ञसत्ता) चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अहेतुका नअरूपावचरा खन्धा, विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१) नआरम्मणपच्चया… तीणि.

अरूपावचरं धम्मं पच्चया अरूपावचरो धम्मो उप्पज्जति नअधिपतिपच्चया – अरूपावचरे खन्धे पच्चया अरूपावचराधिपति, विपाकं अरूपावचरं एकं खन्धं…पे… पटिसन्धिक्खणे…पे…. (१)

नअरूपावचरं धम्मं पच्चया नअरूपावचरो धम्मो उप्पज्जति नअधिपतिपच्चया – नअरूपावचरं एकं खन्धं…पे… पटिसन्धिक्खणे…पे… (याव असञ्ञसत्ता) चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया नअरूपावचरा खन्धा. (१)