१. विभङ्गवारो

हेतुपच्चयो

२६५. अरूपावचरं धम्मं पटिच्च अरूपावचरो धम्मो उप्पज्जति हेतुपच्चया – अरूपावचरं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे…. अरूपावचरं धम्मं पटिच्च नअरूपावचरो धम्मो उप्पज्जति हेतुपच्चया – अरूपावचरे खन्धे पटिच्च चित्तसमुट्ठानं रूपं. अरूपावचरं धम्मं पटिच्च अरूपावचरो च नअरूपावचरो च धम्मा उप्पज्जन्ति हेतुपच्चया – अरूपावचरं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

२६६. नअरूपावचरं धम्मं पटिच्च नअरूपावचरो धम्मो उप्पज्जति हेतुपच्चया – नअरूपावचरं एकं खन्धं पटिच्च तयो खन्धा चित्तसमुट्ठानञ्च रूपं …पे… द्वे खन्धे…पे… पटिसन्धिक्खणे नअरूपावचरं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे…. (१)

अरूपावचरञ्च नअरूपावचरञ्च धम्मं पटिच्च नअरूपावचरो धम्मो उप्पज्जति हेतुपच्चया – अरूपावचरे खन्धे च महाभूते च पटिच्च चित्तसमुट्ठानं रूपं. (१) (संखित्तं.)