१. विभङ्गवारो

नहेतुपच्चयो

२४०. नरूपावचरं धम्मं पच्चया नरूपावचरो धम्मो उप्पज्जति नहेतुपच्चया – अहेतुकं नरूपावचरं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… (याव असञ्ञसत्ता) चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अहेतुका नरूपावचरा खन्धा, विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१) (संखित्तं.)

नअधिपतिपच्चयो

२४१. रूपावचरं धम्मं पच्चया रूपावचरो धम्मो उप्पज्जति नअधिपतिपच्चया… तीणि (पटिच्चवारसदिसं).

नरूपावचरं धम्मं पच्चया नरूपावचरो धम्मो उप्पज्जति नअधिपतिपच्चया (पटिच्चवारसदिसं). नरूपावचरं धम्मं पच्चया रूपावचरो धम्मो उप्पज्जति नअधिपतिपच्चया – वत्थुं पच्चया रूपावचराधिपति, वत्थुं पच्चया विपाका रूपावचरा खन्धा; पटिसन्धिक्खणे…पे…. नरूपावचरं धम्मं पच्चया रूपावचरो च नरूपावचरो च धम्मा उप्पज्जन्ति नअधिपतिपच्चया – वत्थुं पच्चया विपाका रूपावचरा खन्धा, महाभूते पच्चया चित्तसमुट्ठानं रूपं; पटिसन्धिक्खणे…पे…. (३)

२४२. रूपावचरञ्च नरूपावचरञ्च धम्मं पच्चया रूपावचरो धम्मो उप्पज्जति नअधिपतिपच्चया – रूपावचरे खन्धे च वत्थुञ्च पच्चया रूपावचराधिपति, विपाकं रूपावचरं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… पटिसन्धिक्खणे रूपावचरं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे…. रूपावचरञ्च नरूपावचरञ्च धम्मं पच्चया नरूपावचरो धम्मो उप्पज्जति नअधिपतिपच्चया – विपाके रूपावचरे खन्धे च महाभूते च पच्चया चित्तसमुट्ठानं रूपं; पटिसन्धिक्खणे…पे…. रूपावचरञ्च नरूपावचरञ्च धम्मं पच्चया रूपावचरो च नरूपावचरो च धम्मा उप्पज्जन्ति नअधिपतिपच्चया – विपाकं रूपावचरं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… विपाके रूपावचरे खन्धे च महाभूते च पच्चया चित्तसमुट्ठानं रूपं; पटिसन्धिक्खणे…पे…. (३) (संखित्तं.)