१. विभङ्गवारो

हेतुपच्चयो

२३७. रूपावचरं धम्मं पच्चया रूपावचरो धम्मो उप्पज्जति हेतुपच्चया… तीणि (पटिच्चसदिसं).

नरूपावचरं धम्मं पच्चया नरूपावचरो धम्मो उप्पज्जति हेतुपच्चया – नरूपावचरं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… (याव अज्झत्तिकं महाभूतं) वत्थुं पच्चया नरूपावचरा खन्धा. नरूपावचरं धम्मं पच्चया रूपावचरो धम्मो उप्पज्जति हेतुपच्चया – वत्थुं पच्चया रूपावचरा खन्धा; पटिसन्धिक्खणे…पे…. नरूपावचरं धम्मं पच्चया रूपावचरो च नरूपावचरो च धम्मा उप्पज्जन्ति हेतुपच्चया – वत्थुं पच्चया रूपावचरा खन्धा, महाभूते पच्चया चित्तसमुट्ठानं रूपं; पटिसन्धिक्खणे…पे…. (३)

२३८. रूपावचरञ्च नरूपावचरञ्च धम्मं पच्चया रूपावचरो धम्मो उप्पज्जति हेतुपच्चया – रूपावचरं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… पटिसन्धिक्खणे…पे…. रूपावचरञ्च नरूपावचरञ्च धम्मं पच्चया नरूपावचरो धम्मो उप्पज्जति हेतुपच्चया – रूपावचरे खन्धे च महाभूते च पच्चया चित्तसमुट्ठानं रूपं; पटिसन्धिक्खणे…पे…. रूपावचरञ्च नरूपावचरञ्च धम्मं पच्चया रूपावचरो च नरूपावचरो च धम्मा उप्पज्जन्ति हेतुपच्चया – रूपावचरं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… रूपावचरे खन्धे च महाभूते च पच्चया चित्तसमुट्ठानं रूपं; पटिसन्धिक्खणे…पे…. (३) (संखित्तं.)