१. विभङ्गवारो

हेतुपच्चयो

२२६. रूपावचरं धम्मं पटिच्च रूपावचरो धम्मो उप्पज्जति हेतुपच्चया – रूपावचरं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे…. रूपावचरं धम्मं पटिच्च नरूपावचरो धम्मो उप्पज्जति हेतुपच्चया – रूपावचरे खन्धे पटिच्च चित्तसमुट्ठानं रूपं; पटिसन्धिक्खणे…पे…. रूपावचरं धम्मं पटिच्च रूपावचरो च नरूपावचरो च धम्मा उप्पज्जन्ति हेतुपच्चया – रूपावचरं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (३)

२२७. नरूपावचरं धम्मं पटिच्च नरूपावचरो धम्मो उप्पज्जति हेतुपच्चया – नरूपावचरं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे …पे… एकं महाभूतं…पे…. नरूपावचरं धम्मं पटिच्च रूपावचरो धम्मो उप्पज्जति हेतुपच्चया – पटिसन्धिक्खणे वत्थुं पटिच्च रूपावचरा खन्धा. नरूपावचरं धम्मं पटिच्च रूपावचरो च नरूपावचरो च धम्मा उप्पज्जन्ति हेतुपच्चया – पटिसन्धिक्खणे वत्थुं पटिच्च रूपावचरा खन्धा, महाभूते पटिच्च कटत्तारूपं. (३)

२२८. रूपावचरञ्च नरूपावचरञ्च धम्मं पटिच्च रूपावचरो धम्मो उप्पज्जति हेतुपच्चया – पटिसन्धिक्खणे रूपावचरं एकं खन्धञ्च वत्थुञ्च पटिच्च तयो खन्धा…पे… द्वे खन्धे च…पे…. रूपावचरञ्च नरूपावचरञ्च धम्मं पटिच्च नरूपावचरो धम्मो उप्पज्जति हेतुपच्चया – रूपावचरे खन्धे च महाभूते च पटिच्च चित्तसमुट्ठानं रूपं; पटिसन्धिक्खणे रूपावचरे खन्धे च महाभूते च पटिच्च कटत्तारूपं. रूपावचरञ्च नरूपावचरञ्च धम्मं पटिच्च रूपावचरो च नरूपावचरो च धम्मा उप्पज्जन्ति हेतुपच्चया – पटिसन्धिक्खणे रूपावचरं एकं खन्धञ्च वत्थुञ्च पटिच्च तयो खन्धा…पे… द्वे खन्धे च…पे… रूपावचरे खन्धे च महाभूते च पटिच्च कटत्तारूपं (संखित्तं). (३)