१. विभङ्गवारो

हेतुपच्चयो

२०६. कामावचरो धम्मो कामावचरस्स धम्मस्स हेतुपच्चयेन पच्चयो – कामावचरा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

नकामावचरो धम्मो नकामावचरस्स धम्मस्स हेतुपच्चयेन पच्चयो – नकामावचरा हेतू सम्पयुत्तकानं खन्धानं हेतुपच्चयेन पच्चयो; पटिसन्धिक्खणे…पे…. नकामावचरो धम्मो कामावचरस्स धम्मस्स हेतुपच्चयेन पच्चयो – नकामावचरा हेतू चित्तसमुट्ठानानं रूपानं हेतुपच्चयेन पच्चयो; पटिसन्धिक्खणे…पे…. (मूलं कातब्बं.) नकामावचरा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (३)

आरम्मणपच्चयो

२०७. कामावचरो धम्मो कामावचरस्स धम्मस्स आरम्मणपच्चयेन पच्चयो – दानं दत्वा सीलं…पे… उपोसथकम्मं…पे… पुब्बे सुचिण्णानि पच्चवेक्खति अस्सादेति अभिनन्दति, तं आरब्भ रागो…पे… दोमनस्सं उप्पज्जति; अरिया गोत्रभुं पच्चवेक्खन्ति, वोदानं पच्चवेक्खन्ति; पहीने किलेसे…पे… विक्खम्भिते किलेसे…पे… पुब्बे सुचिण्णानि…पे… चक्खुं…पे… वत्थुं कामावचरे खन्धे अनिच्चतो…पे… दोमनस्सं उप्पज्जति; रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स आरम्मणपच्चयेन पच्चयो. (१)

कामावचरो धम्मो नकामावचरस्स धम्मस्स आरम्मणपच्चयेन पच्चयो – दिब्बेन चक्खुना रूपं पस्सति, दिब्बाय सोतधातुया सद्दं सुणाति, चेतोपरियञाणेन कामावचरचित्तसमङ्गिस्स चित्तं जानाति, कामावचरा खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स आरम्मणपच्चयेन पच्चयो. (२)

२०८. नकामावचरो धम्मो नकामावचरस्स धम्मस्स आरम्मणपच्चयेन पच्चयो – निब्बानं मग्गस्स, फलस्स आरम्मणपच्चयेन पच्चयो; चेतोपरियञाणेन नकामावचरचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स…पे… आकिञ्चञ्ञायतनं नेवसञ्ञानासञ्ञायतनस्स…पे… नकामावचरा खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स आरम्मणपच्चयेन पच्चयो. (१)

नकामावचरो धम्मो कामावचरस्स धम्मस्स आरम्मणपच्चयेन पच्चयो – झाना वुट्ठहित्वा झानं पच्चवेक्खति अस्सादेति अभिनन्दति, तं आरब्भ रागो उप्पज्जति, दिट्ठि उप्पज्जति…पे… अरिया मग्गा वुट्ठहित्वा मग्गं पच्चवेक्खन्ति; फलं…पे… निब्बानं पच्चवेक्खन्ति, निब्बानं गोत्रभुस्स, वोदानस्स, आवज्जनाय आरम्मणपच्चयेन पच्चयो; आकासानञ्चायतनं पच्चवेक्खति, विञ्ञाणञ्चायतनं पच्चवेक्खति, आकिञ्चञ्ञायतनं पच्चवेक्खति, नेवसञ्ञानासञ्ञायतनं पच्चवेक्खति, दिब्बं चक्खुं पच्चवेक्खति, दिब्बं सोतधातुं पच्चवेक्खति, इद्धिविधञाणं पच्चवेक्खति, चेतोपरियञाणं…पे… पुब्बेनिवासानुस्सतिञाणं…पे… यथाकम्मूपगञाणं…पे… अनागतंसञाणं पच्चवेक्खति, नकामावचरे खन्धे अनिच्चतो…पे… दोमनस्सं उप्पज्जति. (२)

अधिपतिपच्चयो

२०९. कामावचरो धम्मो कामावचरस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं…पे… पुब्बे सुचिण्णानि गरुं कत्वा पच्चवेक्खति अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति, सेक्खा गोत्रभुं गरुं कत्वा पच्चवेक्खन्ति, वोदानं गरुं कत्वा पच्चवेक्खन्ति, चक्खुं…पे… वत्थुं कामावचरे खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – कामावचराधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

२१०. नकामावचरो धम्मो नकामावचरस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – निब्बानं मग्गस्स, फलस्स अधिपतिपच्चयेन पच्चयो. सहजाताधिपति – नकामावचराधिपति सम्पयुत्तकानं खन्धानं अधिपतिपच्चयेन पच्चयो. नकामावचरो धम्मो कामावचरस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – झाना वुट्ठहित्वा झानं गरुं कत्वा पच्चवेक्खति अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति, अरिया मग्गा वुट्ठहित्वा मग्गं गरुं कत्वा पच्चवेक्खन्ति, फलं…पे… निब्बानं गरुं कत्वा पच्चवेक्खन्ति, निब्बानं गोत्रभुस्स, वोदानस्स अधिपतिपच्चयेन पच्चयो; आकासानञ्चायतनं गरुं कत्वा पच्चवेक्खति विञ्ञाणञ्चायतनं…पे… आकिञ्चञ्ञायतनं…पे… नेवसञ्ञानासञ्ञायतनं गरुं कत्वा पच्चवेक्खति, दिब्बं चक्खुं…पे… दिब्बं सोतधातुं…पे… इद्धिविधञाणं…पे… अनागतंसञाणं गरुं कत्वा पच्चवेक्खति, नकामावचरे खन्धे गरुं कत्वा अस्सादेति अभिनन्दति तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नकामावचराधिपति चित्तसमुट्ठानानं रूपानं अधिपतिपच्चयेन पच्चयो; नकामावचरो धम्मो कामावचरस्स च नकामावचरस्स च धम्मस्स अधिपतिपच्चयेन पच्चयो. सहजाताधिपति – नकामावचराधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

अनन्तरपच्चयादि

२११. कामावचरो धम्मो कामावचरस्स धम्मस्स अनन्तरपच्चयेन पच्चयो – पुरिमा पुरिमा कामावचरा खन्धा पच्छिमानं पच्छिमानं कामावचरानं खन्धानं अनन्तरपच्चयेन पच्चयो; अनुलोमं गोत्रभुस्स… अनुलोमं वोदानस्स… आवज्जना कामावचरानं खन्धानं अनन्तरपच्चयेन पच्चयो.

कामावचरो धम्मो नकामावचरस्स धम्मस्स अनन्तरपच्चयेन पच्चयो – कामावचरं चुतिचित्तं नकामावचरस्स उपपत्तिचित्तस्स… आवज्जना नकामावचरानं खन्धानं अनन्तरपच्चयेन पच्चयो; कामावचरा खन्धा नकामावचरस्स वुट्ठानस्स अनन्तरपच्चयेन पच्चयो; पठमस्स झानस्स परिकम्मं पठमस्स झानस्स अनन्तरपच्चयेन पच्चयो…पे… चतुत्थस्स झानस्स…पे… नेवसञ्ञानासञ्ञायतनस्स परिकम्मं…पे… दिब्बस्स चक्खुस्स…पे… दिब्बाय सोतधातुया…पे… इद्धिविधञाणस्स…पे… चेतोपरियञाणस्स…पे… पुब्बेनिवासानुस्सतिञाणस्स…पे… यथाकम्मूपगञाणस्स…पे… अनागतंसञाणस्स परिकम्मं अनागतंसञाणस्स अनन्तरपच्चयेन पच्चयो; गोत्रभु मग्गस्स… वोदानं मग्गस्स… अनुलोमं फलसमापत्तिया अनन्तरपच्चयेन पच्चयो. (२)

२१२. नकामावचरो धम्मो नकामावचरस्स धम्मस्स अनन्तरपच्चयेन पच्चयो – पुरिमा पुरिमा नकामावचरा खन्धा पच्छिमानं पच्छिमानं नकामावचरानं खन्धानं अनन्तरपच्चयेन पच्चयो; मग्गो फलस्स, फलं फलस्स, निरोधा वुट्ठहन्तस्स, नेवसञ्ञानासञ्ञायतनं फलसमापत्तिया अनन्तरपच्चयेन पच्चयो. नकामावचरो धम्मो कामावचरस्स धम्मस्स अनन्तरपच्चयेन पच्चयो – नकामावचरं चुतिचित्तं कामावचरस्स उपपत्तिचित्तस्स, नकामावचरं भवङ्गं आवज्जनाय, नकामावचरा खन्धा कामावचरस्स वुट्ठानस्स अनन्तरपच्चयेन पच्चयो…. (२)

समनन्तरपच्चयेन पच्चयो… सहजातपच्चयेन पच्चयो… सत्त… अञ्ञमञ्ञपच्चयेन पच्चयो… छ… निस्सयपच्चयेन पच्चयो… सत्त.

उपनिस्सयपच्चयो

२१३. कामावचरो धम्मो कामावचरस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – कामावचरं सद्धं उपनिस्साय दानं देति…पे… सीलं…पे… उपोसथकम्मं…पे… विपस्सनं उप्पादेति, मानं जप्पेति, दिट्ठिं गण्हाति; कामावचरं सीलं…पे… पञ्ञं… रागं…पे… पत्थनं… कायिकं सुखं… कायिकं दुक्खं… उतुं… भोजनं… सेनासनं उपनिस्साय दानं देति…पे… विपस्सनं उप्पादेति, पाणं हनति…पे… सङ्घं भिन्दति; कामावचरा सद्धा…पे… सेनासनं कामावचराय सद्धाय…पे… पत्थनाय… कायिकस्स सुखस्स… कायिकस्स दुक्खस्स उपनिस्सयपच्चयेन पच्चयो. (१)

कामावचरो धम्मो नकामावचरस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – कामावचरं सद्धं उपनिस्साय नकामावचरं झानं उप्पादेति, मग्गं…पे… अभिञ्ञं…पे… समापत्तिं उप्पादेति; कामावचरं सीलं…पे… सेनासनं उपनिस्साय नकामावचरं झानं उप्पादेति, मग्गं…पे… अभिञ्ञं…पे… समापत्तिं उप्पादेति; कामावचरा सद्धा…पे… सेनासनं नकामावचराय सद्धाय…पे… पञ्ञाय… मग्गस्स, फलसमापत्तिया उपनिस्सयपच्चयेन पच्चयो; पठमस्स झानस्स परिकम्मं पठमस्स झानस्स…पे… चतुत्थस्स झानस्स…पे… आकासानञ्चायतनस्स…पे… पठमस्स मग्गस्स…पे… चतुत्थस्स मग्गस्स परिकम्मं चतुत्थस्स मग्गस्स उपनिस्सयपच्चयेन पच्चयो. (२)

२१४. नकामावचरो धम्मो नकामावचरस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – नकामावचरं सद्धं उपनिस्साय झानं उप्पादेति, मग्गं…पे… अभिञ्ञं…पे… समापत्तिं उप्पादेति; नकामावचरं सीलं …पे… पञ्ञं उपनिस्साय नकामावचरं झानं उप्पादेति…पे… मग्गं…पे… अभिञ्ञं…पे… समापत्तिं उप्पादेति; नकामावचरा सद्धा…पे… पञ्ञा नकामावचराय सद्धाय…पे… पञ्ञाय, मग्गस्स, फलसमापत्तिया उपनिस्सयपच्चयेन पच्चयो; पठमं झानं दुतियस्स झानस्स उपनिस्सयपच्चयेन पच्चयो…पे… ततियं झानं…पे… चतुत्थं झानं…पे… आकासानञ्चायतनं विञ्ञाणञ्चायतनस्स …पे… आकिञ्चञ्ञायतनं नेवसञ्ञानासञ्ञायतनस्स उपनिस्सयपच्चयेन पच्चयो; पठमो मग्गो दुतियस्स मग्गस्स…पे… दुतियो मग्गो ततियस्स मग्गस्स…पे… ततियो मग्गो चतुत्थस्स मग्गस्स उपनिस्सयपच्चयेन पच्चयो; मग्गो फलसमापत्तिया उपनिस्सयपच्चयेन पच्चयो. (१)

नकामावचरो धम्मो कामावचरस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – नकामावचरं सद्धं उपनिस्साय दानं देति, सीलं…पे… उपोसथकम्मं…पे… विपस्सनं उप्पादेति, मानं जप्पेति, दिट्ठिं गण्हाति; नकामावचरं सीलं…पे… पञ्ञं उपनिस्साय दानं देति, सीलं…पे… उपोसथकम्मं…पे… विपस्सनं उप्पादेति, मानं जप्पेति, दिट्ठिं गण्हाति; नकामावचरा सद्धा…पे… पञ्ञा कामावचराय सद्धाय…पे… पञ्ञाय, रागस्स…पे… पत्थनाय कायिकस्स सुखस्स, कायिकस्स दुक्खस्स उपनिस्सयपच्चयेन पच्चयो; अरिया मग्गं उपनिस्साय सङ्खारे अनिच्चतो…पे… विपस्सन्ति, मग्गो अरियानं अत्थपटिसम्भिदाय… धम्मपटिसम्भिदाय… निरुत्तिपटिसम्भिदाय… पटिभानपटिसम्भिदाय… ठानाठानकोसल्लस्स उपनिस्सयपच्चयेन पच्चयो; फलसमापत्ति कायिकस्स सुखस्स उपनिस्सयपच्चयेन पच्चयो. (२)

पुरेजातपच्चयादि

२१५. कामावचरो धम्मो कामावचरस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति; रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स …पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु कामावचरानं खन्धानं पुरेजातपच्चयेन पच्चयो. कामावचरो धम्मो नकामावचरस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – दिब्बेन चक्खुना रूपं पस्सति, दिब्बाय सोतधातुया सद्दं सुणाति. वत्थुपुरेजातं – वत्थु नकामावचरानं खन्धानं पुरेजातपच्चयेन पच्चयो. (२)

पच्छाजातपच्चयेन पच्चयो… द्वे… आसेवनपच्चयेन पच्चयो… तीणि.

कम्मपच्चयादि

२१६. कामावचरो धम्मो कामावचरस्स धम्मस्स कम्मपच्चयेन पच्चयो – सहजाता, नानाक्खणिका (संखित्तं).

नकामावचरो धम्मो नकामावचरस्स धम्मस्स कम्मपच्चयेन पच्चयो – सहजाता, नानाक्खणिका (संखित्तं). नकामावचरो धम्मो कामावचरस्स धम्मस्स कम्मपच्चयेन पच्चयो – सहजाता, नानाक्खणिका (संखित्तं). नकामावचरो धम्मो कामावचरस्स च नकामावचरस्स च धम्मस्स कम्मपच्चयेन पच्चयो – सहजाता, नानाक्खणिका (संखित्तं). (३)

विपाकपच्चयेन पच्चयो… चत्तारि… आहारपच्चयेन पच्चयो… चत्तारि… इन्द्रियपच्चयेन पच्चयो… चत्तारि… झानपच्चयेन पच्चयो… चत्तारि… मग्गपच्चयेन पच्चयो… चत्तारि… सम्पयुत्तपच्चयेन पच्चयो… द्वे.

विप्पयुत्तपच्चयो

२१७. कामावचरो धम्मो कामावचरस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं (संखित्तं). कामावचरो धम्मो नकामावचरस्स धम्मस्स विप्पयुत्तपच्चयेन पच्चयो – सहजातं, पुरेजातं. सहजातं (संखित्तं) पटिसन्धिक्खणे वत्थु नकामावचरानं खन्धानं विप्पयुत्तपच्चयेन पच्चयो. पुरेजातं – वत्थु नकामावचरानं खन्धानं विप्पयुत्तपच्चयेन पच्चयो. (२)

नकामावचरो धम्मो कामावचरस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – नकामावचरा खन्धा चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे…पे…. पच्छाजाता – नकामावचरा खन्धा पुरेजातस्स इमस्स कायस्स विप्पयुत्तपच्चयेन पच्चयो. (१)

अत्थिपच्चयादि

२१८. कामावचरो धम्मो कामावचरस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं). कामावचरो धम्मो नकामावचरस्स धम्मस्स अत्थिपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु नकामावचरानं खन्धानं अत्थिपच्चयेन पच्चयो. पुरेजातं – दिब्बेन चक्खुना रूपं पस्सति…पे… (पुरेजातसदिसं). (२)

नकामावचरो धम्मो नकामावचरस्स धम्मस्स अत्थिपच्चयेन पच्चयो – सहजातं (संखित्तं). नकामावचरो धम्मो कामावचरस्स धम्मस्स अत्थिपच्चयेन पच्चयो – सहजातं, पच्छाजातं (विप्पयुत्तसदिसं). नकामावचरो धम्मो कामावचरस्स च नकामावचरस्स च धम्मस्स अत्थिपच्चयेन पच्चयो (पटिच्चसदिसं). (३)

२१९. कामावचरो च नकामावचरो च धम्मा कामावचरस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – नकामावचरा खन्धा च महाभूता च चित्तसमुट्ठानानं रूपानं अत्थिपच्चयेन पच्चयो; पटिसन्धिक्खणे…पे…. पच्छाजाता – नकामावचरा खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – नकामावचरा खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. कामावचरो च नकामावचरो च धम्मा नकामावचरस्स धम्मस्स अत्थिपच्चयेन पच्चयो – सहजातं, पुरेजातं. सहजातो – नकामावचरो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे… पटिसन्धिक्खणे…पे…. नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो. (२)