१-४. पच्चयानुलोमादि

हेतुपच्चयो

२०२. कामावचरं धम्मं पच्चया कामावचरो धम्मो उप्पज्जति हेतुपच्चया – कामावचरं एकं खन्धं पच्चया तयो खन्धा चित्तसमुट्ठानञ्च रूपं …पे… द्वे खन्धे…पे… पटिसन्धिक्खणे…पे… (याव अज्झत्तिका महाभूता) वत्थुं पच्चया कामावचरा खन्धा. कामावचरं धम्मं पच्चया नकामावचरो धम्मो उप्पज्जति हेतुपच्चया – वत्थुं पच्चया नकामावचरा खन्धा; पटिसन्धिक्खणे…पे…. कामावचरं धम्मं पच्चया कामावचरो च नकामावचरो च धम्मा उप्पज्जन्ति हेतुपच्चया – वत्थुं पच्चया नकामावचरा खन्धा, महाभूते पच्चया चित्तसमुट्ठानं रूपं; पटिसन्धिक्खणे…पे…. (३)

नकामावचरं धम्मं पच्चया नकामावचरो धम्मो उप्पज्जति हेतुपच्चया… तीणि (पटिच्चसदिसा).

कामावचरञ्च नकामावचरञ्च धम्मं पच्चया कामावचरो धम्मो उप्पज्जति हेतुपच्चया (पटिच्चसदिसा). कामावचरञ्च नकामावचरञ्च धम्मं पच्चया नकामावचरो धम्मो उप्पज्जति हेतुपच्चया – नकामावचरं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… पटिसन्धिक्खणे…पे…. कामावचरञ्च नकामावचरञ्च धम्मं पच्चया कामावचरो च नकामावचरो च धम्मा उप्पज्जन्ति हेतुपच्चया – नकामावचरं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… नकामावचरे खन्धे च महाभूते च पच्चया चित्तसमुट्ठानं रूपं; पटिसन्धिक्खणे…पे…. (३) (संखित्तं.)

हेतुया नव, आरम्मणे चत्तारि, अधिपतिया नव, अनन्तरे चत्तारि, समनन्तरे चत्तारि, सहजाते नव, अञ्ञमञ्ञे छ, निस्सये नव, उपनिस्सये चत्तारि, पुरेजाते चत्तारि, आसेवने चत्तारि, कम्मे नव…पे… अविगते नव.

अनुलोमं.

नहेतुपच्चयादि

२०३. कामावचरं धम्मं पच्चया कामावचरो धम्मो उप्पज्जति नहेतुपच्चया – अहेतुकं कामावचरं एकं खन्धं पच्चया…पे… अहेतुकपटिसन्धिक्खणे…पे… (याव असञ्ञसत्ता) चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अहेतुका कामावचरा खन्धा, विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१)

नआरम्मणपच्चया… तीणि.

नअधिपतिपच्चयादि

२०४. कामावचरं धम्मं पच्चया कामावचरो धम्मो उप्पज्जति नअधिपतिपच्चया… एकं (याव असञ्ञसत्ता). कामावचरं धम्मं पच्चया नकामावचरो धम्मो उप्पज्जति नअधिपतिपच्चया – वत्थुं पच्चया नकामावचराधिपति, वत्थुं पच्चया विपाका नकामावचरा खन्धा; पटिसन्धिक्खणे…पे…. कामावचरं धम्मं पच्चया कामावचरो च नकामावचरो च धम्मा उप्पज्जन्ति नअधिपतिपच्चया – वत्थुं पच्चया विपाका नकामावचरा खन्धा, महाभूते पच्चया चित्तसमुट्ठानं रूपं; पटिसन्धिक्खणे…पे…. (३)

नकामावचरं धम्मं पच्चया नकामावचरो धम्मो उप्पज्जति नअधिपतिपच्चया… तीणि (पटिच्चसदिसा).

कामावचरञ्च नकामावचरञ्च धम्मं पच्चया कामावचरो धम्मो उप्पज्जति नअधिपतिपच्चया (पटिच्चसदिसा. मूलं कातब्बं.) नकामावचरे खन्धे च वत्थुञ्च पच्चया नकामावचराधिपति, विपाकं नकामावचरं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… पटिसन्धिक्खणे…पे…. (मूलं कातब्बं.) विपाकं नकामावचरं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… विपाके नकामावचरे खन्धे च महाभूते च पच्चया चित्तसमुट्ठानं रूपं; पटिसन्धिक्खणे…पे…. (३)

नउपनिस्सयपच्चया… तीणि… नआसेवनपच्चया (सुद्धके अरूपमिस्सके च ‘‘विपाक’’न्ति नियामेतब्बं, रूपमिस्सके नत्थि. संखित्तं).

सुद्धं

नहेतुया एकं, नआरम्मणे तीणि, नअधिपतिया नव, नअनन्तरे तीणि, नसमनन्तरे तीणि, नउपनिस्सये तीणि, नपुरेजाते नव, नपच्छाजाते नव, नआसेवने नव, नकम्मे चत्तारि, नविपाके नव, नआहारे एकं, नइन्द्रिये एकं, नझाने एकं, नमग्गे एकं, नसम्पयुत्ते तीणि, नविप्पयुत्ते द्वे, नोनत्थिया तीणि, नोविगते तीणि.

पच्चनीयं.