१. विभङ्गवारो

नहेतुपच्चयादि

१९८. कामावचरं धम्मं पटिच्च कामावचरो धम्मो उप्पज्जति नहेतुपच्चया – अहेतुकं कामावचरं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… (याव असञ्ञसत्ता) विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

नआरम्मणपच्चया… तीणि.

नअधिपतिपच्चयादि

१९९. कामावचरं धम्मं पटिच्च कामावचरो धम्मो उप्पज्जति नअधिपतिपच्चया… तीणि.

नकामावचरं धम्मं पटिच्च नकामावचरो धम्मो उप्पज्जति नअधिपतिपच्चया – नकामावचरे खन्धे पटिच्च नकामावचराधिपति, विपाकं नकामावचरं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे…. नकामावचरं धम्मं पटिच्च कामावचरो धम्मो उप्पज्जति नअधिपतिपच्चया – विपाके नकामावचरे खन्धे पटिच्च चित्तसमुट्ठानं रूपं; पटिसन्धिक्खणे…पे…. नकामावचरं धम्मं पटिच्च कामावचरो च नकामावचरो च धम्मा उप्पज्जन्ति नअधिपतिपच्चया – विपाकं नकामावचरं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (३)

कामावचरञ्च नकामावचरञ्च धम्मं पटिच्च कामावचरो धम्मो उप्पज्जति नअधिपतिपच्चया – विपाके नकामावचरे खन्धे च महाभूते च पटिच्च चित्तसमुट्ठानं रूपं; पटिसन्धिक्खणे…पे… (इतरे द्वे पाकतिका) नअनन्तरपच्चया…पे… नपुरेजातपच्चया… नपच्छाजातपच्चया.

नआसेवनपच्चयो

२००. कामावचरं धम्मं पटिच्च कामावचरो धम्मो उप्पज्जति नआसेवनपच्चया… तीणि.

नकामावचरं धम्मं पटिच्च नकामावचरो धम्मो उप्पज्जति नआसेवनपच्चया – विपाकं नकामावचरं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे…. नकामावचरं धम्मं पटिच्च कामावचरो धम्मो उप्पज्जति नआसेवनपच्चया – नकामावचरे खन्धे पटिच्च चित्तसमुट्ठानं रूपं; पटिसन्धिक्खणे…पे… (मूलं कातब्बं) विपाकं नकामावचरं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (३)

(अवसेसा तीणि पाकतिका. संखित्तं.)