१. विभङ्गवारो

हेतुपच्चयो

१९४. कामावचरं धम्मं पटिच्च कामावचरो धम्मो उप्पज्जति हेतुपच्चया – कामावचरं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… एकं महाभूतं…पे… (संखित्तं). कामावचरं धम्मं पटिच्च नकामावचरो धम्मो उप्पज्जति हेतुपच्चया – पटिसन्धिक्खणे वत्थुं पटिच्च नकामावचरा खन्धा. कामावचरं धम्मं पटिच्च कामावचरो च नकामावचरो च धम्मा उप्पज्जन्ति हेतुपच्चया – पटिसन्धिक्खणे वत्थुं पटिच्च नकामावचरा खन्धा, महाभूते पटिच्च कटत्तारूपं. (३)

१९५. नकामावचरं धम्मं पटिच्च नकामावचरो धम्मो उप्पज्जति हेतुपच्चया – नकामावचरं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे…. नकामावचरं धम्मं पटिच्च कामावचरो धम्मो उप्पज्जति हेतुपच्चया – नकामावचरे खन्धे पटिच्च चित्तसमुट्ठानं रूपं; पटिसन्धिक्खणे नकामावचरे खन्धे पटिच्च कटत्तारूपं. नकामावचरं धम्मं पटिच्च कामावचरो च नकामावचरो च धम्मा उप्पज्जन्ति हेतुपच्चया – नकामावचरं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (३)

१९६. कामावचरञ्च नकामावचरञ्च धम्मं पटिच्च कामावचरो धम्मो उप्पज्जति हेतुपच्चया – नकामावचरे खन्धे च महाभूते च पटिच्च चित्तसमुट्ठानं रूपं; पटिसन्धिक्खणे नकामावचरे खन्धे च महाभूते च पटिच्च कटत्तारूपं. कामावचरञ्च नकामावचरञ्च धम्मं पटिच्च नकामावचरो धम्मो उप्पज्जति हेतुपच्चया – पटिसन्धिक्खणे नकामावचरं एकं खन्धञ्च वत्थुञ्च पटिच्च तयो खन्धा…पे… द्वे खन्धे च…पे…. कामावचरञ्च नकामावचरञ्च धम्मं पटिच्च कामावचरो च नकामावचरो च धम्मा उप्पज्जन्ति हेतुपच्चया – पटिसन्धिक्खणे नकामावचरं एकं खन्धञ्च वत्थुञ्च पटिच्च तयो खन्धा…पे… द्वे खन्धे च…पे… नकामावचरे खन्धे च महाभूते च पटिच्च कटत्तारूपं. (३) (संखित्तं.)