१. विभङ्गवारो

हेतुपच्चयादि

१८६. उपेक्खासहगतो धम्मो उपेक्खासहगतस्स धम्मस्स हेतुपच्चयेन पच्चयो – उपेक्खासहगता हेतू सम्पयुत्तकानं खन्धानं हेतुपच्चयेन पच्चयो; पटिसन्धिक्खणे…पे…. (एवं चत्तारि पञ्हा यथा सवितक्कदुकस्स.)

उपेक्खासहगतो धम्मो उपेक्खासहगतस्स धम्मस्स आरम्मणपच्चयेन पच्चयो… अधिपतिपच्चयेन पच्चयो. (यथा सप्पीतिकदुकं एवं आरम्मणम्पि अधिपतिपि वित्थारेतब्बा, ‘‘उपेक्खा’’ति नानं.)

अनन्तरपच्चयादि

१८७. उपेक्खासहगतो धम्मो उपेक्खासहगतस्स धम्मस्स अनन्तरपच्चयेन पच्चयो – पुरिमा पुरिमा उपेक्खासहगता खन्धा पच्छिमानं पच्छिमानं उपेक्खासहगतानं खन्धानं अनन्तरपच्चयेन पच्चयो. (१)

उपेक्खासहगतो धम्मो नउपेक्खासहगतस्स धम्मस्स अनन्तरपच्चयेन पच्चयो – पुरिमा पुरिमा उपेक्खासहगता खन्धा पच्छिमाय पच्छिमाय उपेक्खाय अनन्तरपच्चयेन पच्चयो; उपेक्खासहगतं चुतिचित्तं नउपेक्खासहगतस्स उपपत्तिचित्तस्स… आवज्जना नउपेक्खासहगतानं खन्धानं… विपाकमनोधातु नउपेक्खासहगताय विपाकमनोविञ्ञाणधातुया… उपेक्खासहगतं भवङ्गं नउपेक्खासहगतस्स भवङ्गस्स… उपेक्खासहगतं कुसलाकुसलं नउपेक्खासहगतस्स वुट्ठानस्स… किरियं वुट्ठानस्स… फलं वुट्ठानस्स… निरोधा वुट्ठहन्तस्स नेवसञ्ञानासञ्ञायतनं नउपेक्खासहगताय फलसमापत्तिया अनन्तरपच्चयेन पच्चयो. (२)

उपेक्खासहगतो धम्मो उपेक्खासहगतस्स च नउपेक्खासहगतस्स च धम्मस्स अनन्तरपच्चयेन पच्चयो – पुरिमा पुरिमा उपेक्खासहगता खन्धा पच्छिमानं पच्छिमानं उपेक्खासहगतानं खन्धानं उपेक्खाय च अनन्तरपच्चयेन पच्चयो. (३)

१८८. नउपेक्खासहगतो धम्मो नउपेक्खासहगतस्स धम्मस्स अनन्तरपच्चयेन पच्चयो – पुरिमा पुरिमा उपेक्खा पच्छिमाय पच्छिमाय उपेक्खाय अनन्तरपच्चयेन पच्चयो; पुरिमा पुरिमा नउपेक्खासहगता खन्धा पच्छिमानं पच्छिमानं नउपेक्खासहगतानं खन्धानं अनन्तरपच्चयेन पच्चयो; अनुलोमं गोत्रभुस्स…पे… अनुलोमं फलसमापत्तिया अनन्तरपच्चयेन पच्चयो. (मूलं कातब्बं.) पुरिमा पुरिमा उपेक्खा पच्छिमानं पच्छिमानं उपेक्खासहगतानं खन्धानं अनन्तरपच्चयेन पच्चयो; नउपेक्खासहगतं चुतिचित्तं उपेक्खासहगतस्स उपपत्तिचित्तस्स… नउपेक्खासहगतं भवङ्गं आवज्जनाय… कायविञ्ञाणधातु विपाकमनोधातुया… नउपेक्खासहगता विपाकमनोविञ्ञाणधातु किरियमनोविञ्ञाणधातुया… नउपेक्खासहगतं भवङ्गं उपेक्खासहगतस्स भवङ्गस्स… नउपेक्खासहगतं कुसलाकुसलं उपेक्खासहगतस्स वुट्ठानस्स… किरियं वुट्ठानस्स… फलं वुट्ठानस्स अनन्तरपच्चयेन पच्चयो. (२)

नउपेक्खासहगतो धम्मो उपेक्खासहगतस्स च नउपेक्खासहगतस्स च धम्मस्स अनन्तरपच्चयेन पच्चयो – पुरिमा पुरिमा उपेक्खा पच्छिमानं पच्छिमानं उपेक्खासहगतानं खन्धानं उपेक्खाय च अनन्तरपच्चयेन पच्चयो. (३)

१८९. उपेक्खासहगतो च नउपेक्खासहगतो च धम्मा उपेक्खासहगतस्स धम्मस्स अनन्तरपच्चयेन पच्चयो – पुरिमा पुरिमा उपेक्खासहगता खन्धा च उपेक्खा च पच्छिमानं पच्छिमानं उपेक्खासहगतानं खन्धानं अनन्तरपच्चयेन पच्चयो. (मूलं कातब्बं.) पुरिमा पुरिमा उपेक्खासहगता खन्धा च उपेक्खा च पच्छिमाय पच्छिमाय उपेक्खाय अनन्तरपच्चयेन पच्चयो; उपेक्खासहगतं चुतिचित्तञ्च उपेक्खा च नउपेक्खासहगतस्स उपपत्तिचित्तस्स… आवज्जना च उपेक्खा च नउपेक्खासहगतानं खन्धानं… विपाकमनोधातु च उपेक्खा च नउपेक्खासहगताय विपाकमनोविञ्ञाणधातुया… उपेक्खासहगतं भवङ्गञ्च उपेक्खा च नउपेक्खासहगतस्स भवङ्गस्स… उपेक्खासहगतं कुसलाकुसलञ्च उपेक्खा च नउपेक्खासहगतस्स वुट्ठानस्स… किरियञ्च उपेक्खा च वुट्ठानस्स… फलञ्च उपेक्खा च वुट्ठानस्स… निरोधा वुट्ठहन्तस्स नेवसञ्ञानासञ्ञायतनञ्च उपेक्खा च नउपेक्खासहगताय फलसमापत्तिया अनन्तरपच्चयेन पच्चयो. (मूलं कातब्बं.) पुरिमा पुरिमा उपेक्खासहगता खन्धा च उपेक्खा च पच्छिमानं पच्छिमानं उपेक्खासहगतानं खन्धानं उपेक्खाय च अनन्तरपच्चयेन पच्चयो. (३)

समनन्तरपच्चयेन पच्चयो… सहजातपच्चयेन पच्चयो… नव… अञ्ञमञ्ञपच्चयेन पच्चयो… नव… निस्सयपच्चयेन पच्चयो… नव.

उपनिस्सयपच्चयो

१९०. उपेक्खासहगतो धम्मो उपेक्खासहगतस्स धम्मस्स उपनिस्सयपच्चयेन पच्चयो… तीणि.

नउपेक्खासहगतो धम्मो नउपेक्खासहगतस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – नउपेक्खासहगतं सद्धं उपनिस्साय नउपेक्खासहगतेन चित्तेन दानं देति, सीलं…पे… उपोसथकम्मं…पे… नउपेक्खासहगतं झानं…पे… विपस्सनं…पे… मग्गं…पे… समापत्तिं उप्पादेति, मानं जप्पेति, दिट्ठिं गण्हाति; नउपेक्खासहगतं सीलं…पे… पञ्ञं… रागं… दोसं… मोहं… मानं… दिट्ठिं… पत्थनं… कायिकं सुखं… कायिकं दुक्खं… उतुं… भोजनं… सेनासनं उपेक्खं उपनिस्साय नउपेक्खासहगतेन चित्तेन दानं देति…पे… समापत्तिं उप्पादेति, पाणं हनति…पे… सङ्घं भिन्दति; नउपेक्खासहगता सद्धा…पे… सेनासनं उपेक्खा च नउपेक्खासहगताय सद्धाय…पे… पञ्ञाय… रागस्स…पे… पत्थनाय… कायिकस्स सुखस्स… कायिकस्स दुक्खस्स … मग्गस्स, फलसमापत्तिया उपेक्खाय च उपनिस्सयपच्चयेन पच्चयो. (१)

नउपेक्खासहगतो धम्मो उपेक्खासहगतस्स धम्मस्स उपनिस्सयपच्चयेन पच्चयो (तीणिपि उपनिस्सया). नउपेक्खासहगतं सद्धं उपनिस्साय उपेक्खासहगतेन चित्तेन दानं देति…पे… समापत्तिं उप्पादेति, मानं जप्पेति, दिट्ठिं गण्हाति; नउपेक्खासहगतं सीलं…पे… सेनासनं उपेक्खं उपनिस्साय उपेक्खासहगतेन चित्तेन दानं देति…पे… समापत्तिं उप्पादेति, उपेक्खासहगतेन चित्तेन अदिन्नं आदियति, मुसा भणति, पिसुणं…पे… सम्फं…पे… सन्धिं…पे… निल्लोपं…पे… एकागारिकं…पे… परिपन्थे…पे… परदारं…पे… गामघातं…पे… निगमघातं करोति; नउपेक्खासहगता सद्धा…पे… सेनासनं उपेक्खा च उपेक्खासहगताय सद्धाय…पे… पत्थनाय… मग्गस्स, फलसमापत्तिया उपनिस्सयपच्चयेन पच्चयो.

नउपेक्खासहगतो धम्मो उपेक्खासहगतस्स च नउपेक्खासहगतस्स च धम्मस्स उपनिस्सयपच्चयेन पच्चयो (तीणि उपनिस्सया दुतियगमनसदिसा). (३)

उपेक्खासहगतो च नउपेक्खासहगतो च धम्मा उपेक्खासहगतस्स धम्मस्स उपनिस्सयपच्चयेन पच्चयो… तीणि.

पुरेजातपच्चयो

१९१. नउपेक्खासहगतो धम्मो नउपेक्खासहगतस्स धम्मस्स पुरेजातपच्चयेन पच्चयो… तीणि (सप्पीतिकदुकसदिसा).

पच्छाजातपच्चयादि

१९२. उपेक्खासहगतो धम्मो नउपेक्खासहगतस्स धम्मस्स पच्छाजातपच्चयेन पच्चयो… तीणि… आसेवनपच्चयेन पच्चयो… नव… कम्मपच्चयेन पच्चयो… छ. (चत्तारि सहजाता नानाक्खणिका कातब्बा, द्वे नानाक्खणिका च.)… विपाकपच्चयेन पच्चयो… नव… आहारपच्चयेन पच्चयो… चत्तारि… इन्द्रियपच्चयेन पच्चयो… नव… झानपच्चयेन पच्चयो… नव… मग्गपच्चयेन पच्चयो… चत्तारि… सम्पयुत्तपच्चयेन पच्चयो… छ… विप्पयुत्तपच्चयेन पच्चयो… पञ्च… अत्थिपच्चयेन पच्चयो… नव… नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो. (इमानि पच्चयानि सप्पीतिककरणेन विभजितब्बानि.)