१. विभङ्गवारो

नहेतुपच्चयो

१७९. उपेक्खासहगतं धम्मं पटिच्च उपेक्खासहगतो धम्मो उप्पज्जति नहेतुपच्चया – अहेतुकं उपेक्खासहगतं एकं खन्धं पटिच्च द्वे खन्धा, द्वे खन्धे…पे… अहेतुकपटिसन्धिक्खणे…पे… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. उपेक्खासहगतं धम्मं पटिच्च नउपेक्खासहगतो धम्मो उप्पज्जति नहेतुपच्चया – अहेतुके उपेक्खासहगते खन्धे पटिच्च उपेक्खा चित्तसमुट्ठानञ्च रूपं; अहेतुकपटिसन्धिक्खणे…पे…. उपेक्खासहगतं धम्मं पटिच्च उपेक्खासहगतो च नउपेक्खासहगतो च धम्मा उप्पज्जन्ति नहेतुपच्चया – अहेतुकं उपेक्खासहगतं एकं खन्धं पटिच्च द्वे खन्धा उपेक्खा च चित्तसमुट्ठानञ्च रूपं, द्वे खन्धे…पे… अहेतुकपटिसन्धिक्खणे…पे…. (३)

१८०. नउपेक्खासहगतं धम्मं पटिच्च नउपेक्खासहगतो धम्मो उप्पज्जति नहेतुपच्चया – अहेतुकं नउपेक्खासहगतं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकं उपेक्खं पटिच्च चित्तसमुट्ठानं रूपं; अहेतुकपटिसन्धिक्खणे…पे… उपेक्खं पटिच्च वत्थु, वत्थुं पटिच्च उपेक्खा, एकं महाभूतं…पे… (याव असञ्ञसत्ता).

नउपेक्खासहगतं धम्मं पटिच्च उपेक्खासहगतो धम्मो उप्पज्जति नहेतुपच्चया – अहेतुकं उपेक्खं पटिच्च सम्पयुत्तका खन्धा; अहेतुकपटिसन्धिक्खणे उपेक्खं पटिच्च सम्पयुत्तका खन्धा; अहेतुकपटिसन्धिक्खणे वत्थुं पटिच्च उपेक्खासहगता खन्धा; विचिकिच्छासहगतं उद्धच्चसहगतं उपेक्खं पटिच्च विचिकिच्छासहगतो उद्धच्चसहगतो मोहो.

नउपेक्खासहगतं धम्मं पटिच्च उपेक्खासहगतो च नउपेक्खासहगतो च धम्मा उप्पज्जन्ति नहेतुपच्चया – अहेतुकं उपेक्खं पटिच्च सम्पयुत्तका खन्धा चित्तसमुट्ठानञ्च रूपं, अहेतुकं उपेक्खं पटिच्च सम्पयुत्तका खन्धा, महाभूते पटिच्च चित्तसमुट्ठानं रूपं; अहेतुकपटिसन्धिक्खणे उपेक्खं पटिच्च सम्पयुत्तका खन्धा कटत्ता च रूपं, अहेतुकपटिसन्धिक्खणे उपेक्खं पटिच्च सम्पयुत्तका खन्धा, महाभूते पटिच्च कटत्तारूपं, अहेतुकपटिसन्धिक्खणे वत्थुं पटिच्च उपेक्खासहगता खन्धा, महाभूते पटिच्च कटत्तारूपं, अहेतुकपटिसन्धिक्खणे वत्थुं पटिच्च उपेक्खा च सम्पयुत्तका च खन्धा. (३)

१८१. उपेक्खासहगतञ्च नउपेक्खासहगतञ्च धम्मं पटिच्च उपेक्खासहगतो धम्मो उप्पज्जति नहेतुपच्चया – अहेतुकं उपेक्खासहगतं एकं खन्धञ्च उपेक्खञ्च पटिच्च द्वे खन्धा, द्वे खन्धे…पे… अहेतुकपटिसन्धिक्खणे उपेक्खासहगतं एकं खन्धञ्च उपेक्खञ्च पटिच्च द्वे खन्धा, द्वे खन्धे…पे… अहेतुकपटिसन्धिक्खणे उपेक्खासहगतं एकं खन्धञ्च वत्थुञ्च पटिच्च द्वे खन्धा; द्वे खन्धे…पे… विचिकिच्छासहगते उद्धच्चसहगते खन्धे च उपेक्खञ्च पटिच्च विचिकिच्छासहगतो उद्धच्चसहगतो मोहो.

उपेक्खासहगतञ्च नउपेक्खासहगतञ्च धम्मं पटिच्च नउपेक्खासहगतो धम्मो उप्पज्जति नहेतुपच्चया – अहेतुके उपेक्खासहगते खन्धे च उपेक्खञ्च पटिच्च चित्तसमुट्ठानं रूपं, अहेतुके उपेक्खासहगते खन्धे च महाभूते च पटिच्च चित्तसमुट्ठानं रूपं; अहेतुकपटिसन्धिक्खणे उपेक्खासहगते खन्धे च उपेक्खञ्च पटिच्च कटत्तारूपं, अहेतुकपटिसन्धिक्खणे उपेक्खासहगते खन्धे च महाभूते च पटिच्च कटत्तारूपं, अहेतुकपटिसन्धिक्खणे उपेक्खासहगते खन्धे च वत्थुञ्च पटिच्च उपेक्खा.

उपेक्खासहगतञ्च नउपेक्खासहगतञ्च धम्मं पटिच्च उपेक्खासहगतो च नउपेक्खासहगतो च धम्मा उप्पज्जन्ति नहेतुपच्चया – अहेतुकं उपेक्खासहगतं एकं खन्धञ्च उपेक्खञ्च पटिच्च द्वे खन्धा चित्तसमुट्ठानञ्च रूपं, द्वे खन्धे…पे… अहेतुकं उपेक्खासहगतं एकं खन्धञ्च उपेक्खञ्च पटिच्च द्वे खन्धा, द्वे खन्धे…पे… अहेतुके उपेक्खासहगते खन्धे च उपेक्खञ्च महाभूते च पटिच्च चित्तसमुट्ठानं रूपं; अहेतुकपटिसन्धिक्खणे उपेक्खासहगतं एकं खन्धञ्च उपेक्खञ्च पटिच्च द्वे खन्धा कटत्ता च रूपं, द्वे खन्धे…पे… अहेतुकपटिसन्धिक्खणे उपेक्खासहगतं एकं खन्धञ्च उपेक्खञ्च पटिच्च द्वे खन्धा, द्वे खन्धे…पे… अहेतुके उपेक्खासहगते खन्धे च उपेक्खञ्च महाभूते च पटिच्च कटत्तारूपं; अहेतुकपटिसन्धिक्खणे उपेक्खासहगतं एकं खन्धञ्च वत्थुञ्च पटिच्च द्वे खन्धा उपेक्खा च, द्वे खन्धे…पे… (संखित्तं). (३)