१. विभङ्गवारो

हेतुपच्चयो

१७७. उपेक्खासहगतं धम्मं पटिच्च उपेक्खासहगतो धम्मो उप्पज्जति हेतुपच्चया – उपेक्खासहगतं एकं खन्धं पटिच्च द्वे खन्धा, द्वे खन्धे …पे… पटिसन्धिक्खणे…पे… उपेक्खासहगतं धम्मं पटिच्च नउपेक्खासहगतो धम्मो उप्पज्जति हेतुपच्चया – उपेक्खासहगते खन्धे पटिच्च उपेक्खा चित्तसमुट्ठानञ्च रूपं; पटिसन्धिक्खणे…पे…. उपेक्खासहगतं धम्मं पटिच्च उपेक्खासहगतो च नउपेक्खासहगतो च धम्मा उप्पज्जन्ति हेतुपच्चया – उपेक्खासहगतं एकं खन्धं पटिच्च द्वे खन्धा उपेक्खा च चित्तसमुट्ठानञ्च रूपं, द्वे खन्धे…पे… पटिसन्धिक्खणे…पे…. (३)

नउपेक्खासहगतं धम्मं पटिच्च नउपेक्खासहगतो धम्मो उप्पज्जति हेतुपच्चया – नउपेक्खासहगतं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… उपेक्खं पटिच्च चित्तसमुट्ठानं रूपं; पटिसन्धिक्खणे नउपेक्खासहगतं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे… पटिसन्धिक्खणे उपेक्खं पटिच्च कटत्तारूपं, खन्धे पटिच्च वत्थु, वत्थुं पटिच्च खन्धा, उपेक्खं पटिच्च वत्थु, वत्थुं पटिच्च उपेक्खा, एकं महाभूतं…पे…. (सप्पीतिकदुकसदिसं, अनुलोमे नवपि पञ्हा.)