१. विभङ्गवारो

हेतुपच्चयो

१७०. सुखसहगतो धम्मो सुखसहगतस्स धम्मस्स हेतुपच्चयेन पच्चयो… चत्तारि. (आरम्मणेपि अधिपतियापि सप्पीतिकदुकसदिसा, सुखन्ति नानाकरणं.)

अनन्तरपच्चयादि

१७१. सुखसहगतो धम्मो सुखसहगतस्स धम्मस्स अनन्तरपच्चयेन पच्चयो – पुरिमा पुरिमा सुखसहगता खन्धा पच्छिमानं पच्छिमानं सुखसहगतानं खन्धानं अनन्तरपच्चयेन पच्चयो. (मूलं कातब्बं.) पुरिमा पुरिमा सुखसहगता खन्धा पच्छिमस्स पच्छिमस्स सुखस्स अनन्तरपच्चयेन पच्चयो. सुखसहगतं चुतिचित्तं नसुखसहगतस्स उपपत्तिचित्तस्स… सुखसहगतं भवङ्गं आवज्जनाय… सुखसहगतं कायविञ्ञाणं विपाकमनोधातुया… सुखसहगता विपाकमनोविञ्ञाणधातु किरियमनोविञ्ञाणधातुया… सुखसहगतं भवङ्गं नसुखसहगतस्स भवङ्गस्स… सुखसहगतं कुसलाकुसलं नसुखसहगतस्स वुट्ठानस्स… किरियं वुट्ठानस्स… फलं वुट्ठानस्स अनन्तरपच्चयेन पच्चयो. (मूलं कातब्बं.) पुरिमा पुरिमा सुखसहगता खन्धा पच्छिमानं पच्छिमानं सुखसहगतानं खन्धानं सुखस्स च अनन्तरपच्चयेन पच्चयो. (१)

नसुखसहगतो धम्मो नसुखसहगतस्स धम्मस्स अनन्तरपच्चयेन पच्चयो – पुरिमा पुरिमा नसुखसहगता…पे…. (मूलं. तीणिपि सप्पीतिकदुकसदिसा.)

१७२. सुखसहगतो च नसुखसहगतो च धम्मा सुखसहगतस्स धम्मस्स अनन्तरपच्चयेन पच्चयो – पुरिमा पुरिमा सुखसहगता खन्धा च सुखञ्च पच्छिमानं पच्छिमानं सुखसहगतानं खन्धानं अनन्तरपच्चयेन पच्चयो. (मूलं कातब्बं.) पुरिमा पुरिमा सुखसहगता खन्धा च सुखञ्च पच्छिमस्स पच्छिमस्स सुखस्स अनन्तरपच्चयेन पच्चयो; सुखसहगतं चुतिचित्तञ्च सुखञ्च नसुखसहगतस्स उपपत्तिचित्तस्स सुखसहगतं भवङ्गञ्च सुखञ्च आवज्जनाय … सुखसहगतं कायविञ्ञाणञ्च सुखञ्च विपाकमनोधातुया… सुखसहगता विपाकमनोविञ्ञाणधातु च सुखञ्च किरियमनोविञ्ञाणधातुया… सुखसहगतं भवङ्गञ्च सुखञ्च नसुखसहगतस्स भवङ्गस्स… सुखसहगतं कुसलाकुसलञ्च सुखञ्च नसुखसहगतस्स वुट्ठानस्स… किरियं वुट्ठानस्स… फलं वुट्ठानस्स अनन्तरपच्चयेन पच्चयो. (मूलं कातब्बं.) पुरिमा पुरिमा सुखसहगता खन्धा च सुखञ्च पच्छिमानं पच्छिमानं सुखसहगतानं खन्धानं सुखस्स च अनन्तरपच्चयेन पच्चयो. (३)

समनन्तरपच्चयेन पच्चयो… सहजातपच्चयेन पच्चयो… अञ्ञमञ्ञपच्चयेन पच्चयो… निस्सयपच्चयेन पच्चयो.

उपनिस्सयपच्चयो

१७३. सुखसहगतो धम्मो सुखसहगतस्स धम्मस्स उपनिस्सयपच्चयेन पच्चयो… तीणि.

नसुखसहगतो धम्मो नसुखसहगतस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – नसुखसहगतं सद्धं उपनिस्साय नसुखसहगतेन चित्तेन दानं देति, सीलं…पे… समापत्तिं उप्पादेति, मानं जप्पेति, दिट्ठिं गण्हाति; नसुखसहगतं सीलं…पे… पञ्ञं… रागं…पे… पत्थनं… कायिकं सुखं… कायिकं दुक्खं… उतुं… भोजनं… सेनासनं सुखं उपनिस्साय नसुखसहगतेन चित्तेन दानं देति…पे… समापत्तिं उप्पादेति, पाणं हनति…पे… सङ्घं भिन्दति; नसुखसहगता सद्धा…पे… सेनासनं सुखञ्च नसुखसहगताय सद्धाय…पे… पञ्ञाय… रागस्स… दोसस्स…पे… पत्थनाय… कायिकस्स सुखस्स, कायिकस्स दुक्खस्स, मग्गस्स, फलसमापत्तिया सुखस्स च उपनिस्सयपच्चयेन पच्चयो. (१)

नसुखसहगतो धम्मो सुखसहगतस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – नसुखसहगतं सद्धं उपनिस्साय सुखसहगतेन चित्तेन दानं देति…पे… समापत्तिं उप्पादेति, मानं जप्पेति, दिट्ठिं गण्हाति; नसुखसहगतं सीलं…पे… पञ्ञं… रागं…पे… पत्थनं… कायिकं सुखं… कायिकं दुक्खं… उतुं… भोजनं… सेनासनं सुखं उपनिस्साय सुखसहगतेन चित्तेन दानं देति…पे… समापत्तिं उप्पादेति; सुखसहगतेन चित्तेन अदिन्नं आदियति; मुसा…पे… पिसुणं…पे… सम्फं…पे… सन्धिं…पे… निल्लोपं…पे… एकागारिकं…पे… परिपन्थे…पे… परदारं…पे… गामघातं…पे… निगमघातं करोति; नसुखसहगता सद्धा…पे… सेनासनं सुखञ्च सुखसहगताय सद्धाय…पे… पञ्ञाय… रागस्स… मानस्स… दिट्ठिया… पत्थनाय… कायिकस्स सुखस्स… मग्गस्स फलसमापत्तिया उपनिस्सयपच्चयेन पच्चयो. (२)

नसुखसहगतो धम्मो सुखसहगतस्स च नसुखसहगतस्स च धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – नसुखसहगतं सद्धं उपनिस्साय सुखसहगतेन चित्तेन दानं देति…पे… (दुतियगमनसदिसं) मानं जप्पेति, दिट्ठिं गण्हाति; नसुखसहगतं सीलं…पे… सेनासनं सुखं उपनिस्साय दानं देति…पे… समापत्तिं उप्पादेति, सुखसहगतेन चित्तेन अदिन्नं आदियति…पे… नसुखसहगता सद्धा…पे… सेनासनं सुखञ्च सुखसहगताय … सद्धाय…पे… पत्थनाय … कायिकस्स सुखस्स, मग्गस्स, फलसमापत्तिया सुखस्स च उपनिस्सयपच्चयेन पच्चयो. (३)

सुखसहगतो च नसुखसहगतो च धम्मा सुखसहगतस्स धम्मस्स उपनिस्सयपच्चयेन पच्चयो… तीणि.

पुरेजातपच्चयादि

१७४. नसुखसहगतो धम्मो नसुखसहगतस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं नसुखसहगतेन चित्तेन अनिच्चतो…पे… विपस्सति अस्सादेति अभिनन्दति, तं आरब्भ नसुखसहगतो रागो उप्पज्जति…पे… दोमनस्सं उप्पज्जति, सुखं उप्पज्जति, दिब्बेन चक्खुना रूपं पस्सति…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु नसुखसहगतानं खन्धानं सुखस्स च पुरेजातपच्चयेन पच्चयो. (१)

नसुखसहगतो धम्मो सुखसहगतस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं सुखसहगतेन चित्तेन अनिच्चतो…पे… विपस्सति, अस्सादेति अभिनन्दति, तं आरब्भ सुखसहगतो रागो उप्पज्जति, दिट्ठि उप्पज्जति. वत्थुपुरेजातं – वत्थु सुखसहगतानं खन्धानं पुरेजातपच्चयेन पच्चयो. (२)

नसुखसहगतो धम्मो सुखसहगतस्स च नसुखसहगतस्स च धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं सुखसहगतेन चित्तेन अनिच्चतो…पे… विपस्सति, अस्सादेति अभिनन्दति, तं आरब्भ सुखञ्च सम्पयुत्तका खन्धा च उप्पज्जन्ति. वत्थुपुरेजातं – वत्थु सुखसहगतानं खन्धानं सुखस्स च पुरेजातपच्चयेन पच्चयो. (३)

पच्छाजातपच्चयेन पच्चयो… तीणि… आसेवनपच्चयेन पच्चयो… नव.

कम्मपच्चयादि

१७५. सुखसहगतो धम्मो सुखसहगतस्स धम्मस्स कम्मपच्चयेन पच्चयो – सहजाता, नानाक्खणिका. (छ कम्मानि चत्तारि सहजातापि नानाक्खणिकापि कातब्बा, द्वे नानाक्खणिका.)… विपाकपच्चयेन पच्चयो… नव… आहारपच्चयेन पच्चयो… चत्तारि… इन्द्रियपच्चयेन पच्चयो… नव… झानपच्चयेन पच्चयो… नव… मग्गपच्चयेन पच्चयो… चत्तारि… सम्पयुत्तपच्चयेन पच्चयो… छ… विप्पयुत्तपच्चयेन पच्चयो… पञ्च… अत्थिपच्चयेन पच्चयो… नव… नत्थिपच्चयेन पच्चयो… नव… विगतपच्चयेन पच्चयो… नव… अविगतपच्चयेन पच्चयो… नव.