१-४. पच्चयानुलोमादि

हेतुपच्चयो

१६८. सुखसहगतं धम्मं पटिच्च सुखसहगतो धम्मो उप्पज्जति हेतुपच्चया – सुखसहगतं एकं खन्धं पटिच्च द्वे खन्धा, द्वे खन्धे पटिच्च एको खन्धो; पटिसन्धिक्खणे…पे…. सुखसहगतं धम्मं पटिच्च नसुखसहगतो धम्मो उप्पज्जति हेतुपच्चया – सुखसहगते खन्धे पटिच्च सुखं चित्तसमुट्ठानञ्च रूपं. (एवं सुखसहगतदुकं वित्थारेतब्बं, यथा सप्पीतिकदुकस्स अनुलोमपटिच्चवारो.)

हेतुया नव, आरम्मणे नव…पे… पुरेजाते छ, आसेवने छ, कम्मे नव…पे… अविगते नव.

अनुलोमं.

१६९. सुखसहगतं धम्मं पटिच्च सुखसहगतो धम्मो उप्पज्जति नहेतुपच्चया – अहेतुकं सुखसहगतं एकं खन्धं पटिच्च द्वे खन्धा, द्वे खन्धे…पे… (मूलं कातब्बं.) अहेतुके सुखसहगते खन्धे पटिच्च सुखञ्च चित्तसमुट्ठानञ्च रूपं. सुखसहगतं धम्मं पटिच्च सुखसहगतो च नसुखसहगतो च धम्मा उप्पज्जन्ति नहेतुपच्चया – अहेतुकं सुखसहगतं एकं खन्धं पटिच्च द्वे खन्धा सुखञ्च चित्तसमुट्ठानञ्च रूपं, द्वे खन्धे…पे…. (३)

नसुखसहगतं धम्मं पटिच्च नसुखसहगतो धम्मो उप्पज्जति नहेतुपच्चया – अहेतुकं नसुखसहगतं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकं सुखं पटिच्च चित्तसमुट्ठानं रूपं; अहेतुकपटिसन्धिक्खणे नसुखसहगतं एकं खन्धं पटिच्च तयो खन्धा कटत्ता च रूपं …पे… द्वे खन्धे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे…. (याव असञ्ञसत्ता) विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (यथा सप्पीतिके नहेतुपच्चयसदिसं, निन्नानं सब्बत्थमेव नव पञ्हा.)

नहेतुया नव, नआरम्मणे तीणि…पे… नउपनिस्सये तीणि, नपुरेजाते नव, नपच्छाजाते नव, नआसेवने नव, नकम्मे चत्तारि, नविपाके नव, नआहारे एकं, नइन्द्रिये एकं, नझाने छ, नमग्गे नव, नसम्पयुत्ते तीणि, नविप्पयुत्ते छ, नोनत्थिया तीणि, नोविगते तीणि.

पच्चनीयं.

(एवं इतरे द्वे गणनापि सहजातवारोपि पटिच्चवारसदिसा. पच्चयवारे पवत्तिपि पटिसन्धिपि वित्थारेतब्बा, यथा सप्पीतिकदुकपच्चयवारपच्चनीयेपि पवत्ते वत्थु च वित्थारेतब्बं, यथा सप्पीतिकदुके एकोयेव मोहो, एवं इतरे द्वे गणनापि निस्सयवारोपि संसट्ठवारोपि सम्पयुत्तवारोपि यथा सप्पीतिकदुकं, एवं कातब्बं.)