१. विभङ्गवारो

नहेतुपच्चयो

१४४. सप्पीतिकं धम्मं पटिच्च सप्पीतिको धम्मो उप्पज्जति नहेतुपच्चया – अहेतुकं सप्पीतिकं एकं खन्धं पटिच्च तयो खन्धा…पे… द्वे खन्धे…पे…. सप्पीतिकं धम्मं पटिच्च अप्पीतिको धम्मो उप्पज्जति नहेतुपच्चया – अहेतुके सप्पीतिके खन्धे पटिच्च पीति च चित्तसमुट्ठानञ्च रूपं. सप्पीतिकं धम्मं पटिच्च सप्पीतिको च अप्पीतिको च धम्मा उप्पज्जन्ति नहेतुपच्चया – अहेतुकं सप्पीतिकं एकं खन्धं पटिच्च तयो खन्धा पीति च चित्तसमुट्ठानञ्च रूपं…पे… द्वे खन्धे…पे…. (३)

अप्पीतिकं धम्मं पटिच्च अप्पीतिको धम्मो उप्पज्जति नहेतुपच्चया – अहेतुकं अप्पीतिकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पीतिं पटिच्च चित्तसमुट्ठानं रूपं; अहेतुकपटिसन्धिक्खणे अप्पीतिकं एकं खन्धं पटिच्च तयो खन्धा कटत्ता च रूपं…पे… द्वे खन्धे पटिच्च द्वे खन्धा कटत्ता च रूपं, खन्धे पटिच्च वत्थु, वत्थुं पटिच्च खन्धा, एकं महाभूतं…पे… (याव असञ्ञसत्तापि) विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. अप्पीतिकं धम्मं पटिच्च सप्पीतिको धम्मो उप्पज्जति नहेतुपच्चया – अहेतुकं पीतिं पटिच्च सप्पीतिका खन्धा. (मूलं कातब्बं.) पीतिं पटिच्च सप्पीतिका खन्धा चित्तसमुट्ठानञ्च रूपं. (३)

१४५. सप्पीतिकञ्च अप्पीतिकञ्च धम्मं पटिच्च सप्पीतिको धम्मो उप्पज्जति नहेतुपच्चया – अहेतुकं सप्पीतिकं एकं खन्धञ्च पीतिञ्च पटिच्च तयो खन्धा…पे… द्वे खन्धे च…पे…. सप्पीतिकञ्च अप्पीतिकञ्च धम्मं पटिच्च अप्पीतिको धम्मो उप्पज्जति नहेतुपच्चया – अहेतुके सप्पीतिके खन्धे च पीतिञ्च पटिच्च चित्तसमुट्ठानं रूपं, अहेतुके सप्पीतिके खन्धे च महाभूते च पटिच्च चित्तसमुट्ठानं रूपं. सप्पीतिकञ्च अप्पीतिकञ्च धम्मं पटिच्च सप्पीतिको च अप्पीतिको च धम्मा उप्पज्जन्ति नहेतुपच्चया – अहेतुकं सप्पीतिकं एकं खन्धञ्च पीतिञ्च पटिच्च तयो खन्धा चित्तसमुट्ठानञ्च रूपं…पे… द्वे खन्धे च…पे… अहेतुकं सप्पीतिकं एकं खन्धञ्च पीतिञ्च पटिच्च तयो खन्धा…पे… द्वे खन्धे च…पे… अहेतुके सप्पीतिके खन्धे च पीतिञ्च महाभूते च पटिच्च चित्तसमुट्ठानं रूपं. (३)