१. विभङ्गवारो

हेतुपच्चयो

१४२. सप्पीतिकं धम्मं पटिच्च सप्पीतिको धम्मो उप्पज्जति हेतुपच्चया – सप्पीतिकं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे…. सप्पीतिकं धम्मं पटिच्च अप्पीतिको धम्मो उप्पज्जति हेतुपच्चया – सप्पीतिके खन्धे पटिच्च पीति च चित्तसमुट्ठानञ्च रूपं; पटिसन्धिक्खणे…पे…. सप्पीतिकं धम्मं पटिच्च सप्पीतिको च अप्पीतिको च धम्मा उप्पज्जन्ति हेतुपच्चया – सप्पीतिकं एकं खन्धं पटिच्च तयो खन्धा पीति च चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (३)

अप्पीतिकं धम्मं पटिच्च अप्पीतिको धम्मो उप्पज्जति हेतुपच्चया – अप्पीतिकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पीतिं पटिच्च चित्तसमुट्ठानं रूपं; पटिसन्धिक्खणे अप्पीतिकं एकं खन्धं पटिच्च तयो खन्धा कटत्ता च रूपं, द्वे खन्धे…पे… पीतिं पटिच्च कटत्तारूपं, खन्धे पटिच्च वत्थु, वत्थुं पटिच्च खन्धा, पीतिं पटिच्च वत्थु, वत्थुं पटिच्च पीति, एकं महाभूतं…पे…. (यथा सवितक्कदुकं सब्बत्थ, एवं सप्पीतिकदुकं कातब्बं, सब्बत्थ पवत्तिपटिसन्धि नवपि पञ्हा.)