१-४. पच्चयानुलोमादि

हेतुपच्चयो

११५. सवितक्कं धम्मं संसट्ठो सवितक्को धम्मो उप्पज्जति हेतुपच्चया – सवितक्कं एकं खन्धं संसट्ठा तयो खन्धा…पे… द्वे खन्धे…पे… पटिसन्धिक्खणे…पे…. सवितक्कं धम्मं संसट्ठो अवितक्को धम्मो उप्पज्जति हेतुपच्चया – सवितक्के खन्धे संसट्ठो वितक्को; पटिसन्धिक्खणे…पे…. सवितक्कं धम्मं संसट्ठो सवितक्को च अवितक्को च धम्मा उप्पज्जन्ति हेतुपच्चया – सवितक्कं एकं खन्धं संसट्ठा तयो खन्धा वितक्को च…पे… द्वे खन्धे…पे… पटिसन्धिक्खणे…पे…. (३)

अवितक्कं धम्मं संसट्ठो अवितक्को धम्मो उप्पज्जति हेतुपच्चया – अवितक्कं एकं खन्धं संसट्ठा तयो खन्धा…पे… द्वे खन्धे…पे… पटिसन्धिक्खणे…पे…. अवितक्कं धम्मं संसट्ठो सवितक्को धम्मो उप्पज्जति हेतुपच्चया – वितक्कं संसट्ठा सम्पयुत्तका खन्धा; पटिसन्धिक्खणे…पे…. (२)

सवितक्कञ्च अवितक्कञ्च धम्मं संसट्ठो सवितक्को धम्मो उप्पज्जति हेतुपच्चया – सवितक्कं एकं खन्धञ्च वितक्कञ्च संसट्ठा तयो खन्धा…पे… द्वे खन्धे…पे… पटिसन्धिक्खणे…पे…. (१) (संखित्तं.)

हेतुया छ, आरम्मणे छ, अधिपतिया छ (सब्बत्थ छ) अविगते छ.

अनुलोमं.

सवितक्कं धम्मं संसट्ठो सवितक्को धम्मो उप्पज्जति नहेतुपच्चया. (एवं छ पञ्हा कातब्बा अनुलोमसदिसा, अहेतुकाति नियामेतब्बा, तीणियेव, मोहो उद्धरितब्बो.)

नहेतुया छ, नअधिपतिया छ, नपुरेजाते छ, नपच्छाजाते छ, नआसेवने छ, नकम्मे चत्तारि, नविपाके छ, नझाने एकं, नमग्गे छ, नविप्पयुत्ते छ.

पच्चनीयं.