१. विभङ्गवारो

नहेतुपच्चयो

१३. किलेसं धम्मं पच्चया किलेसो धम्मो उप्पज्जति नहेतुपच्चया – विचिकिच्छं पच्चया विचिकिच्छासहगतो मोहो, उद्धच्चं पच्चया उद्धच्चसहगतो मोहो. (१)

नोकिलेसं धम्मं पच्चया नोकिलेसो धम्मो उप्पज्जति नहेतुपच्चया (याव असञ्ञसत्ता) – चक्खायतनं पच्चया चक्खुविञ्ञाणं…पे… कायायतनं…पे… वत्थुं पच्चया अहेतुका नोकिलेसा खन्धा. (१)

नोकिलेसं धम्मं पच्चया किलेसो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (२)

किलेसञ्च नोकिलेसञ्च धम्मं पच्चया किलेसो धम्मो उप्पज्जति नहेतुपच्चया – विचिकिच्छञ्च सम्पयुत्तके च खन्धे वत्थुञ्च पच्चया विचिकिच्छासहगतो मोहो, उद्धच्चञ्च सम्पयुत्तके च खन्धे वत्थुञ्च पच्चया उद्धच्चसहगतो मोहो (संखित्तं). (१)