१. विभङ्गवारो

हेतुपच्चयो

११०. सवितक्कं धम्मं पच्चया सवितक्को धम्मो उप्पज्जति हेतुपच्चया… तीणि (पटिच्चवारसदिसा).

अवितक्कं धम्मं पच्चया अवितक्को धम्मो उप्पज्जति हेतुपच्चया – अवितक्कं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… वितक्कं पच्चया चित्तसमुट्ठानं रूपं; पटिसन्धिक्खणे अवितक्कं एकं खन्धं पच्चया तयो खन्धा कटत्ता च रूपं…पे… द्वे खन्धे…पे… पटिसन्धिक्खणे वितक्कं पच्चया कटत्तारूपं, खन्धे पच्चया वत्थु, वत्थुं पच्चया खन्धा, वितक्कं पच्चया वत्थु, वत्थुं पच्चया वितक्को, एकं महाभूतं पच्चया तयो महाभूता…पे… वत्थुं पच्चया अवितक्का खन्धा, वत्थुं पच्चया वितक्को.

अवितक्कं धम्मं पच्चया सवितक्को धम्मो उप्पज्जति हेतुपच्चया – वितक्कं पच्चया सम्पयुत्तका खन्धा, वत्थुं पच्चया सवितक्का खन्धा (पटिसन्धियापि द्वे).

अवितक्कं धम्मं पच्चया सवितक्को च अवितक्को च धम्मा उप्पज्जन्ति हेतुपच्चया – वितक्कं पच्चया सम्पयुत्तका खन्धा चित्तसमुट्ठानञ्च रूपं, वितक्कं पच्चया सम्पयुत्तका खन्धा, महाभूते पच्चया चित्तसमुट्ठानं रूपं, वत्थुं पच्चया सवितक्का खन्धा, महाभूते पच्चया चित्तसमुट्ठानं रूपं, वत्थुं पच्चया वितक्को सम्पयुत्तका च खन्धा; पटिसन्धिक्खणे…पे… (पटिसन्धियापि पवत्तिसदिसायेव). (३)

१११. सवितक्कञ्च अवितक्कञ्च धम्मं पच्चया सवितक्को धम्मो उप्पज्जति हेतुपच्चया – सवितक्कं एकं खन्धञ्च वितक्कञ्च पच्चया तयो खन्धा…पे… द्वे खन्धे…पे… सवितक्कं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… (पटिसन्धिक्खणे द्वे कातब्बा). (१)

सवितक्कञ्च अवितक्कञ्च धम्मं पच्चया अवितक्को धम्मो उप्पज्जति हेतुपच्चया – सवितक्के खन्धे च वितक्कञ्च पच्चया चित्तसमुट्ठानं रूपं, सवितक्के खन्धे च वितक्कञ्च महाभूते च पच्चया चित्तसमुट्ठानं रूपं, सवितक्के खन्धे च वत्थुञ्च पच्चया वितक्को; पटिसन्धिक्खणे…पे… (तीणि, पटिसन्धियापि). (२)

सवितक्कञ्च अवितक्कञ्च धम्मं पच्चया सवितक्को च अवितक्को च धम्मा उप्पज्जन्ति हेतुपच्चया – सवितक्कं एकं खन्धञ्च वितक्कञ्च पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… सवितक्कं एकं खन्धञ्च वितक्कञ्च वत्थुञ्च पच्चया तयो खन्धा…पे… द्वे खन्धे…पे… सवितक्के खन्धे च वितक्कञ्च महाभूते च पच्चया चित्तसमुट्ठानं रूपं, सवितक्कं एकं खन्धञ्च वत्थुञ्च पच्चया तयो खन्धा वितक्को च…पे… द्वे खन्धे…पे… पटिसन्धिक्खणे…पे…. (३)