१. विभङ्गवारो

नहेतुपच्चयो

१०६. सवितक्कं धम्मं पटिच्च सवितक्को धम्मो उप्पज्जति नहेतुपच्चया – अहेतुकं सवितक्कं एकं खन्धं पटिच्च तयो खन्धा…पे… द्वे खन्धे…पे… अहेतुकपटिसन्धिक्खणे…पे… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (सवितक्कमूलका अवसेसा द्वे पञ्हा कातब्बा, अहेतुकं निन्नानं.) (३)

अवितक्कं धम्मं पटिच्च अवितक्को धम्मो उप्पज्जति नहेतुपच्चया – अहेतुकं अवितक्कं एकं खन्धं पटिच्च तयो खन्धा…पे… द्वे खन्धे…पे… अहेतुकं वितक्कं पटिच्च चित्तसमुट्ठानं रूपं; अहेतुकपटिसन्धिक्खणे वितक्कं पटिच्च कटत्तारूपं, वितक्कं पटिच्च वत्थु, वत्थुं पटिच्च वितक्को, एकं महाभूतं…पे…. (१)

अवितक्कं धम्मं पटिच्च सवितक्को धम्मो उप्पज्जति नहेतुपच्चया – अहेतुकं वितक्कं पटिच्च सम्पयुत्तका खन्धा, अहेतुकपटिसन्धिक्खणे वितक्कं पटिच्च सम्पयुत्तका खन्धा; पटिसन्धिक्खणे वत्थुं पटिच्च अहेतुका सवितक्का खन्धा, वितक्कं पटिच्च विचिकिच्छासहगतो उद्धच्चसहगतो मोहो. (२)

अवितक्कं धम्मं पटिच्च सवितक्को च अवितक्को च धम्मा उप्पज्जन्ति नहेतुपच्चया. (संखित्तं. हेतुपच्चयसदिसं. ‘‘अहेतुक’’न्ति नियामेतब्बं.) (३)

सवितक्कञ्च अवितक्कञ्च धम्मं पटिच्च सवितक्को धम्मो उप्पज्जति नहेतुपच्चया – अहेतुकं सवितक्कं एकं खन्धञ्च वितक्कञ्च पटिच्च तयो खन्धा…पे… द्वे खन्धे…पे… अहेतुकपटिसन्धिक्खणे सवितक्कं एकं खन्धञ्च वितक्कञ्च पटिच्च तयो खन्धा…पे… द्वे खन्धे…पे… अहेतुकपटिसन्धिक्खणे सवितक्कं एकं खन्धञ्च वत्थुञ्च वितक्कञ्च पटिच्च तयो खन्धा…पे… द्वे खन्धे…पे… विचिकिच्छासहगते उद्धच्चसहगते खन्धे च वितक्कञ्च पटिच्च विचिकिच्छासहगतो उद्धच्चसहगतो मोहो. (अवसेसा द्वे पञ्हा हेतुपच्चयसदिसा निन्नाना, अहेतुकन्ति नियामेतब्बं.) (३)