१. विभङ्गवारो

नहेतुपच्चयो

६२. दस्सनेन पहातब्बहेतुकं धम्मं पच्चया नदस्सनेन पहातब्बहेतुको धम्मो उप्पज्जति नहेतुपच्चया – विचिकिच्छासहगते खन्धे पच्चया विचिकिच्छासहगतो मोहो. (१)

नदस्सनेन पहातब्बहेतुकं धम्मं पच्चया नदस्सनेन पहातब्बहेतुको धम्मो उप्पज्जति नहेतुपच्चया – अहेतुकं नदस्सनेन पहातब्बहेतुकं…पे… (याव असञ्ञसत्ता) चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अहेतुका नदस्सनेन पहातब्बहेतुका खन्धा, उद्धच्चसहगते खन्धे च वत्थुञ्च पच्चया उद्धच्चसहगतो मोहो. (१)

दस्सनेन पहातब्बहेतुकञ्च नदस्सनेन पहातब्बहेतुकञ्च धम्मं पच्चया नदस्सनेन पहातब्बहेतुको धम्मो उप्पज्जति नहेतुपच्चया – विचिकिच्छासहगते खन्धे च वत्थुञ्च पच्चया विचिकिच्छासहगतो मोहो (संखित्तं). (१)