१. विभङ्गवारो

हेतुपच्चयो

१०. किलेसं धम्मं पच्चया किलेसो धम्मो उप्पज्जति हेतुपच्चया… तीणि (पटिच्चसदिसा).

नोकिलेसं धम्मं पच्चया नोकिलेसो धम्मो उप्पज्जति हेतुपच्चया – नोकिलेसं एकं खन्धं पच्चया तयो खन्धा…पे… (याव अज्झत्तिका महाभूता) वत्थुं पच्चया नोकिलेसा खन्धा. (१)

नोकिलेसं धम्मं पच्चया किलेसो धम्मो उप्पज्जति हेतुपच्चया – नोकिलेसे खन्धे पच्चया किलेसा, वत्थुं पच्चया किलेसा. (२)

नोकिलेसं धम्मं पच्चया किलेसो च नोकिलेसो च धम्मा उप्पज्जन्ति हेतुपच्चया – नोकिलेसं एकं खन्धं पच्चया तयो खन्धा किलेसा च चित्तसमुट्ठानञ्च रूपं…पे… द्वे खन्धे…पे… वत्थुं पच्चया किलेसा, महाभूते पच्चया चित्तसमुट्ठानं रूपं, वत्थुं पच्चया किलेसा च सम्पयुत्तका च खन्धा. (३)

११. किलेसञ्च नोकिलेसञ्च धम्मं पच्चया किलेसो धम्मो उप्पज्जति हेतुपच्चया – लोभञ्च सम्पयुत्तके च खन्धे पच्चया मोहो दिट्ठि थिनं उद्धच्चं अहिरिकं अनोत्तप्पं (चक्कं). लोभञ्च वत्थुञ्च पच्चया किलेसा. (१)

किलेसञ्च नोकिलेसञ्च धम्मं पच्चया नोकिलेसो धम्मो उप्पज्जति हेतुपच्चया – नोकिलेसं एकं खन्धञ्च किलेसञ्च पच्चया तयो खन्धा चित्तसमुट्ठानञ्च रूपं…पे… द्वे खन्धे च…पे… किलेसे च महाभूते च पच्चया चित्तसमुट्ठानं रूपं, किलेसे च वत्थुञ्च पच्चया नोकिलेसा खन्धा. (२)

किलेसञ्च नोकिलेसञ्च धम्मं पच्चया किलेसो च नोकिलेसो च धम्मा उप्पज्जन्ति हेतुपच्चया – नोकिलेसं एकं खन्धञ्च लोभञ्च पच्चया तयो खन्धा मोहो दिट्ठि थिनं उद्धच्चं अहिरिकं अनोत्तप्पं चित्तसमुट्ठानञ्च रूपं…पे… द्वे खन्धे च…पे… (चक्कं). लोभञ्च वत्थुञ्च पच्चया मोहो दिट्ठि थिनं उद्धच्चं अहिरिकं अनोत्तप्पं सम्पयुत्तका च खन्धा (चक्कं). (३)

(आरम्मणपच्चये नोकिलेसमूले पञ्च विञ्ञाणा कातब्बा.)