१. विभङ्गवारो

हेतुपच्चयो

५७. दस्सनेन पहातब्बहेतुकं धम्मं पच्चया दस्सनेन पहातब्बहेतुको धम्मो उप्पज्जति हेतुपच्चया… तीणि.

नदस्सनेन पहातब्बहेतुकं धम्मं पच्चया नदस्सनेन पहातब्बहेतुको धम्मो उप्पज्जति हेतुपच्चया – नदस्सनेन पहातब्बहेतुकं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… (याव अज्झत्तिका महाभूता) वत्थुं पच्चया नदस्सनेन पहातब्बहेतुका खन्धा. (१)

नदस्सनेन पहातब्बहेतुकं धम्मं पच्चया दस्सनेन पहातब्बहेतुको धम्मो उप्पज्जति हेतुपच्चया – वत्थुं पच्चया दस्सनेन पहातब्बहेतुका खन्धा, विचिकिच्छासहगतं मोहं पच्चया सम्पयुत्तका खन्धा. (२)

नदस्सनेन पहातब्बहेतुकं धम्मं पच्चया दस्सनेन पहातब्बहेतुको च नदस्सनेन पहातब्बहेतुको च धम्मा उप्पज्जन्ति हेतुपच्चया – वत्थुं पच्चया दस्सनेन पहातब्बहेतुका खन्धा, महाभूते पच्चया चित्तसमुट्ठानं रूपं, विचिकिच्छासहगतं मोहं पच्चया सम्पयुत्तका खन्धा चित्तसमुट्ठानञ्च रूपं. (३)

५८. दस्सनेन पहातब्बहेतुकञ्च नदस्सनेन पहातब्बहेतुकञ्च धम्मं पच्चया दस्सनेन पहातब्बहेतुको धम्मो उप्पज्जति हेतुपच्चया – दस्सनेन पहातब्बहेतुकं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… विचिकिच्छासहगतं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे…. (१)

दस्सनेन पहातब्बहेतुकञ्च नदस्सनेन पहातब्बहेतुकञ्च धम्मं पच्चया नदस्सनेन पहातब्बहेतुको धम्मो उप्पज्जति हेतुपच्चया – दस्सनेन पहातब्बहेतुके खन्धे च महाभूते च पच्चया चित्तसमुट्ठानं रूपं, विचिकिच्छासहगते खन्धे च मोहञ्च पच्चया चित्तसमुट्ठानं रूपं. (२)

दस्सनेन पहातब्बहेतुकञ्च नदस्सनेन पहातब्बहेतुकञ्च धम्मं पच्चया दस्सनेन पहातब्बहेतुको च नदस्सनेन पहातब्बहेतुको च धम्मा उप्पज्जन्ति हेतुपच्चया – दस्सनेन पहातब्बहेतुकं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… दस्सनेन पहातब्बहेतुके खन्धे च महाभूते च पच्चया चित्तसमुट्ठानं रूपं, विचिकिच्छासहगतं एकं खन्धञ्च मोहञ्च पच्चया तयो खन्धा चित्तसमुट्ठानञ्च रूपं…पे… द्वे खन्धे च…पे…. (३)

आरम्मणपच्चयो

५९. दस्सनेन पहातब्बहेतुकं धम्मं पच्चया दस्सनेन पहातब्बहेतुको धम्मो उप्पज्जति आरम्मणपच्चया… तीणि (पटिच्चसदिसा).

नदस्सनेन पहातब्बहेतुकं धम्मं पच्चया नदस्सनेन पहातब्बहेतुको धम्मो उप्पज्जति आरम्मणपच्चया – नदस्सनेन पहातब्बहेतुकं एकं खन्धं पच्चया तयो खन्धा…पे… द्वे खन्धे…पे… पटिसन्धिक्खणे…पे… चक्खायतनं पच्चया चक्खुविञ्ञाणं…पे… वत्थुं पच्चया नदस्सनेन पहातब्बहेतुका खन्धा, वत्थुं पच्चया विचिकिच्छासहगतो मोहो. नदस्सनेन पहातब्बहेतुकं धम्मं पच्चया दस्सनेन पहातब्बहेतुको धम्मो उप्पज्जति आरम्मणपच्चया – वत्थुं पच्चया दस्सनेन पहातब्बहेतुका खन्धा, विचिकिच्छासहगतं मोहं पच्चया सम्पयुत्तका खन्धा. नदस्सनेन पहातब्बहेतुकं धम्मं पच्चया दस्सनेन पहातब्बहेतुको च नदस्सनेन पहातब्बहेतुको च धम्मा उप्पज्जन्ति आरम्मणपच्चया – वत्थुं पच्चया विचिकिच्छासहगता खन्धा च मोहो च. (३)

६०. दस्सनेन पहातब्बहेतुकञ्च नदस्सनेन पहातब्बहेतुकञ्च धम्मं पच्चया दस्सनेन पहातब्बहेतुको धम्मो उप्पज्जति आरम्मणपच्चया – दस्सनेन पहातब्बहेतुकं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… विचिकिच्छासहगतं एकं खन्धञ्च मोहञ्च पच्चया तयो खन्धा…पे… द्वे खन्धे च…पे…. (१)

दस्सनेन पहातब्बहेतुकञ्च नदस्सनेन पहातब्बहेतुकञ्च धम्मं पच्चया नदस्सनेन पहातब्बहेतुको धम्मो उप्पज्जति आरम्मणपच्चया – विचिकिच्छासहगते खन्धे च वत्थुञ्च पच्चया विचिकिच्छासहगतो मोहो. (२)

दस्सनेन पहातब्बहेतुकञ्च नदस्सनेन पहातब्बहेतुकञ्च धम्मं पच्चया दस्सनेन पहातब्बहेतुको च नदस्सनेन पहातब्बहेतुको च धम्मा उप्पज्जन्ति आरम्मणपच्चया – विचिकिच्छासहगतं एकं खन्धञ्च वत्थुञ्च पच्चया तयो खन्धा मोहो च…पे… द्वे खन्धे च…पे…. (३)