१. विभङ्गवारो

हेतुपच्चयो

३६. भावनाय पहातब्बो धम्मो भावनाय पहातब्बस्स धम्मस्स हेतुपच्चयेन पच्चयो – भावनाय पहातब्बा हेतू सम्पयुत्तकानं खन्धानं हेतुपच्चयेन पच्चयो… तीणि.

नभावनाय पहातब्बो धम्मो नभावनाय पहातब्बस्स धम्मस्स हेतुपच्चयेन पच्चयो (संखित्तं). (१)

आरम्मणपच्चयो

३७. भावनाय पहातब्बो धम्मो भावनाय पहातब्बस्स धम्मस्स आरम्मणपच्चयेन पच्चयो – भावनाय पहातब्बं रागं अस्सादेति अभिनन्दति, तं आरब्भ भावनाय पहातब्बो रागो उप्पज्जति, उद्धच्चं उप्पज्जति; भावनाय पहातब्बं दोमनस्सं उप्पज्जति; उद्धच्चं आरब्भ उद्धच्चं उप्पज्जति, भावनाय पहातब्बं दोमनस्सं उप्पज्जति; भावनाय पहातब्बं दोमनस्सं आरब्भ भावनाय पहातब्बं दोमनस्सं उप्पज्जति, उद्धच्चं उप्पज्जति. (१)

भावनाय पहातब्बो धम्मो नभावनाय पहातब्बस्स धम्मस्स आरम्मणपच्चयेन पच्चयो – अरिया भावनाय पहातब्बे पहीने किलेसे…पे… विक्खम्भिते किलेसे…पे… पुब्बे समुदाचिण्णे…पे… भावनाय पहातब्बे खन्धे अनिच्चतो…पे… विपस्सति अस्सादेति अभिनन्दति, तं आरब्भ नभावनाय पहातब्बो रागो उप्पज्जति, दिट्ठि…पे… विचिकिच्छा…पे… नभावनाय पहातब्बं दोमनस्सं उप्पज्जति; चेतोपरियञाणेन भावनाय पहातब्बचित्तसमङ्गिस्स चित्तं जानाति, भावनाय पहातब्बा खन्धा चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

३८. नभावनाय पहातब्बो धम्मो नभावनाय पहातब्बस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं पच्चवेक्खति अस्सादेति अभिनन्दति, तं आरब्भ नभावनाय पहातब्बो रागो उप्पज्जति, दिट्ठि…पे… विचिकिच्छा…पे… नभावनाय पहातब्बं दोमनस्सं उप्पज्जति, पुब्बे…पे… झाना…पे… अरिया मग्गा वुट्ठहित्वा…पे… फलस्स, आवज्जनाय आरम्मणपच्चयेन पच्चयो; अरिया नभावनाय पहातब्बे पहीने किलेसे…पे… चक्खुं…पे… वत्थुं नभावनाय पहातब्बे खन्धे अनिच्चतो…पे… विपस्सति अस्सादेति अभिनन्दति, तं आरब्भ नभावनाय पहातब्बो रागो उप्पज्जति, दिट्ठि…पे… विचिकिच्छा…पे… नभावनाय पहातब्बं दोमनस्सं उप्पज्जति; दिब्बेन चक्खुना रूपं पस्सति…पे… यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

नभावनाय पहातब्बो धम्मो भावनाय पहातब्बस्स धम्मस्स आरम्मणपच्चयेन पच्चयो – दानं…पे… सीलं…पे… झानं…पे… चक्खुं…पे… वत्थुं नभावनाय पहातब्बे खन्धे अस्सादेति अभिनन्दति, तं आरब्भ भावनाय पहातब्बो रागो उप्पज्जति, उद्धच्चं उप्पज्जति, भावनाय पहातब्बं दोमनस्सं उप्पज्जति. (२)

अधिपतिपच्चयो

३९. भावनाय पहातब्बो धम्मो भावनाय पहातब्बस्स धम्मस्स अधिपतिपच्चयेन पच्चयो – आरम्मणाधिपति सहजाताधिपति. आरम्मणाधिपति – भावनाय पहातब्बं रागं गरुं कत्वा अस्सादेति अभिनन्दति, तं गरुं कत्वा भावनाय पहातब्बो रागो उप्पज्जति. सहजाताधिपति – भावनाय पहातब्बाधिपति सम्पयुत्तकानं खन्धानं अधिपतिपच्चयेन पच्चयो. (१)

भावनाय पहातब्बो धम्मो नभावनाय पहातब्बस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – भावनाय पहातब्बं रागं गरुं कत्वा अस्सादेति अभिनन्दति, तं गरुं कत्वा नभावनाय पहातब्बो रागो उप्पज्जति, दिट्ठि उप्पज्जति. सहजाताधिपति – भावनाय पहातब्बाधिपति चित्तसमुट्ठानानं रूपानं अधिपतिपच्चयेन पच्चयो. (२)

भावनाय पहातब्बो धम्मो भावनाय पहातब्बस्स च नभावनाय पहातब्बस्स च धम्मस्स अधिपतिपच्चयेन पच्चयो. सहजाताधिपति – भावनाय पहातब्बाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

४०. नभावनाय पहातब्बो धम्मो नभावनाय पहातब्बस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा सीलं…पे… उपोसथकम्मं कत्वा तं गरुं कत्वा पच्चवेक्खति अस्सादेति अभिनन्दति, तं गरुं कत्वा नभावनाय पहातब्बो रागो उप्पज्जति. सहजाताधिपति – नभावनाय पहातब्बाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

नभावनाय पहातब्बो धम्मो भावनाय पहातब्बस्स धम्मस्स अधिपतिपच्चयेन पच्चयो. आरम्मणाधिपति – दानं…पे… झानं…पे… चक्खुं…पे… वत्थुं नभावनाय पहातब्बे खन्धे गरुं कत्वा अस्सादेति अभिनन्दति, तं गरुं कत्वा भावनाय पहातब्बो रागो उप्पज्जति. (२)

अनन्तरपच्चयादि

४१. भावनाय पहातब्बो धम्मो भावनाय पहातब्बस्स धम्मस्स अनन्तरपच्चयेन पच्चयो… चत्तारि (दस्सनदुकसदिसा भावना निन्नानाकरणा)… समनन्तरपच्चयेन पच्चयो… चत्तारि… सहजातपच्चयेन पच्चयो… पञ्च… अञ्ञमञ्ञपच्चयेन पच्चयो… द्वे… निस्सयपच्चयेन पच्चयो… सत्त.

उपनिस्सयपच्चयो

४२. भावनाय पहातब्बो धम्मो भावनाय पहातब्बस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – भावनाय पहातब्बो रागो… दोसो… मोहो… मानो… पत्थना भावनाय पहातब्बस्स रागस्स … दोसस्स… मोहस्स… मानस्स… पत्थनाय उपनिस्सयपच्चयेन पच्चयो. (१)

भावनाय पहातब्बो धम्मो नभावनाय पहातब्बस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – भावनाय पहातब्बं रागं उपनिस्साय दानं देति…पे… समापत्तिं उप्पादेति, पाणं हनति…पे… सङ्घं भिन्दति; भावनाय पहातब्बं दोसं… मोहं… मानं… पत्थनं उपनिस्साय दानं देति…पे… समापत्तिं उप्पादेति, पाणं हनति…पे… सङ्घं भिन्दति; भावनाय पहातब्बो रागो…पे… पत्थना सद्धाय…पे… पञ्ञाय नभावनाय पहातब्बस्स, रागस्स… दोसस्स… मोहस्स… दिट्ठिया… पत्थनाय… कायिकस्स सुखस्स… कायिकस्स दुक्खस्स… मग्गस्स… फलसमापत्तिया उपनिस्सयपच्चयेन पच्चयो. (२)

४३. नभावनाय पहातब्बो धम्मो नभावनाय पहातब्बस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… समापत्तिं उप्पादेति, दिट्ठिं गण्हाति; सीलं…पे… पञ्ञं, नभावनाय पहातब्बं रागं… दोसं… मोहं… दिट्ठिं… पत्थनं… कायिकं सुखं… कायिकं दुक्खं…पे… सेनासनं उपनिस्साय दानं देति…पे… समापत्तिं उप्पादेति, पाणं हनति…पे… सङ्घं भिन्दति; सद्धा…पे… सेनासनं सद्धाय…पे… पञ्ञाय नभावनाय पहातब्बस्स रागस्स… दोसस्स… मोहस्स… दिट्ठिया… पत्थनाय… कायिकस्स सुखस्स… कायिकस्स दुक्खस्स… मग्गस्स… फलसमापत्तिया उपनिस्सयपच्चयेन पच्चयो. (१)

नभावनाय पहातब्बो धम्मो भावनाय पहातब्बस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय मानं जप्पेति…पे… सीलं…पे… पञ्ञं… रागं…पे… कायिकं सुखं… कायिकं दुक्खं… सेनासनं उपनिस्साय मानं जप्पेति; सद्धा…पे… सेनासनं भावनाय पहातब्बस्स रागस्स… दोसस्स… मोहस्स… मानस्स… पत्थनाय उपनिस्सयपच्चयेन पच्चयो. (२)

पुरेजातपच्चयादि

४४. नभावनाय पहातब्बो धम्मो नभावनाय पहातब्बस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… विपस्सति अस्सादेति अभिनन्दति, तं आरब्भ नभावनाय पहातब्बो रागो उप्पज्जति, दिट्ठि उप्पज्जति, विचिकिच्छा उप्पज्जति; नभावनाय पहातब्बं दोमनस्सं उप्पज्जति, दिब्बेन चक्खुना रूपं पस्सति…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु नभावनाय पहातब्बानं खन्धानं पुरेजातपच्चयेन पच्चयो. (१)

नभावनाय पहातब्बो धम्मो भावनाय पहातब्बस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अस्सादेति अभिनन्दति, तं आरब्भ भावनाय पहातब्बो रागो उप्पज्जति, उद्धच्चं उप्पज्जति, भावनाय पहातब्बं दोमनस्सं उप्पज्जति. वत्थुपुरेजातं – वत्थु भावनाय पहातब्बानं खन्धानं पुरेजातपच्चयेन पच्चयो. (२)

४५. पच्छाजातपच्चयेन पच्चयो… द्वे, आसेवनपच्चयेन पच्चयो… द्वे, कम्मपच्चयेन पच्चयो – भावनाय पहातब्बा चेतना सम्पयुत्तकानं खन्धानं कम्मपच्चयेन पच्चयो. (मूलं कातब्बं.) भावनाय पहातब्बा चेतना चित्तसमुट्ठानानं रूपानं कम्मपच्चयेन पच्चयो. (मूलं कातब्बं.) भावनाय पहातब्बा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

नभावनाय पहातब्बो धम्मो नभावनाय पहातब्बस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – नभावनाय पहातब्बा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – नभावनाय पहातब्बा चेतना विपाकानं खन्धानं कटत्ता च रूपानं कम्मपच्चयेन पच्चयो… विपाकपच्चयेन पच्चयो… एकं…पे… अविगतपच्चयेन पच्चयो. (सब्बपच्चया दस्सनदुकसदिसा, भावना निन्नानाकरणा.)