१-६. पटिच्चवारादि

१-४. पच्चयानुलोमादि

३५. भावनाय पहातब्बं धम्मं पटिच्च भावनाय पहातब्बो धम्मो उप्पज्जति हेतुपच्चया (यथा दस्सनदुकं, एवं वित्थारेतब्बं, निन्नानाकरणं).

हेतुया पञ्च…पे… अविगते पञ्च.

अनुलोमं.

भावनाय पहातब्बं धम्मं पटिच्च भावनाय पहातब्बो धम्मो उप्पज्जति नहेतुपच्चया – उद्धच्चसहगते खन्धे पटिच्च उद्धच्चसहगतो मोहो.

नभावनाय पहातब्बं धम्मं पटिच्च नभावनाय पहातब्बो धम्मो उप्पज्जति नहेतुपच्चया – अहेतुकं नभावनाय पहातब्बं एकं खन्धं…पे… (याव असञ्ञसत्ता) विचिकिच्छासहगते खन्धे पटिच्च विचिकिच्छासहगतो मोहो (संखित्तं).

नहेतुया द्वे…पे… नोविगते तीणि.

पच्चनीयं.

(पच्चयवारपच्चनीये नहेतुपच्चये उद्धच्चसहगते तीणि, मोहो उद्धरितब्बो. सब्बेपि वारा दस्सनदुकसदिसा, उद्धच्चपच्चनीयम्पि नानं.)