१. विभङ्गवारो

हेतुपच्चयो

१३. दस्सनेन पहातब्बो धम्मो दस्सनेन पहातब्बस्स धम्मस्स हेतुपच्चयेन पच्चयो… तीणि.

नदस्सनेन पहातब्बो धम्मो नदस्सनेन पहातब्बस्स धम्मस्स हेतुपच्चयेन पच्चयो – नदस्सनेन पहातब्बा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

आरम्मणपच्चयो

१४. दस्सनेन पहातब्बो धम्मो दस्सनेन पहातब्बस्स धम्मस्स आरम्मणपच्चयेन पच्चयो – दस्सनेन पहातब्बं रागं अस्सादेति अभिनन्दति, तं आरब्भ दस्सनेन पहातब्बो रागो उप्पज्जति, दिट्ठि…पे… विचिकिच्छा उप्पज्जति, दस्सनेन पहातब्बं दोमनस्सं उप्पज्जति; दस्सनेन पहातब्बं दिट्ठिं अस्सादेति अभिनन्दति, तं आरब्भ दस्सनेन पहातब्बो रागो उप्पज्जति, दिट्ठि…पे… विचिकिच्छा…पे… दोमनस्सं उप्पज्जति; विचिकिच्छं आरब्भ विचिकिच्छा उप्पज्जति, दिट्ठि…पे… दोमनस्सं उप्पज्जति; दस्सनेन पहातब्बं दोमनस्सं आरब्भ दस्सनेन पहातब्बं दोमनस्सं उप्पज्जति, दिट्ठि उप्पज्जति, विचिकिच्छा उप्पज्जति. (१)

दस्सनेन पहातब्बो धम्मो नदस्सनेन पहातब्बस्स धम्मस्स आरम्मणपच्चयेन पच्चयो – अरिया दस्सनेन पहातब्बे पहीने किलेसे पच्चवेक्खन्ति, पुब्बे समुदाचिण्णे…पे… दस्सनेन पहातब्बे खन्धे अनिच्चतो…पे… विपस्सति, चेतोपरियञाणेन दस्सनेन पहातब्बचित्तसमङ्गिस्स चित्तं जानाति, दस्सनेन पहातब्बा खन्धा चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

१५. नदस्सनेन पहातब्बो धम्मो नदस्सनेन पहातब्बस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं पच्चवेक्खति अस्सादेति अभिनन्दति, तं आरब्भ नदस्सनेन पहातब्बो रागो उप्पज्जति; उद्धच्चं…पे… नदस्सनेन पहातब्बं दोमनस्सं उप्पज्जति, पुब्बे सुचिण्णानि…पे… झाना …पे… अरिया मग्गा वुट्ठहित्वा मग्गं पच्चवेक्खन्ति…पे… फलस्स आवज्जनाय आरम्मणपच्चयेन पच्चयो; अरिया नदस्सनेन पहातब्बे पहीने किलेसे पच्चवेक्खन्ति, विक्खम्भिते किलेसे…पे… पुब्बे…पे… चक्खुं…पे… वत्थुं नदस्सनेन पहातब्बे खन्धे अनिच्चतो…पे… विपस्सति अस्सादेति अभिनन्दति, तं आरब्भ नदस्सनेन पहातब्बो रागो उप्पज्जति, उद्धच्चं…पे… नदस्सनेन पहातब्बं दोमनस्सं उप्पज्जति; दिब्बेन चक्खुना रूपं पस्सति…पे… अनागतंसञाणस्स, आवज्जनाय आरम्मणपच्चयेन पच्चयो. (१)

नदस्सनेन पहातब्बो धम्मो दस्सनेन पहातब्बस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं…पे… पुब्बे…पे… झाना…पे… चक्खुं …पे… वत्थुं नदस्सनेन पहातब्बे खन्धे अस्सादेति अभिनन्दति, तं आरब्भ दस्सनेन पहातब्बो रागो उप्पज्जति, दिट्ठि…पे… विचिकिच्छा…पे… दस्सनेन पहातब्बं दोमनस्सं उप्पज्जति. (२)

अधिपतिपच्चयो

१६. दस्सनेन पहातब्बो धम्मो दस्सनेन पहातब्बस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दस्सनेन पहातब्बं रागं गरुं कत्वा अस्सादेति अभिनन्दति, तं गरुं कत्वा दस्सनेन पहातब्बो रागो उप्पज्जति, दिट्ठि उप्पज्जति, दिट्ठिं गरुं कत्वा…पे…. सहजाताधिपति – दस्सनेन पहातब्बाधिपति सम्पयुत्तकानं खन्धानं अधिपतिपच्चयेन पच्चयो. (१)

दस्सनेन पहातब्बो धम्मो नदस्सनेन पहातब्बस्स धम्मस्स अधिपतिपच्चयेन पच्चयो. सहजाताधिपति – दस्सनेन पहातब्बाधिपति चित्तसमुट्ठानानं रूपानं अधिपतिपच्चयेन पच्चयो. (२)

दस्सनेन पहातब्बो धम्मो दस्सनेन पहातब्बस्स च नदस्सनेन पहातब्बस्स च धम्मस्स अधिपतिपच्चयेन पच्चयो. सहजाताधिपति – दस्सनेन पहातब्बाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

१७. नदस्सनेन पहातब्बो धम्मो नदस्सनेन पहातब्बस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं…पे… पुब्बे…पे… झाना वुट्ठहित्वा झानं गरुं कत्वा पच्चवेक्खति, अस्सादेति अभिनन्दति, तं गरुं कत्वा नदस्सनेन पहातब्बो रागो उप्पज्जति, अरिया मग्गा वुट्ठहित्वा मग्गं गरुं कत्वा…पे… फलस्स अधिपतिपच्चयेन पच्चयो; चक्खुं…पे… वत्थुं नदस्सनेन पहातब्बे खन्धे गरुं कत्वा अस्सादेति अभिनन्दति, तं गरुं कत्वा नदस्सनेन पहातब्बो रागो उप्पज्जति. सहजाताधिपति – नदस्सनेन पहातब्बाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

नदस्सनेन पहातब्बो धम्मो दस्सनेन पहातब्बस्स धम्मस्स अधिपतिपच्चयेन पच्चयो. आरम्मणाधिपति – दानं दत्वा…पे… झानं…पे… चक्खुं…पे… वत्थुं नदस्सनेन पहातब्बे खन्धे गरुं कत्वा अस्सादेति अभिनन्दति, तं गरुं कत्वा दस्सनेन पहातब्बो रागो उप्पज्जति, दिट्ठि उप्पज्जति. (२)

अनन्तरपच्चयो

१८. दस्सनेन पहातब्बो धम्मो दस्सनेन पहातब्बस्स धम्मस्स अनन्तरपच्चयेन पच्चयो – पुरिमा पुरिमा दस्सनेन पहातब्बा खन्धा पच्छिमानं पच्छिमानं दस्सनेन पहातब्बानं खन्धानं अनन्तरपच्चयेन पच्चयो. (१)

दस्सनेन पहातब्बो धम्मो नदस्सनेन पहातब्बस्स धम्मस्स अनन्तरपच्चयेन पच्चयो – दस्सनेन पहातब्बा खन्धा वुट्ठानस्स अनन्तरपच्चयेन पच्चयो. (मूलं कातब्बं.) पुरिमा पुरिमा नदस्सनेन पहातब्बा खन्धा…पे… फलसमापत्तिया अनन्तरपच्चयेन पच्चयो. (मूलं कातब्बं.) आवज्जना दस्सनेन पहातब्बानं खन्धानं अनन्तरपच्चयेन पच्चयो. (२)

समनन्तरपच्चयेन पच्चयो… सहजातपच्चयेन पच्चयो… पञ्च… अञ्ञमञ्ञपच्चयेन पच्चयो… द्वे… निस्सयपच्चयेन पच्चयो… सत्त.

उपनिस्सयपच्चयो

१९. दस्सनेन पहातब्बो धम्मो दस्सनेन पहातब्बस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – दस्सनेन पहातब्बं रागं उपनिस्साय पाणं हनति…पे… सङ्घं भिन्दति; दस्सनेन पहातब्बं दोसं… मोहं… दिट्ठिं… पत्थनं उपनिस्साय पाणं हनति…पे… सङ्घं भिन्दति; दस्सनेन पहातब्बो रागो…पे… पत्थना दस्सनेन पहातब्बस्स रागस्स…पे… पत्थनाय उपनिस्सयपच्चयेन पच्चयो. (२)

दस्सनेन पहातब्बो धम्मो नदस्सनेन पहातब्बस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – दस्सनेन पहातब्बं रागं उपनिस्साय दानं देति…पे… समापत्तिं उप्पादेति दस्सनेन पहातब्बं दोसं… मोहं… दिट्ठिं… पत्थनं उपनिस्साय दानं देति…पे… समापत्तिं उप्पादेति; दस्सनेन पहातब्बो रागो…पे… पत्थना सद्धाय…पे… पञ्ञाय नदस्सनेन पहातब्बस्स रागस्स… दोसस्स… मोहस्स… मानस्स … पत्थनाय… कायिकस्स सुखस्स…पे… फलसमापत्तिया उपनिस्सयपच्चयेन पच्चयो. (२)

२०. नदस्सनेन पहातब्बो धम्मो नदस्सनेन पहातब्बस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… समापत्तिं उप्पादेति, मानं जप्पेति; सीलं…पे… पञ्ञं, नदस्सनेन पहातब्बं रागं… दोसं… मोहं… मानं… पत्थनं… कायिकं सुखं…पे… सेनासनं उपनिस्साय दानं देति…पे… समापत्तिं उप्पादेति, मानं जप्पेति; सद्धा…पे… पञ्ञा, नदस्सनेन पहातब्बो रागो…पे… पत्थना… कायिकं सुखं…पे… सेनासनं सद्धाय…पे… पञ्ञाय नदस्सनेन पहातब्बस्स रागस्स…पे… पत्थनाय… कायिकस्स सुखस्स… कायिकस्स दुक्खस्स… मग्गस्स, फलसमापत्तिया उपनिस्सयपच्चयेन पच्चयो. (२)

नदस्सनेन पहातब्बो धम्मो दस्सनेन पहातब्बस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दिट्ठिं गण्हाति; सीलं…पे… पञ्ञं उपनिस्साय दिट्ठिं गण्हाति, नदस्सनेन पहातब्बं रागं… दोसं… मोहं… मानं… पत्थनं… कायिकं सुखं…पे… सेनासनं उपनिस्साय पाणं हनति…पे… सङ्घं भिन्दति; सद्धा…पे… सेनासनं दस्सनेन पहातब्बस्स रागस्स… दोसस्स… मोहस्स… दिट्ठिया… पत्थनाय उपनिस्सयपच्चयेन पच्चयो. (२)

पुरेजातपच्चयो

२१. नदस्सनेन पहातब्बो धम्मो नदस्सनेन पहातब्बस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… विपस्सति अस्सादेति अभिनन्दति, तं आरब्भ नदस्सनेन पहातब्बो रागो …पे… उद्धच्चं…पे… नदस्सनेन पहातब्बं दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स …पे… कायायतनं कायविञ्ञाणस्स…पे… वत्थु नदस्सनेन पहातब्बानं खन्धानं पुरेजातपच्चयेन पच्चयो. (१)

नदस्सनेन पहातब्बो धम्मो दस्सनेन पहातब्बस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अस्सादेति अभिनन्दति, तं आरब्भ दस्सनेन पहातब्बो रागो…पे… दिट्ठि…पे… विचिकिच्छा…पे… दस्सनेन पहातब्बं दोमनस्सं उप्पज्जति. वत्थुपुरेजातं – वत्थु दस्सनेन पहातब्बानं खन्धानं पुरेजातपच्चयेन पच्चयो. (२)

पच्छाजातासेवनपच्चया

२२. दस्सनेन पहातब्बो धम्मो नदस्सनेन पहातब्बस्स धम्मस्स पच्छाजातपच्चयेन पच्चयो (संखित्तं). (१)

नदस्सनेन पहातब्बो धम्मो नदस्सनेन पहातब्बस्स धम्मस्स पच्छाजातपच्चयेन पच्चयो (संखित्तं)… आसेवनपच्चयेन पच्चयो… द्वे.

कम्मपच्चयो

२३. दस्सनेन पहातब्बो धम्मो दस्सनेन पहातब्बस्स धम्मस्स कम्मपच्चयेन पच्चयो – दस्सनेन पहातब्बा चेतना सम्पयुत्तकानं खन्धानं कम्मपच्चयेन पच्चयो. (१)

दस्सनेन पहातब्बो धम्मो नदस्सनेन पहातब्बस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – दस्सनेन पहातब्बा चेतना चित्तसमुट्ठानानं रूपानं कम्मपच्चयेन पच्चयो. नानाक्खणिका – दस्सनेन पहातब्बा चेतना विपाकानं खन्धानं कटत्ता च रूपानं कम्मपच्चयेन पच्चयो. (२)

दस्सनेन पहातब्बो धम्मो दस्सनेन पहातब्बस्स च नदस्सनेन पहातब्बस्स च धम्मस्स कम्मपच्चयेन पच्चयो – दस्सनेन पहातब्बा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

२४. नदस्सनेन पहातब्बो धम्मो नदस्सनेन पहातब्बस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – नदस्सनेन पहातब्बा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – नदस्सनेन पहातब्बा चेतना विपाकानं खन्धानं कटत्ता च रूपानं कम्मपच्चयेन पच्चयो.

विपाकपच्चयादि

२५. नदस्सनेन पहातब्बो धम्मो नदस्सनेन पहातब्बस्स धम्मस्स विपाकपच्चयेन पच्चयो… एकं… आहारपच्चयेन पच्चयो… चत्तारि… इन्द्रियपच्चयेन पच्चयो… चत्तारि… झानपच्चयेन पच्चयो… चत्तारि… मग्गपच्चयेन पच्चयो… चत्तारि… सम्पयुत्तपच्चयेन पच्चयो… द्वे.

विप्पयुत्तपच्चयो

२६. दस्सनेन पहातब्बो धम्मो नदस्सनेन पहातब्बस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)

नदस्सनेन पहातब्बो धम्मो नदस्सनेन पहातब्बस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं (संखित्तं).

नदस्सनेन पहातब्बो धम्मो दस्सनेन पहातब्बस्स धम्मस्स विप्पयुत्तपच्चयेन पच्चयो. पुरेजातं – वत्थु दस्सनेन पहातब्बानं खन्धानं विप्पयुत्तपच्चयेन पच्चयो. (२)

अत्थिपच्चयादि

२७. दस्सनेन पहातब्बो धम्मो दस्सनेन पहातब्बस्स धम्मस्स अत्थिपच्चयेन पच्चयो (पटिच्चसदिसं). दस्सनेन पहातब्बो धम्मो नदस्सनेन पहातब्बस्स धम्मस्स अत्थिपच्चयेन पच्चयो – सहजातं, पच्छाजातं (संखित्तं). दस्सनेन पहातब्बो धम्मो दस्सनेन पहातब्बस्स च नदस्सनेन पहातब्बस्स च धम्मस्स अत्थिपच्चयेन पच्चयो (पटिच्चवारसदिसा). (३)

नदस्सनेन पहातब्बो धम्मो नदस्सनेन पहातब्बस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं). नदस्सनेन पहातब्बो धम्मो दस्सनेन पहातब्बस्स धम्मस्स अत्थिपच्चयेन पच्चयो. पुरेजातं – चक्खुं…पे… (संखित्तं, पुरेजातसदिसं). (२)

२८. दस्सनेन पहातब्बो च नदस्सनेन पहातब्बो च धम्मा दस्सनेन पहातब्बस्स धम्मस्स अत्थिपच्चयेन पच्चयो – सहजातं, पुरेजातं. सहजातो – दस्सनेन पहातब्बो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे…. (१)

दस्सनेन पहातब्बो च नदस्सनेन पहातब्बो च धम्मा नदस्सनेन पहातब्बस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – दस्सनेन पहातब्बा खन्धा च महाभूता च चित्तसमुट्ठानानं रूपानं अत्थिपच्चयेन पच्चयो. पच्छाजाता – दस्सनेन पहातब्बा खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – दस्सनेन पहातब्बा खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)

नत्थिपच्चयेन पच्चयो, विगतपच्चयेन पच्चयो, अविगतपच्चयेन पच्चयो.