१. विभङ्गवारो

नहेतुपच्चयो

९. दस्सनेन पहातब्बं धम्मं पच्चया दस्सनेन पहातब्बो धम्मो उप्पज्जति नहेतुपच्चया – विचिकिच्छासहगते खन्धे पच्चया विचिकिच्छासहगतो मोहो. (१)

नदस्सनेन पहातब्बं धम्मं पच्चया नदस्सनेन पहातब्बो धम्मो उप्पज्जति नहेतुपच्चया – अहेतुकं नदस्सनेन पहातब्बं एकं खन्धं पच्चया तयो खन्धा चित्तसमुट्ठानञ्च रूपं …पे… द्वे खन्धे…पे… (याव असञ्ञसत्ता) चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं; वत्थुं पच्चया अहेतुका नदस्सनेन पहातब्बा खन्धा, उद्धच्चसहगते खन्धे पच्चया उद्धच्चसहगतो मोहो, वत्थुं पच्चया उद्धच्चसहगतो मोहो. (१)

नदस्सनेन पहातब्बं धम्मं पच्चया दस्सनेन पहातब्बो धम्मो उप्पज्जति नहेतुपच्चया – वत्थुं पच्चया विचिकिच्छासहगतो मोहो. (२)

दस्सनेन पहातब्बञ्च नदस्सनेन पहातब्बञ्च धम्मं पच्चया दस्सनेन पहातब्बो धम्मो उप्पज्जति नहेतुपच्चया – विचिकिच्छासहगते खन्धे च वत्थुञ्च पच्चया विचिकिच्छासहगतो मोहो. (१)