१. विभङ्गवारो

हेतुपच्चयो

५. दस्सनेन पहातब्बं धम्मं पच्चया दस्सनेन पहातब्बो धम्मो उप्पज्जति हेतुपच्चया… तीणि (पटिच्चसदिसा).

६. नदस्सनेन पहातब्बं धम्मं पच्चया नदस्सनेन पहातब्बो धम्मो उप्पज्जति हेतुपच्चया – नदस्सनेन पहातब्बं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… (याव अज्झत्तिका महाभूता) वत्थुं पच्चया नदस्सनेन पहातब्बा खन्धा. (१)

नदस्सनेन पहातब्बं धम्मं पच्चया दस्सनेन पहातब्बो धम्मो उप्पज्जति हेतुपच्चया – वत्थुं पच्चया दस्सनेन पहातब्बा खन्धा. (२)

नदस्सनेन पहातब्बं धम्मं पच्चया दस्सनेन पहातब्बो च नदस्सनेन पहातब्बो च धम्मा उप्पज्जन्ति हेतुपच्चया – वत्थुं पच्चया दस्सनेन पहातब्बा खन्धा, महाभूते पच्चया चित्तसमुट्ठानं. (३)

७. दस्सनेन पहातब्बञ्च नदस्सनेन पहातब्बञ्च धम्मं पच्चया दस्सनेन पहातब्बो धम्मो उप्पज्जति हेतुपच्चया – दस्सनेन पहातब्बं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे…. (१)

दस्सनेन पहातब्बञ्च नदस्सनेन पहातब्बञ्च धम्मं पच्चया नदस्सनेन पहातब्बो धम्मो उप्पज्जति हेतुपच्चया – दस्सनेन पहातब्बे खन्धे च महाभूते च पच्चया चित्तसमुट्ठानं रूपं. (२)

दस्सनेन पहातब्बञ्च नदस्सनेन पहातब्बञ्च धम्मं पच्चया दस्सनेन पहातब्बो च नदस्सनेन पहातब्बो च धम्मा उप्पज्जन्ति हेतुपच्चया – दस्सनेन पहातब्बं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… दस्सनेन पहातब्बे खन्धे च महाभूते च पच्चया चित्तसमुट्ठानं रूपं. (३)