१-७. पटिच्चवारादि

पच्चयचतुक्कं

१८. अब्याकतं अज्झत्तिकं धम्मं पटिच्च अब्याकतो अज्झत्तिको धम्मो उप्पज्जति हेतुपच्चया (संखित्तं).

हेतुया एकं, सहजाते एकं…पे… अविगते एकं (संखित्तं).

(सहजातवारम्पि…पे… सम्पयुत्तवारम्पि पटिच्चवारसदिसं.)

१९. कुसलो अज्झत्तिको धम्मो कुसलस्स अज्झत्तिकस्स धम्मस्स आरम्मणपच्चयेन पच्चयो. कुसलो अज्झत्तिको धम्मो अकुसलस्स अज्झत्तिकस्स धम्मस्स आरम्मणपच्चयेन पच्चयो. कुसलो अज्झत्तिको धम्मो अब्याकतस्स अज्झत्तिकस्स धम्मस्स आरम्मणपच्चयेन पच्चयो. (३)

अकुसलो अज्झत्तिको धम्मो अकुसलस्स अज्झत्तिकस्स धम्मस्स आरम्मणपच्चयेन पच्चयो… तीणि.

अब्याकतो अज्झत्तिको धम्मो अब्याकतस्स अज्झत्तिकस्स धम्मस्स आरम्मणपच्चयेन पच्चयो… तीणि (संखित्तं).

२०. आरम्मणे नव, पुरेजाते तीणि…पे… अविगते पञ्च (संखित्तं. यथा कुसलत्तिके पञ्हावारं, एवं वित्थारेतब्बं).

२१. कुसलं बाहिरं धम्मं पटिच्च कुसलो बाहिरो धम्मो उप्पज्जति हेतुपच्चया (संखित्तं).

हेतुया नव, आरम्मणे तीणि…पे… विपाके एकं…पे… अविगते नव (संखित्तं. सहजातवारम्पि…पे… सम्पयुत्तवारम्पि पटिच्चवारसदिसं).

२२. कुसलो बाहिरो धम्मो कुसलस्स बाहिरस्स धम्मस्स हेतुपच्चयेन पच्चयो (संखित्तं).

हेतुया सत्त, आरम्मणे नव…पे… अविगते तेरस (संखित्तं).

(यथा कुसलत्तिके पञ्हावारं, एवं वित्थारेतब्बं.)