१-७. पटिच्चवारादि

पच्चयचतुक्कं

२४. अकुसलं आसवञ्चेव आसवसम्पयुत्तञ्च धम्मं पटिच्च अकुसलो आसवो चेव आसवसम्पयुत्तो च धम्मो उप्पज्जति हेतुपच्चया (संखित्तं).

हेतुया एकं, आरम्मणे एकं…पे… अविगते एकं (संखित्तं).

(सहजातवारेपि…पे… सम्पयुत्तवारेपि पञ्हावारेपि सब्बत्थ एकं).

२५. अकुसलं आसवसम्पयुत्तञ्चेव नो च आसवं धम्मं पटिच्च अकुसलो आसवसम्पयुत्तो चेव नो च आसवो धम्मो उप्पज्जति हेतुपच्चया (संखित्तं).

हेतुया एकं, आरम्मणे एकं…पे… अविगते एकं (संखित्तं).

(सहजातवारेपि…पे… सम्पयुत्तवारेपि पञ्हावारेपि सब्बत्थ एकं.)

२६. कुसलं आसवविप्पयुत्तं सासवं धम्मं पटिच्च कुसलो आसवविप्पयुत्तो सासवो धम्मो उप्पज्जति हेतुपच्चया… तीणि.

अकुसलं आसवविप्पयुत्तं सासवं धम्मं पटिच्च अब्याकतो आसवविप्पयुत्तो सासवो धम्मो उप्पज्जति हेतुपच्चया. (१)

अब्याकतं आसवविप्पयुत्तं सासवं धम्मं पटिच्च अब्याकतो आसवविप्पयुत्तो सासवो धम्मो उप्पज्जति हेतुपच्चया. (१)

कुसलं आसवविप्पयुत्तं सासवञ्च अब्याकतं आसवविप्पयुत्तं सासवञ्च धम्मं पटिच्च अब्याकतो आसवविप्पयुत्तो सासवो धम्मो उप्पज्जति हेतुपच्चया. (१)

अकुसलं आसवविप्पयुत्तं सासवञ्च अब्याकतं आसवविप्पयुत्तं सासवञ्च धम्मं पटिच्च अब्याकतो आसवविप्पयुत्तो सासवो धम्मो उप्पज्जति हेतुपच्चया. (१) (संखित्तं.)

२७. हेतुया सत्त, आरम्मणे द्वे…पे… अविगते सत्त (संखित्तं. सहजातवारम्पि…पे… सम्पयुत्तवारम्पि पटिच्चवारसदिसं).

२८. कुसलो आसवविप्पयुत्तो सासवो धम्मो कुसलस्स आसवविप्पयुत्तस्स सासवस्स धम्मस्स हेतुपच्चयेन पच्चयो… तीणि.

अकुसलो आसवविप्पयुत्तो सासवो धम्मो अब्याकतस्स आसवविप्पयुत्तस्स सासवस्स धम्मस्स हेतुपच्चयेन पच्चयो. (१)

अब्याकतो आसवविप्पयुत्तो सासवो धम्मो अब्याकतस्स आसवविप्पयुत्तस्स सासवस्स धम्मस्स हेतुपच्चयेन पच्चयो (संखित्तं).

२९. हेतुया पञ्च, आरम्मणे नव, अधिपतिया चत्तारि…पे… अविगते दस (संखित्तं. यथा कुसलत्तिके पञ्हावारं, एवं वित्थारेतब्बं).