१-७. पटिच्चवारादि

पच्चयचतुक्कं

४५. सरणं परित्तारम्मणं धम्मं पटिच्च सरणो परित्तारम्मणो धम्मो उप्पज्जति हेतुपच्चया. (१)

अरणं परित्तारम्मणं धम्मं पटिच्च अरणो परित्तारम्मणो धम्मो उप्पज्जति हेतुपच्चया. (१) (संखित्तं.)

हेतुया द्वे, आरम्मणे द्वे…पे… अविगते द्वे. (संखित्तं.) (सहजातवारोपि …पे… पञ्हावारोपि सब्बत्थ वित्थारेतब्बा.)

४६. सरणं महग्गतारम्मणं धम्मं पटिच्च सरणो महग्गतारम्मणो धम्मो उप्पज्जति हेतुपच्चया. (१)

अरणं महग्गतारम्मणं धम्मं पटिच्च अरणो महग्गतारम्मणो धम्मो उप्पज्जति हेतुपच्चया. (१) (संखित्तं.)

हेतुया द्वे, आरम्मणे द्वे…पे… अविगते द्वे. (संखित्तं.) (सहजातवारोपि…पे… पञ्हावारोपि वित्थारेतब्बा.)

४७. अरणं अप्पमाणारम्मणं धम्मं पटिच्च अरणो अप्पमाणारम्मणो धम्मो उप्पज्जति हेतुपच्चया (संखित्तं).

हेतुया एकं, आरम्मणे एकं…पे… अविगते एकं. (संखित्तं.) (सहजातवारेपि…पे… पञ्हावारेपि सब्बत्थ एकं.)