१-७. पटिच्चवारादि

पच्चयचतुक्कं

१. सरणं सुखाय वेदनाय सम्पयुत्तं धम्मं पटिच्च सरणो सुखाय वेदनाय सम्पयुत्तो धम्मो उप्पज्जति हेतुपच्चया. (१)

अरणं सुखाय वेदनाय सम्पयुत्तं धम्मं पटिच्च अरणो सुखाय वेदनाय सम्पयुत्तो धम्मो उप्पज्जति हेतुपच्चया. (१) (संखित्तं.)

२. हेतुया द्वे, आरम्मणे द्वे…पे… कम्मे द्वे, विपाके एकं…पे… अविगते द्वे (संखित्तं. सहजातवारोपि…पे… पञ्हावारोपि सब्बत्थ वित्थारेतब्बा).

३. सरणं दुक्खाय वेदनाय सम्पयुत्तं धम्मं पटिच्च सरणो दुक्खाय वेदनाय सम्पयुत्तो धम्मो उप्पज्जति हेतुपच्चया. (१)

सरणं दुक्खाय वेदनाय सम्पयुत्तं धम्मं पटिच्च सरणो दुक्खाय वेदनाय सम्पयुत्तो धम्मो उप्पज्जति आरम्मणपच्चया. (१) (संखित्तं.)

४. हेतुया एकं, आरम्मणे द्वे…पे… अविगते द्वे (संखित्तं. सहजातवारम्पि…पे… पञ्हावारम्पि वित्थारेतब्बं).

५. सरणं अदुक्खमसुखाय वेदनाय सम्पयुत्तं धम्मं पटिच्च सरणो अदुक्खमसुखाय वेदनाय सम्पयुत्तो धम्मो उप्पज्जति हेतुपच्चया. (१)

अरणं अदुक्खमसुखाय वेदनाय सम्पयुत्तं धम्मं पटिच्च अरणो अदुक्खमसुखाय वेदनाय सम्पयुत्तो धम्मो उप्पज्जति हेतुपच्चया (संखित्तं).

६. हेतुया द्वे, आरम्मणे द्वे…पे… अविगते द्वे (संखित्तं. सहजातवारम्पि…पे… पञ्हावारम्पि सब्बत्थ वित्थारेतब्बं).

सरणदुकवेदनात्तिकं निट्ठितं.