१-६. पटिच्चवारादि

पच्चयचतुक्कं

२३. सवितक्कं कुसलं धम्मं पटिच्च सवितक्को कुसलो धम्मो उप्पज्जति हेतुपच्चया. सवितक्कं कुसलं धम्मं पटिच्च अवितक्को कुसलो धम्मो उप्पज्जति हेतुपच्चया. सवितक्कं कुसलं धम्मं पटिच्च सवितक्को कुसलो च अवितक्को कुसलो च धम्मा उप्पज्जन्ति हेतुपच्चया. (३)

अवितक्कं कुसलं धम्मं पटिच्च अवितक्को कुसलो धम्मो उप्पज्जति हेतुपच्चया. अवितक्कं कुसलं धम्मं पटिच्च सवितक्को कुसलो धम्मो उप्पज्जति हेतुपच्चया. (२)

सवितक्कं कुसलञ्च अवितक्कं कुसलञ्च धम्मं पटिच्च सवितक्को कुसलो धम्मो उप्पज्जति हेतुपच्चया. (१) (संखित्तं.)

२४. हेतुया छ, आरम्मणे छ (सब्बत्थ छ), अविगते छ (संखित्तं).

नअधिपतिया छ, नपुरेजाते छ…पे… नकम्मे चत्तारि…पे… नविप्पयुत्ते छ (संखित्तं. सहजातवारम्पि…पे… सम्पयुत्तवारम्पि वित्थारेतब्बं).