१-७. पटिच्चवारादि

पच्चयचतुक्कं

७१. रूपावचरं कुसलं धम्मं पटिच्च रूपावचरो कुसलो धम्मो उप्पज्जति हेतुपच्चया. (१)

नरूपावचरं कुसलं धम्मं पटिच्च नरूपावचरो कुसलो धम्मो उप्पज्जति हेतुपच्चया. (१) (संखित्तं.)

७२. हेतुया द्वे, आरम्मणे द्वे (सब्बत्थ द्वे, संखित्तं).

नअधिपतिया द्वे…पे… नपुरेजाते एकं, नआसेवने एकं…पे… नविप्पयुत्ते एकं (संखित्तं. सहजातवारादि वित्थारेतब्बो).

७३. रूपावचरो कुसलो धम्मो रूपावचरस्स कुसलस्स धम्मस्स हेतुपच्चयेन पच्चयो. (१)

नरूपावचरो कुसलो धम्मो नरूपावचरस्स कुसलस्स धम्मस्स हेतुपच्चयेन पच्चयो. (१) (संखित्तं.)

७४. हेतुया द्वे, आरम्मणे चत्तारि, अधिपतिया तीणि (रूपावचरे एकं, सहजाताधिपतियेव, नरूपावचरे द्वे), अनन्तरे तीणि (रूपावचरे एकं, नरूपावचरे द्वे), समनन्तरे तीणि, सहजाते द्वे…पे… उपनिस्सये चत्तारि, आसेवने तीणि, कम्मे द्वे…पे… अत्थिया द्वे, नत्थिया तीणि…पे… अविगते द्वे (संखित्तं).

७५. नरूपावचरं अकुसलं धम्मं पटिच्च नरूपावचरो अकुसलो धम्मो उप्पज्जति हेतुपच्चया (सब्बत्थ एकं).

रूपावचरं अब्याकतं धम्मं पटिच्च रूपावचरो अब्याकतो धम्मो उप्पज्जति हेतुपच्चया… तीणि.

नरूपावचरं अब्याकतं धम्मं पटिच्च नरूपावचरो अब्याकतो धम्मो उप्पज्जति हेतुपच्चया… तीणि.

रूपावचरं अब्याकतञ्च नरूपावचरं अब्याकतञ्च धम्मं पटिच्च रूपावचरो अब्याकतो धम्मो उप्पज्जति हेतुपच्चया… तीणि (संखित्तं).

७६. हेतुया नव, आरम्मणे चत्तारि, अधिपतिया पञ्च…पे… पुरेजाते आसेवने द्वे…पे… अविगते नव (संखित्तं. यथा कामावचरदुकअब्याकतसदिसं, एत्तकायेव पञ्हा हेट्ठुपरिकं परिवत्तन्ति. सहजातवारम्पि…पे… पञ्हावारम्पि सब्बत्थ वित्थारेतब्बं).