१-७. पटिच्चवारादि

पच्चयचतुक्कं

४५. सप्पीतिकं कुसलं धम्मं पटिच्च सप्पीतिको कुसलो धम्मो उप्पज्जति हेतुपच्चया. सप्पीतिकं कुसलं धम्मं पटिच्च अप्पीतिको कुसलो धम्मो उप्पज्जति हेतुपच्चया. सप्पीतिकं कुसलं धम्मं पटिच्च सप्पीतिको कुसलो च अप्पीतिको कुसलो च धम्मा उप्पज्जन्ति हेतुपच्चया. (३)

अप्पीतिकं कुसलं धम्मं पटिच्च अप्पीतिको कुसलो धम्मो उप्पज्जति हेतुपच्चया. अप्पीतिकं कुसलं धम्मं पटिच्च सप्पीतिको कुसलो धम्मो उप्पज्जति हेतुपच्चया. (२)

सप्पीतिकं कुसलञ्च अप्पीतिकं कुसलञ्च धम्मं पटिच्च सप्पीतिको कुसलो धम्मो उप्पज्जति हेतुपच्चया. (१) (संखित्तं.)

४६. हेतुया छ (सब्बत्थ छ)…पे… अविगते छ (संखित्तं).

नअधिपतिया छ, नपुरेजाते छ…पे… नकम्मे चत्तारि, नविप्पयुत्ते छ (संखित्तं. सहजातवारम्पि …पे… सम्पयुत्तवारम्पि वित्थारेतब्बं).

४७. सप्पीतिको कुसलो धम्मो सप्पीतिकस्स कुसलस्स धम्मस्स हेतुपच्चयेन पच्चयो… तीणि.

अप्पीतिको कुसलो धम्मो अप्पीतिकस्स कुसलस्स धम्मस्स हेतुपच्चयेन पच्चयो. (१)

सप्पीतिको कुसलो धम्मो सप्पीतिकस्स कुसलस्स धम्मस्स आरम्मणपच्चयेन पच्चयो (संखित्तं).

४८. हेतुया चत्तारि, आरम्मणे नव, अधिपतिया नव (चत्तारि सहजाताधिपति), अनन्तरे नव, समनन्तरे नव, सहजाते छ…पे… उपनिस्सये नव, आसेवने नव, कम्मे चत्तारि, आहारे चत्तारि, इन्द्रिये चत्तारि, झाने छ, मग्गे चत्तारि, सम्पयुत्ते छ, अत्थिया छ, नत्थिया नव, विगते नव, अविगते छ (संखित्तं).

नहेतुया नव, नआरम्मणे नव (संखित्तं).

हेतुपच्चया नआरम्मणे चत्तारि (संखित्तं).

नहेतुपच्चया आरम्मणे नव (संखित्तं).

(यथा कुसलत्तिके पञ्हावारं, एवं वित्थारेतब्बं.)

अकुसलपदं

हेतुपच्चयो

४९. सप्पीतिकं अकुसलं धम्मं पटिच्च सप्पीतिको अकुसलो धम्मो उप्पज्जति हेतुपच्चया… तीणि.

अप्पीतिकं अकुसलं धम्मं पटिच्च अप्पीतिको अकुसलो धम्मो उप्पज्जति हेतुपच्चया… द्वे.

सप्पीतिकं अकुसलञ्च अप्पीतिकं अकुसलञ्च धम्मं पटिच्च सप्पीतिको अकुसलो धम्मो उप्पज्जति हेतुपच्चया. (१) (संखित्तं.)

५०. हेतुया छ, आरम्मणे छ…पे… अविगते छ (संखित्तं. कुसलसदिसं. सहजातवारोपि…पे… पञ्हावारोपि वित्थारेतब्बा).

अब्याकतपदं

हेतुपच्चयो

५१. सप्पीतिकं अब्याकतं धम्मं पटिच्च सप्पीतिको अब्याकतो धम्मो उप्पज्जति हेतुपच्चया… तीणि.

अप्पीतिकं अब्याकतं धम्मं पटिच्च अप्पीतिको अब्याकतो धम्मो उप्पज्जति हेतुपच्चया… तीणि.

सप्पीतिकं अब्याकतञ्च अप्पीतिकं अब्याकतञ्च धम्मं पटिच्च सप्पीतिको अब्याकतो धम्मो उप्पज्जति हेतुपच्चया… तीणि (संखित्तं).

५२. हेतुया नव, आरम्मणे नव…पे… पुरेजाते छ, आसेवने छ…पे… अविगते नव (संखित्तं).

नहेतुया नव, नआरम्मणे तीणि, नअधिपतिया नव…पे… नकम्मे चत्तारि, नविपाके नव, नआहारे एकं, नइन्द्रिये एकं, नझाने एकं, नमग्गे नव, नसम्पयुत्ते तीणि, नविप्पयुत्ते छ…पे… (संखित्तं. सहजातवारादि वित्थारेतब्बो).

५३. सप्पीतिको अब्याकतो धम्मो सप्पीतिकस्स अब्याकतस्स धम्मस्स हेतुपच्चयेन पच्चयो (संखित्तं).

५४. हेतुया चत्तारि, आरम्मणे नव, अधिपतिया नव, अनन्तरे नव…पे… (सब्बत्थ नव), उपनिस्सये नव, पुरेजाते तीणि, पच्छाजाते तीणि, आसेवने नव, कम्मे चत्तारि, विपाके नव, आहारे चत्तारि, इन्द्रिये चत्तारि, झाने नव, मग्गे चत्तारि, सम्पयुत्ते छ, विप्पयुत्ते पञ्च, अत्थिया नव…पे… अविगते नव (संखित्तं).