१-७. पटिच्चवारादि

पच्चयचतुक्कं

हेतुपच्चयो

१. नोकिलेसं कुसलं धम्मं पटिच्च नोकिलेसो कुसलो धम्मो उप्पज्जति हेतुपच्चया (संखित्तं).

हेतुया एकं, आरम्मणे एकं…पे… अविगते एकं (संखित्तं).

(सहजातवारेपि…पे… पञ्हावारेपि सब्बत्थ एकं.)

२. किलेसं अकुसलं धम्मं पटिच्च किलेसो अकुसलो धम्मो उप्पज्जति हेतुपच्चया… तीणि.

नोकिलेसं अकुसलं धम्मं पटिच्च नोकिलेसो अकुसलो धम्मो उप्पज्जति हेतुपच्चया… तीणि.

किलेसं अकुसलञ्च नोकिलेसं अकुसलञ्च धम्मं पटिच्च किलेसो अकुसलो धम्मो उप्पज्जति हेतुपच्चया… तीणि (संखित्तं).

३. हेतुया नव, आरम्मणे नव (सब्बत्थ नव), अविगते नव (संखित्तं).

४. किलेसं अकुसलं धम्मं पटिच्च किलेसो अकुसलो धम्मो उप्पज्जति नहेतुपच्चया – विचिकिच्छं पटिच्च विचिकिच्छासहगतो मोहो, उद्धच्चं पटिच्च उद्धच्चसहगतो मोहो (१).

नोकिलेसं अकुसलं धम्मं पटिच्च किलेसो अकुसलो धम्मो उप्पज्जति नहेतुपच्चया – विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

किलेसं अकुसलञ्च नोकिलेसं अकुसलञ्च धम्मं पटिच्च किलेसो अकुसलो धम्मो उप्पज्जति नहेतुपच्चया – विचिकिच्छासहगते खन्धे च विचिकिच्छञ्च पटिच्च विचिकिच्छासहगतो मोहो, उद्धच्चसहगते खन्धे च उद्धच्चञ्च पटिच्च उद्धच्चसहगतो मोहो. (१) (संखित्तं.)

५. नहेतुया तीणि, नअधिपतिया नव, नपुरेजाते नव, नपच्छाजाते नव, नआसेवने नव, नकम्मे तीणि, नविपाके नव, नविप्पयुत्ते नव (संखित्तं, सहजातवारादि वित्थारेतब्बो).

६. किलेसो अकुसलो धम्मो किलेसस्स अकुसलस्स धम्मस्स हेतुपच्चयेन पच्चयो (संखित्तं).

७. हेतुया तीणि, आरम्मणे नव, अधिपतिया नव (मज्झे तीणि सहजाताधिपति), अनन्तरे नव, समनन्तरे नव…पे… उपनिस्सये नव, आसेवने नव, कम्मे तीणि, आहारे तीणि, इन्द्रिये तीणि, झाने तीणि, मग्गे नव, सम्पयुत्ते नव…पे… अविगते नव (संखित्तं).

नोकिलेसं अब्याकतं धम्मं पटिच्च नोकिलेसो अब्याकतो धम्मो उप्पज्जति हेतुपच्चया (संखित्तं).

८. हेतुया एकं, आरम्मणे एकं…पे… अविगते एकं (संखित्तं).

(सहजातवारेपि…पे… पञ्हावारेपि सब्बत्थ एकं.)