१-७. पटिच्चवारादि

पच्चयचतुक्कं

हेतुपच्चयो

९८. अनुपादिन्नं कुसलं धम्मं पटिच्च अनुपादिन्नो कुसलो धम्मो उप्पज्जति हेतुपच्चया (संखित्तं).

हेतुया एकं, आरम्मणे एकं…पे… अविगते एकं (सब्बत्थ एकं. संखित्तं. सहजातवारेपि…पे… पञ्हावारेपि एकं सप्पच्चयकुसलसदिसं).

९९. अनुपादिन्नं अकुसलं धम्मं पटिच्च अनुपादिन्नो अकुसलो धम्मो उप्पज्जति हेतुपच्चया (संखित्तं).

हेतुया एकं…पे… अविगते एकं (संखित्तं. सहजातवारेपि…पे… पञ्हावारेपि सब्बत्थ एकं).

१००. उपादिन्नं अब्याकतं धम्मं पटिच्च उपादिन्नो अब्याकतो धम्मो उप्पज्जति हेतुपच्चया… तीणि.

अनुपादिन्नं अब्याकतं धम्मं पटिच्च अनुपादिन्नो अब्याकतो धम्मो उप्पज्जति हेतुपच्चया. (१)

उपादिन्नं अब्याकतञ्च अनुपादिन्नं अब्याकतञ्च धम्मं पटिच्च अनुपादिन्नो अब्याकतो धम्मो उप्पज्जति हेतुपच्चया – उपादिन्ने खन्धे च महाभूते च पटिच्च चित्तसमुट्ठानं रूपं. (१) (संखित्तं.)

१०१. हेतुया पञ्च, आरम्मणे द्वे, अधिपतिया एकं…पे… पुरेजाते द्वे, आसेवने एकं, कम्मे पञ्च, विपाके पञ्च…पे… अविगते पञ्च (संखित्तं).

नहेतुया पञ्च, नआरम्मणे चत्तारि, नअधिपतिया पञ्च…पे… नपुरेजाते चत्तारि, नपच्छाजाते नआसेवने पञ्च, नकम्मे एकं, नविपाके द्वे, नआहारे द्वे, नइन्द्रिये द्वे, नझाने द्वे, नमग्गे पञ्च, नसम्पयुत्ते चत्तारि, नविप्पयुत्ते द्वे, नोनत्थिया चत्तारि, नोविगते चत्तारि (संखित्तं. सहजातवारादि वित्थारेतब्बो).

हेतु-पुरेजातपच्चया

१०२. उपादिन्नो अब्याकतो धम्मो उपादिन्नस्स अब्याकतस्स धम्मस्स हेतुपच्चयेन पच्चयो… तीणि.

अनुपादिन्नो अब्याकतो धम्मो अनुपादिन्नस्स अब्याकतस्स धम्मस्स हेतुपच्चयेन पच्चयो. (१)

अनुपादिन्नो अब्याकतो धम्मो अनुपादिन्नस्स अब्याकतस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति… एकं.

उपादिन्नो अब्याकतो धम्मो उपादिन्नस्स अब्याकतस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं (द्वे पञ्हा).

अनुपादिन्नो अब्याकतो धम्मो अनुपादिन्नस्स अब्याकतस्स धम्मस्स पुरेजातपच्चयेन पच्चयो… द्वे (आरम्मणपुरेजातंयेव, घटना द्वे, आरम्मणपुरेजातम्पि वत्थुपुरेजातम्पि).

१०३. हेतुया चत्तारि, आरम्मणे चत्तारि (उपादिन्नमूलके द्वे, अनुपादिन्नमूलके द्वे), अधिपतिया एकं, अनन्तरे समनन्तरे चत्तारि, सहजाते पञ्च, अञ्ञमञ्ञे द्वे, निस्सये पञ्च, उपनिस्सये चत्तारि, पुरेजाते छ, पच्छाजाते छ, आसेवने एकं, कम्मे चत्तारि, विपाके चत्तारि, आहारे नव, इन्द्रिये चत्तारि, झाने चत्तारि, मग्गे चत्तारि, सम्पयुत्ते द्वे, विप्पयुत्ते छ, अत्थिया नव, नत्थिया चत्तारि, विगते चत्तारि, अविगते नव (संखित्तं).

नहेतुया नव, नआरम्मणे नव (संखित्तं).

हेतुपच्चया नआरम्मणे चत्तारि (संखित्तं).

नहेतुपच्चया आरम्मणे चत्तारि (संखित्तं).

महन्तरदुककुसलत्तिकं निट्ठितं.