१-७. पटिच्चवारादि

पच्चयचतुक्कं

हेतुपच्चयो

८४. अज्झत्तिकं कुसलं धम्मं पटिच्च बाहिरो कुसलो धम्मो उप्पज्जति हेतुपच्चया. (१)

बाहिरं कुसलं धम्मं पटिच्च बाहिरो कुसलो धम्मो उप्पज्जति हेतुपच्चया. बाहिरं कुसलं धम्मं पटिच्च अज्झत्तिको कुसलो धम्मो उप्पज्जति हेतुपच्चया. बाहिरं कुसलं धम्मं पटिच्च अज्झत्तिको कुसलो च बाहिरो कुसलो च धम्मा उप्पज्जन्ति हेतुपच्चया. (३)

अज्झत्तिकं कुसलञ्च बाहिरं कुसलञ्च धम्मं पटिच्च बाहिरो कुसलो धम्मो उप्पज्जति हेतुपच्चया. (१) (संखित्तं.)

८५. हेतुया पञ्च, आरम्मणे पञ्च…पे… अविगते पञ्च. (संखित्तं. चित्तदुकसदिसं. सहजातवारम्पि…पे… पञ्हावारम्पि वित्थारेतब्बं).

८६. अज्झत्तिकं अकुसलं धम्मं पटिच्च बाहिरो अकुसलो धम्मो उप्पज्जति हेतुपच्चया. (१)

बाहिरं अकुसलं धम्मं पटिच्च बाहिरो अकुसलो धम्मो उप्पज्जति हेतुपच्चया. बाहिरं अकुसलं धम्मं पटिच्च अज्झत्तिको अकुसलो धम्मो उप्पज्जति हेतुपच्चया. बाहिरं अकुसलं धम्मं पटिच्च अज्झत्तिको अकुसलो च बाहिरो अकुसलो च धम्मा उप्पज्जन्ति हेतुपच्चया. (३)

अज्झत्तिकं अकुसलञ्च बाहिरं अकुसलञ्च धम्मं पटिच्च बाहिरो अकुसलो धम्मो उप्पज्जति हेतुपच्चया. (१) (संखित्तं.)

८७. हेतुया पञ्च, आरम्मणे पञ्च…पे… अविगते पञ्च. (संखित्तं. चित्तदुकसदिसं. सहजातवारम्पि…पे… पञ्हावारम्पि वित्थारेतब्बं.)

८८. अज्झत्तिकं अब्याकतं धम्मं पटिच्च अज्झत्तिको अब्याकतो धम्मो उप्पज्जति हेतुपच्चया… तीणि.

बाहिरं अब्याकतं धम्मं पटिच्च बाहिरो अब्याकतो धम्मो उप्पज्जति हेतुपच्चया… तीणि.

अज्झत्तिकं अब्याकतञ्च बाहिरं अब्याकतञ्च धम्मं पटिच्च अज्झत्तिको अब्याकतो धम्मो उप्पज्जति हेतुपच्चया… तीणि (संखित्तं).

८९. हेतुया नव, आरम्मणे पञ्च, अधिपतिया पञ्च…पे… अञ्ञमञ्ञे पञ्च, निस्सये नव, उपनिस्सये पञ्च, पुरेजाते पञ्च, आसेवने पञ्च, कम्मे…पे… मग्गे नव, सम्पयुत्ते पञ्च, विप्पयुत्ते नव…पे… अविगते नव (संखित्तं).

नहेतुया नव, नआरम्मणे नव, नअधिपतिया नव…पे… नकम्मे तीणि, नविपाके पञ्च, नआहारे एकं, नइन्द्रिये एकं, नझाने पञ्च, नमग्गे नव, नसम्पयुत्ते नव, नविप्पयुत्ते पञ्च, नोनत्थिया नव, नोविगते नव (संखित्तं. सहजातवारम्पि…पे… सम्पयुत्तवारम्पि वित्थारेतब्बं.)

९०. बाहिरो अब्याकतो धम्मो बाहिरस्स अब्याकतस्स धम्मस्स हेतुपच्चयेन पच्चयो (संखित्तं).

बाहिरो अब्याकतो धम्मो बाहिरस्स अब्याकतस्स धम्मस्स कम्मपच्चयेन पच्चयो… तीणि.

९१. हेतुया तीणि, आरम्मणे नव, अधिपतिया नव (अज्झत्तिको बाहिरस्स गमनकाले सहजाताधिपति, मज्झे तीसुपि सहजाताधिपति), अनन्तरे नव, सहजाते नव, अञ्ञमञ्ञे पञ्च, निस्सये नव, उपनिस्सये नव, पुरेजाते नव (आरम्मणपुरेजातम्पि वत्थुपुरेजातम्पि), पच्छाजाते नव, आसेवने नव, कम्मे तीणि, विपाके नव, आहारे नव (तिण्णन्नं कबळीकारो आहारो), इन्द्रिये नव (तिण्णन्नं रूपजीवितिन्द्रियं), झाने मग्गे तीणि, सम्पयुत्ते पञ्च, विप्पयुत्ते नव, अत्थिया नव…पे… अविगते नव (संखित्तं).