१. विभङ्गवारो

हेतुपच्चयो

१. दस्सनेन पहातब्बहेतुकं धम्मं पटिच्च दस्सनेन पहातब्बहेतुको धम्मो उप्पज्जति हेतुपच्चया – दस्सनेन पहातब्बहेतुकं एकं खन्धं पटिच्च तयो खन्धा…पे… द्वे खन्धा. (१)

दस्सनेन पहातब्बहेतुकं धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति हेतुपच्चया – दस्सनेन पहातब्बहेतुके खन्धे पटिच्च चित्तसमुट्ठानं रूपं. (२)

दस्सनेन पहातब्बहेतुकं धम्मं पटिच्च दस्सनेन पहातब्बहेतुको च नेवदस्सनेन नभावनाय पहातब्बहेतुको च धम्मा उप्पज्जन्ति हेतुपच्चया – दस्सनेन पहातब्बहेतुकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धा…पे…. (३)

२. भावनाय पहातब्बहेतुकं धम्मं पटिच्च भावनाय पहातब्बहेतुको धम्मो उप्पज्जति हेतुपच्चया – भावनाय पहातब्बहेतुकं एकं खन्धं पटिच्च तयो खन्धा…पे… द्वे खन्धा. (१)

भावनाय पहातब्बहेतुकं धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति हेतुपच्चया – भावनाय पहातब्बहेतुके खन्धे पटिच्च चित्तसमुट्ठानं रूपं. (२)

भावनाय पहातब्बहेतुकं धम्मं पटिच्च भावनाय पहातब्बहेतुको च नेवदस्सनेन नभावनाय पहातब्बहेतुको च धम्मा उप्पज्जन्ति हेतुपच्चया – भावनाय पहातब्बहेतुकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

३. नेवदस्सनेन नभावनाय पहातब्बहेतुकं धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति हेतुपच्चया – नेवदस्सनेन नभावनाय पहातब्बहेतुकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं; विचिकिच्छासहगतं उद्धच्चसहगतं मोहं पटिच्च चित्तसमुट्ठानं रूपं. पटिसन्धिक्खणे नेवदस्सनेन नभावनाय पहातब्बहेतुकं एकं खन्धं पटिच्च तयो खन्धा कटत्ता च रूपं…पे… द्वे खन्धा…पे… खन्धे पटिच्च वत्थु, वत्थुं पटिच्च खन्धा; एकं महाभूतं पटिच्च…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

नेवदस्सनेन नभावनाय पहातब्बहेतुकं धम्मं पटिच्च दस्सनेन पहातब्बहेतुको धम्मो उप्पज्जति हेतुपच्चया – विचिकिच्छासहगतं मोहं पटिच्च सम्पयुत्तका खन्धा. (२)

नेवदस्सनेन नभावनाय पहातब्बहेतुकं धम्मं पटिच्च भावनाय पहातब्बहेतुको धम्मो उप्पज्जति हेतुपच्चया – उद्धच्चसहगतं मोहं पटिच्च सम्पयुत्तका खन्धा. (३)

नेवदस्सनेन नभावनाय पहातब्बहेतुकं धम्मं पटिच्च दस्सनेन पहातब्बहेतुको च नेवदस्सनेन नभावनाय पहातब्बहेतुको च धम्मा उप्पज्जन्ति हेतुपच्चया – विचिकिच्छासहगतं मोहं पटिच्च सम्पयुत्तका खन्धा चित्तसमुट्ठानञ्च रूपं. (४)

नेवदस्सनेन नभावनाय पहातब्बहेतुकं धम्मं पटिच्च भावनाय पहातब्बहेतुको च नेवदस्सनेन नभावनाय पहातब्बहेतुको च धम्मा उप्पज्जन्ति हेतुपच्चया – उद्धच्चसहगतं मोहं पटिच्च सम्पयुत्तका खन्धा चित्तसमुट्ठानञ्च रूपं. (५)

४. दस्सनेन पहातब्बहेतुकञ्च नेवदस्सनेन नभावनाय पहातब्बहेतुकञ्च धम्मं पटिच्च दस्सनेन पहातब्बहेतुको धम्मो उप्पज्जति हेतुपच्चया – विचिकिच्छासहगतं एकं खन्धञ्च मोहञ्च पटिच्च तयो खन्धा…पे… द्वे खन्धे च मोहञ्च पटिच्च द्वे खन्धा. (१)

दस्सनेन पहातब्बहेतुकञ्च नेवदस्सनेन नभावनाय पहातब्बहेतुकञ्च धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति हेतुपच्चया – दस्सनेन पहातब्बहेतुके खन्धे च महाभूते च पटिच्च चित्तसमुट्ठानं रूपं; विचिकिच्छासहगते खन्धे च मोहञ्च पटिच्च चित्तसमुट्ठानं रूपं. (२)

दस्सनेन पहातब्बहेतुकञ्च नेवदस्सनेन नभावनाय पहातब्बहेतुकञ्च धम्मं पटिच्च दस्सनेन पहातब्बहेतुको च नेवदस्सनेन नभावनाय पहातब्बहेतुको च धम्मा उप्पज्जन्ति हेतुपच्चया – विचिकिच्छासहगतं एकं खन्धञ्च मोहञ्च पटिच्च तयो खन्धा चित्तसमुट्ठानञ्च रूपं…पे… द्वे खन्धे च मोहञ्च पटिच्च द्वे खन्धा…पे…. (३)

५. भावनाय पहातब्बहेतुकञ्च नेवदस्सनेन नभावनाय पहातब्बहेतुकञ्च धम्मं पटिच्च भावनाय पहातब्बहेतुको धम्मो उप्पज्जति हेतुपच्चया – उद्धच्चसहगतं एकं खन्धञ्च मोहञ्च पटिच्च तयो खन्धा…पे… द्वे खन्धे च मोहञ्च पटिच्च द्वे खन्धा. (१)

भावनाय पहातब्बहेतुकञ्च नेवदस्सनेन नभावनाय पहातब्बहेतुकञ्च धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति हेतुपच्चया – भावनाय पहातब्बहेतुके खन्धे च महाभूते च पटिच्च चित्तसमुट्ठानं रूपं; उद्धच्चसहगते खन्धे च मोहञ्च पटिच्च चित्तसमुट्ठानं रूपं. (२)

भावनाय पहातब्बहेतुकञ्च नेवदस्सनेन नभावनाय पहातब्बहेतुकञ्च धम्मं पटिच्च भावनाय पहातब्बहेतुको च नेवदस्सनेन नभावनाय पहातब्बहेतुको च धम्मा उप्पज्जन्ति हेतुपच्चया – उद्धच्चसहगतं एकं खन्धञ्च मोहञ्च पटिच्च तयो खन्धा चित्तसमुट्ठानञ्च रूपं…पे…. (३)

आरम्मणपच्चयो

६. दस्सनेन पहातब्बहेतुकं धम्मं पटिच्च दस्सनेन पहातब्बहेतुको धम्मो उप्पज्जति आरम्मणपच्चया – दस्सनेन पहातब्बहेतुकं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

दस्सनेन पहातब्बहेतुकं धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति आरम्मणपच्चया – विचिकिच्छासहगते खन्धे पटिच्च विचिकिच्छासहगतो मोहो. (२)

दस्सनेन पहातब्बहेतुकं धम्मं पटिच्च दस्सनेन पहातब्बहेतुको च नेवदस्सनेन नभावनाय पहातब्बहेतुको च धम्मा उप्पज्जन्ति आरम्मणपच्चया – विचिकिच्छासहगतं एकं खन्धं पटिच्च तयो खन्धा च मोहो च…पे… द्वे खन्धे पटिच्च द्वे खन्धा च मोहो च. (३)

भावनाय पहातब्बहेतुकं धम्मं पटिच्च भावनाय पहातब्बहेतुको धम्मो उप्पज्जति आरम्मणपच्चया… तीणि. (दस्सनेन सदिसं विभजितब्बं.)

७. नेवदस्सनेन नभावनाय पहातब्बहेतुकं धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति आरम्मणपच्चया – नेवदस्सनेन नभावनाय पहातब्बहेतुकं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. पटिसन्धिक्खणे…पे… वत्थुं पटिच्च खन्धा. (१)

नेवदस्सनेन नभावनाय पहातब्बहेतुकं धम्मं पटिच्च दस्सनेन पहातब्बहेतुको धम्मो उप्पज्जति आरम्मणपच्चया – विचिकिच्छासहगतं मोहं पटिच्च सम्पयुत्तका खन्धा. (२)

नेवदस्सनेन नभावनाय पहातब्बहेतुकं धम्मं पटिच्च भावनाय पहातब्बहेतुको धम्मो उप्पज्जति आरम्मणपच्चया – उद्धच्चसहगतं मोहं पटिच्च सम्पयुत्तका खन्धा. (३)

८. दस्सनेन पहातब्बहेतुकञ्च नेवदस्सनेन नभावनाय पहातब्बहेतुकञ्च धम्मं पटिच्च दस्सनेन पहातब्बहेतुको धम्मो उप्पज्जति आरम्मणपच्चया – विचिकिच्छासहगतं एकं खन्धञ्च मोहञ्च पटिच्च तयो खन्धा…पे… द्वे खन्धे च मोहञ्च पटिच्च द्वे खन्धा. (१)

भावनाय पहातब्बहेतुकञ्च नेवदस्सनेन नभावनाय पहातब्बहेतुकञ्च धम्मं पटिच्च भावनाय पहातब्बहेतुको धम्मो उप्पज्जति आरम्मणपच्चया – उद्धच्चसहगतं एकं खन्धञ्च मोहञ्च पटिच्च तयो खन्धा…पे… द्वे खन्धे च मोहञ्च पटिच्च द्वे खन्धा. (१)

अधिपतिपच्चयो

९. दस्सनेन पहातब्बहेतुकं धम्मं पटिच्च दस्सनेन पहातब्बहेतुको धम्मो उप्पज्जति अधिपतिपच्चया… तीणि (हेतुसदिसा).

भावनाय पहातब्बहेतुकं धम्मं पटिच्च…पे… तीणि (हेतुसदिसा, अधिपतिया मोहो नत्थि).

नेवदस्सनेन नभावनाय पहातब्बहेतुकं धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति अधिपतिपच्चया – नेवदस्सनेन नभावनाय पहातब्बहेतुकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धा. एकं महाभूतं पटिच्च तयो महाभूता…पे… महाभूते पटिच्च चित्तसमुट्ठानं रूपं उपादारूपं. (१)

१०. दस्सनेन पहातब्बहेतुकञ्च नेवदस्सनेन नभावनाय पहातब्बहेतुकञ्च धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति अधिपतिपच्चया – दस्सनेन पहातब्बहेतुके खन्धे च महाभूते च पटिच्च चित्तसमुट्ठानं रूपं. (१)

भावनाय पहातब्बहेतुकञ्च नेवदस्सनेन नभावनाय पहातब्बहेतुकञ्च धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति अधिपतिपच्चया – भावनाय पहातब्बहेतुके खन्धे च महाभूते च पटिच्च चित्तसमुट्ठानं रूपं. (१)

अनन्तर-समनन्तरपच्चया

११. दस्सनेन पहातब्बहेतुकं धम्मं पटिच्च दस्सनेन पहातब्बहेतुको धम्मो उप्पज्जति अनन्तरपच्चया. समनन्तरपच्चया (आरम्मणसदिसं).

सहजातपच्चयो

१२. दस्सनेन पहातब्बहेतुकं धम्मं पटिच्च दस्सनेन पहातब्बहेतुको धम्मो उप्पज्जति सहजातपच्चया – दस्सनेन पहातब्बहेतुकं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

दस्सनेन पहातब्बहेतुकं धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति सहजातपच्चया – दस्सनेन पहातब्बहेतुके खन्धे पटिच्च चित्तसमुट्ठानं रूपं; विचिकिच्छासहगते खन्धे पटिच्च मोहो चित्तसमुट्ठानञ्च रूपं. (२)

दस्सनेन पहातब्बहेतुकं धम्मं पटिच्च दस्सनेन पहातब्बहेतुको च नेवदस्सनेन नभावनाय पहातब्बहेतुको च धम्मा उप्पज्जन्ति सहजातपच्चया – दस्सनेन पहातब्बहेतुकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं; विचिकिच्छासहगतं एकं खन्धं पटिच्च तयो खन्धा मोहो च चित्तसमुट्ठानञ्च रूपं…पे…. (३)

१३. भावनाय पहातब्बहेतुकं धम्मं पटिच्च भावनाय पहातब्बहेतुको धम्मो उप्पज्जति सहजातपच्चया – भावनाय पहातब्बहेतुकं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

भावनाय पहातब्बहेतुकं धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति सहजातपच्चया – भावनाय पहातब्बहेतुके खन्धे पटिच्च चित्तसमुट्ठानं रूपं; उद्धच्चसहगते खन्धे पटिच्च मोहो च चित्तसमुट्ठानञ्च रूपं. (२)

भावनाय पहातब्बहेतुकं धम्मं पटिच्च भावनाय पहातब्बहेतुको च नेवदस्सनेन नभावनाय पहातब्बहेतुको च धम्मा उप्पज्जन्ति सहजातपच्चया – भावनाय पहातब्बहेतुकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं; उद्धच्चसहगतं एकं खन्धं पटिच्च तयो खन्धा मोहो च चित्तसमुट्ठानञ्च रूपं…पे…. (३)

१४. नेवदस्सनेन नभावनाय पहातब्बहेतुकं धम्मं पटिच्च नेवदस्सनेन नभावनाय पहातब्बहेतुको धम्मो उप्पज्जति सहजातपच्चया – नेवदस्सनेन नभावनाय पहातब्बहेतुकं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… विचिकिच्छासहगतं उद्धच्चसहगतं मोहं पटिच्च चित्तसमुट्ठानं रूपं. पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा; एकं महाभूतं पटिच्च तयो महाभूता…पे… बाहिरं… आहारसमुट्ठानं… उतुसमुट्ठानं… असञ्ञसत्तानं एकं…पे…. (१)

नेवदस्सनेन नभावनाय पहातब्बहेतुकं धम्मं पटिच्च दस्सनेन पहातब्बहेतुको धम्मो उप्पज्जति सहजातपच्चया – विचिकिच्छासहगतं मोहं पटिच्च सम्पयुत्तका खन्धा. (२)

नेवदस्सनेन नभावनाय पहातब्बहेतुकं धम्मं पटिच्च भावनाय पहातब्बहेतुको धम्मो उप्पज्जति सहजातपच्चया (संखित्तं. हेतुसदिसं कातब्बं). (३)

अञ्ञमञ्ञपच्चयादि

१५. दस्सनेन पहातब्बहेतुकं धम्मं पटिच्च दस्सनेन पहातब्बहेतुको धम्मो उप्पज्जति अञ्ञमञ्ञपच्चया, निस्सयपच्चया, उपनिस्सयपच्चया, पुरेजातपच्चया, आसेवनपच्चया, कम्मपच्चया, विपाकपच्चया, आहारपच्चया, इन्द्रियपच्चया, झानपच्चया, मग्गपच्चया, सम्पयुत्तपच्चया, विप्पयुत्तपच्चया, अत्थिपच्चया, नत्थिपच्चया, विगतपच्चया, अविगतपच्चया.