१. विभङ्गवारो

हेतुपच्चयो

१. दस्सनेन पहातब्बं धम्मं पटिच्च दस्सनेन पहातब्बो धम्मो उप्पज्जति हेतुपच्चया – दस्सनेन पहातब्बं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

दस्सनेन पहातब्बं धम्मं पटिच्च नेवदस्सनेन नभावनाय पहातब्बो धम्मो उप्पज्जति हेतुपच्चया – दस्सनेन पहातब्बे खन्धे पटिच्च चित्तसमुट्ठानं रूपं. (२)

दस्सनेन पहातब्बं धम्मं पटिच्च दस्सनेन पहातब्बो च नेवदस्सनेन नभावनाय पहातब्बो च धम्मा उप्पज्जन्ति हेतुपच्चया – दस्सनेन पहातब्बं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं. (३)

२. भावनाय पहातब्बं धम्मं पटिच्च भावनाय पहातब्बो धम्मो उप्पज्जति हेतुपच्चया – भावनाय पहातब्बं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

भावनाय पहातब्बं धम्मं पटिच्च नेवदस्सनेन नभावनाय पहातब्बो धम्मो उप्पज्जति हेतुपच्चया – भावनाय पहातब्बे खन्धे पटिच्च चित्तसमुट्ठानं रूपं. (२)

भावनाय पहातब्बं धम्मं पटिच्च भावनाय पहातब्बो च नेवदस्सनेन नभावनाय पहातब्बो च धम्मा उप्पज्जन्ति हेतुपच्चया – भावनाय पहातब्बं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं. (३)

३. नेवदस्सनेन नभावनाय पहातब्बं धम्मं पटिच्च नेवदस्सनेन नभावनाय पहातब्बो धम्मो उप्पज्जति हेतुपच्चया – नेवदस्सनेन नभावनाय पहातब्बं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं. पटिसन्धिक्खणे नेवदस्सनेन नभावनाय पहातब्बं एकं खन्धं पटिच्च तयो खन्धा कटत्ता च रूपं…पे… द्वे खन्धे पटिच्च द्वे खन्धा कटत्ता च रूपं, खन्धे पटिच्च वत्थु, वत्थुं पटिच्च खन्धा; एकं महाभूतं पटिच्च तयो महाभूता…पे… द्वे महाभूते पटिच्च द्वे महाभूता, महाभूते पटिच्च चित्तसमुट्ठानं रूपं कटत्तारूपं उपादारूपं. (१)

४. दस्सनेन पहातब्बञ्च नेवदस्सनेन नभावनाय पहातब्बञ्च धम्मं पटिच्च नेवदस्सनेन नभावनाय पहातब्बो धम्मो उप्पज्जति हेतुपच्चया – दस्सनेन पहातब्बे खन्धे च महाभूते च पटिच्च चित्तसमुट्ठानं रूपं. (१)

भावनाय पहातब्बञ्च नेवदस्सनेन नभावनाय पहातब्बञ्च धम्मं पटिच्च नेवदस्सनेन नभावनाय पहातब्बो धम्मो उप्पज्जति हेतुपच्चया – भावनाय पहातब्बे खन्धे च महाभूते च पटिच्च चित्तसमुट्ठानं रूपं. (१)

आरम्मणपच्चयो

५. दस्सनेन पहातब्बं धम्मं पटिच्च दस्सनेन पहातब्बो धम्मो उप्पज्जति आरम्मणपच्चया – दस्सनेन पहातब्बं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

भावनाय पहातब्बं धम्मं पटिच्च भावनाय पहातब्बो धम्मो उप्पज्जति आरम्मणपच्चया – भावनाय पहातब्बं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

नेवदस्सनेन नभावनाय पहातब्बं धम्मं पटिच्च नेवदस्सनेन नभावनाय पहातब्बो धम्मो उप्पज्जति आरम्मणपच्चया – नेवदस्सनेन नभावनाय पहातब्बं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. पटिसन्धिक्खणे नेवदस्सनेन नभावनाय पहातब्बं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. वत्थुं पटिच्च खन्धा. (१)

अधिपतिपच्चयो

६. दस्सनेन पहातब्बं धम्मं पटिच्च दस्सनेन पहातब्बो धम्मो उप्पज्जति अधिपतिपच्चया… तीणि.

भावनाय पहातब्बं धम्मं पटिच्च भावनाय पहातब्बो धम्मो उप्पज्जति अधिपतिपच्चया… तीणि.

नेवदस्सनेन नभावनाय पहातब्बं धम्मं पटिच्च नेवदस्सनेन नभावनाय पहातब्बो धम्मो उप्पज्जति अधिपतिपच्चया – नेवदस्सनेन नभावनाय पहातब्बं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे पटिच्च द्वे खन्धा चित्तसमुट्ठानञ्च रूपं; एकं महाभूतं पटिच्च तयो महाभूता…पे… द्वे महाभूते पटिच्च द्वे महाभूता, महाभूते पटिच्च चित्तसमुट्ठानं रूपं उपादारूपं. (१)

७. दस्सनेन पहातब्बञ्च नेवदस्सनेन नभावनाय पहातब्बञ्च धम्मं पटिच्च नेवदस्सनेन नभावनाय पहातब्बो धम्मो उप्पज्जति अधिपतिपच्चया – दस्सनेन पहातब्बे खन्धे च महाभूते च पटिच्च चित्तसमुट्ठानं रूपं. (१)

भावनाय पहातब्बञ्च नेवदस्सनेन नभावनाय पहातब्बञ्च धम्मं पटिच्च नेवदस्सनेन नभावनाय पहातब्बो धम्मो उप्पज्जति अधिपतिपच्चया – भावनाय पहातब्बे खन्धे च महाभूते च पटिच्च चित्तसमुट्ठानं रूपं. (१)

अनन्तर-समनन्तरपच्चया

८. दस्सनेन पहातब्बं धम्मं पटिच्च दस्सनेन पहातब्बो धम्मो उप्पज्जति अनन्तरपच्चया… समनन्तरपच्चया (आरम्मणसदिसं).

सहजातपच्चयो

९. दस्सनेन पहातब्बं धम्मं पटिच्च दस्सनेन पहातब्बो धम्मो उप्पज्जति सहजातपच्चया… तीणि.

भावनाय पहातब्बं धम्मं पटिच्च भावनाय पहातब्बो धम्मो उप्पज्जति सहजातपच्चया… तीणि.

नेवदस्सनेन नभावनाय पहातब्बं धम्मं पटिच्च नेवदस्सनेन नभावनाय पहातब्बो धम्मो उप्पज्जति सहजातपच्चया…पे… एकं महाभूतं पटिच्च…पे… बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं…पे…. (१)

१०. दस्सनेन पहातब्बञ्च नेवदस्सनेन नभावनाय पहातब्बञ्च धम्मं पटिच्च नेवदस्सनेन नभावनाय पहातब्बो धम्मो उप्पज्जति सहजातपच्चया – दस्सनेन पहातब्बे खन्धे च महाभूते च पटिच्च चित्तसमुट्ठानं रूपं.

भावनाय पहातब्बञ्च नेवदस्सनेन नभावनाय पहातब्बञ्च धम्मं पटिच्च नेवदस्सनेन नभावनाय पहातब्बो धम्मो उप्पज्जति सहजातपच्चया – भावनाय पहातब्बे खन्धे च महाभूते च पटिच्च चित्तसमुट्ठानं रूपं. (१)

अञ्ञमञ्ञपच्चयो

११. दस्सनेन पहातब्बं धम्मं पटिच्च दस्सनेन पहातब्बो धम्मो उप्पज्जति अञ्ञमञ्ञपच्चया… एकं.

भावनाय पहातब्बं धम्मं पटिच्च भावनाय पहातब्बो धम्मो उप्पज्जति सहजातपच्चया… एकं.

नेवदस्सनेन नभावनाय पहातब्बं धम्मं पटिच्च नेवदस्सनेन नभावनाय पहातब्बो धम्मो उप्पज्जति अञ्ञमञ्ञपच्चया – नेवदस्सनेन नभावनाय पहातब्बं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. पटिसन्धिक्खणे नेवदस्सनेन नभावनाय पहातब्बं एकं खन्धं पटिच्च तयो खन्धा वत्थु च…पे… द्वे खन्धे पटिच्च द्वे खन्धा वत्थु च, खन्धे पटिच्च वत्थु, वत्थुं पटिच्च खन्धा; एकं महाभूतं पटिच्च तयो महाभूता…पे… द्वे महाभूते पटिच्च द्वे महाभूता; बाहिरं… आहारसमुट्ठानं… उतुसमुट्ठानं… असञ्ञसत्तानं…पे… द्वे महाभूते पटिच्च द्वे महाभूता.

निस्सयपच्चयादि

१२. दस्सनेन पहातब्बं धम्मं पटिच्च दस्सनेन पहातब्बो धम्मो उप्पज्जति निस्सयपच्चया… (हेतुपच्चयसदिसं) उपनिस्सयपच्चया… तीणि… पुरेजातपच्चया… तीणि (पटिसन्धि नत्थि)… आसेवनपच्चया… (विपाकपटिसन्धि नत्थि) कम्मपच्चया (परिपुण्णं. अज्झत्तिका च असञ्ञसत्तानञ्च महाभूता).

विपाकपच्चयो

१३. नेवदस्सनेन नभावनाय पहातब्बं धम्मं पटिच्च नेवदस्सनेन नभावनाय पहातब्बो धम्मो उप्पज्जति विपाकपच्चया – विपाकं एकं खन्धं पटिच्च तयो खन्धा चित्तसमुट्ठानञ्च रूपं…पे… पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा; एकं महाभूतं…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

आहारपच्चयादि

१४. दस्सनेन पहातब्बं धम्मं पटिच्च दस्सनेन पहातब्बो धम्मो उप्पज्जति आहारपच्चया (परिपुण्णं, अज्झत्तिका महाभूता च आहारसमुट्ठानञ्च)… इन्द्रियपच्चया (कम्मपच्चयसदिसं)… झानपच्चया… मग्गपच्चया (हेतुपच्चयसदिसं)… सम्पयुत्तपच्चया (आरम्मणपच्चयसदिसं)… विप्पयुत्तपच्चया (कुसलत्तिके विप्पयुत्तपच्चयसदिसं)… अत्थिपच्चया (सहजातपच्चयसदिसं)… नत्थिपच्चया… विगतपच्चया… अविगतपच्चया.