१. विभङ्गवारो

हेतुपच्चयो

६०. दस्सनेन पहातब्बं धम्मं संसट्ठो दस्सनेन पहातब्बो धम्मो उप्पज्जति हेतुपच्चया – दस्सनेन पहातब्बं एकं खन्धं संसट्ठा तयो खन्धा…पे… द्वे खन्धे संसट्ठा द्वे खन्धा. (१)

भावनाय पहातब्बं धम्मं संसट्ठो भावनाय पहातब्बो धम्मो उप्पज्जति हेतुपच्चया – भावनाय पहातब्बं एकं खन्धं संसट्ठा…पे…. (१)

नेवदस्सनेन नभावनाय पहातब्बं धम्मं संसट्ठो नेवदस्सनेन नभावनाय पहातब्बो धम्मो उप्पज्जति हेतुपच्चया – नेवदस्सनेन नभावनाय पहातब्बं एकं खन्धं संसट्ठा तयो खन्धा…पे… पटिसन्धिक्खणे नेवदस्सनेन नभावनाय पहातब्बं एकं खन्धं संसट्ठा…पे…. (१)

आरम्मणपच्चयो

६१. दस्सनेन पहातब्बं धम्मं संसट्ठो दस्सनेन पहातब्बो धम्मो उप्पज्जति आरम्मणपच्चया (सब्बानि पदानि वित्थारेतब्बानि तीणि, तीणि).

१. पच्चयानुलोमं

२. सङ्ख्यावारो

६२. हेतुया तीणि, आरम्मणे तीणि, अधिपतिया तीणि, अनन्तरे तीणि, समनन्तरे तीणि, सहजाते तीणि, अञ्ञमञ्ञे तीणि, निस्सये तीणि, उपनिस्सये तीणि, पुरेजाते तीणि, आसेवने तीणि, कम्मे तीणि, विपाके एकं, आहारे तीणि, इन्द्रिये तीणि, झाने तीणि, मग्गे तीणि, सम्पयुत्ते तीणि, विप्पयुत्ते तीणि, अत्थिया तीणि, नत्थिया तीणि, विगते तीणि, अविगते तीणि.

अनुलोमं.