१. विभङ्गवारो

नहेतुपच्चयो

६. पीतिसहगतं धम्मं पटिच्च पीतिसहगतो धम्मो उप्पज्जति नहेतुपच्चया – अहेतुकं पीतिसहगतं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

पीतिसहगतं धम्मं पटिच्च सुखसहगतो धम्मो उप्पज्जति नहेतुपच्चया – अहेतुकं पीतिसहगतं एकं खन्धं पटिच्च सुखसहगता तयो खन्धा…पे… द्वे खन्धे पटिच्च द्वे खन्धा. (२)

पीतिसहगतं धम्मं पटिच्च पीतिसहगतो च सुखसहगतो च धम्मा उप्पज्जन्ति नहेतुपच्चया – अहेतुकं पीतिसहगतं एकं खन्धं पटिच्च पीतिसहगता च सुखसहगता च तयो खन्धा…पे… द्वे खन्धे पटिच्च द्वे खन्धा. (३)

७. सुखसहगतं धम्मं पटिच्च सुखसहगतो धम्मो उप्पज्जति नहेतुपच्चया – अहेतुकं सुखसहगतं एकं खन्धं पटिच्च द्वे खन्धा, द्वे खन्धे पटिच्च एको खन्धो. (१)

सुखसहगतं धम्मं पटिच्च पीतिसहगतो धम्मो उप्पज्जति नहेतुपच्चया – अहेतुकं सुखसहगतं एकं खन्धं पटिच्च पीतिसहगता तयो खन्धा…पे… द्वे खन्धे पटिच्च द्वे खन्धा. (२)

सुखसहगतं धम्मं पटिच्च पीतिसहगतो च सुखसहगतो च धम्मा उप्पज्जन्ति नहेतुपच्चया – अहेतुकं सुखसहगतं एकं खन्धं पटिच्च पीतिसहगता च सुखसहगता च द्वे खन्धा, द्वे खन्धे पटिच्च एको खन्धो. (३)

८. उपेक्खासहगतं धम्मं पटिच्च उपेक्खासहगतो धम्मो उप्पज्जति नहेतुपच्चया – अहेतुकं उपेक्खासहगतं एकं खन्धं पटिच्च द्वे खन्धा, द्वे खन्धे पटिच्च एको खन्धो. अहेतुकपटिसन्धिक्खणे उपेक्खासहगतं एकं खन्धं पटिच्च द्वे खन्धा, द्वे खन्धे पटिच्च एको खन्धो. विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

९. पीतिसहगतञ्च सुखसहगतञ्च धम्मं पटिच्च पीतिसहगतो धम्मो उप्पज्जति नहेतुपच्चया – अहेतुकं पीतिसहगतञ्च सुखसहगतञ्च एकं खन्धं पटिच्च पीतिसहगता तयो खन्धा…पे… द्वे खन्धे पटिच्च द्वे खन्धा. (१)

पीतिसहगतञ्च सुखसहगतञ्च धम्मं पटिच्च सुखसहगतो धम्मो उप्पज्जति नहेतुपच्चया – अहेतुकं पीतिसहगतञ्च सुखसहगतञ्च एकं खन्धं पटिच्च सुखसहगता द्वे खन्धा, द्वे खन्धे पटिच्च एको खन्धो. (२)

पीतिसहगतञ्च सुखसहगतञ्च धम्मं पटिच्च पीतिसहगतो च सुखसहगतो च धम्मा उप्पज्जन्ति नहेतुपच्चया – अहेतुकं पीतिसहगतञ्च सुखसहगतञ्च एकं खन्धं पटिच्च पीतिसहगता च सुखसहगता च द्वे खन्धा, द्वे खन्धे पटिच्च एको खन्धो. (३)

नअधिपति-नआसेवनपच्चया

१०. पीतिसहगतं धम्मं पटिच्च पीतिसहगतो धम्मो उप्पज्जति नअधिपतिपच्चया (नअधिपतिपटिसन्धिक्खणे परिपुण्णं)… नपुरेजातपच्चया… (‘‘अरूपे’’ति नियामेतब्बं ‘‘पटिसन्धिक्खणे’’ति च) नपच्छाजातपच्चया… नआसेवनपच्चया.

नकम्मपच्चयो

११. पीतिसहगतं धम्मं पटिच्च पीतिसहगतो धम्मो उप्पज्जति नकम्मपच्चया – पीतिसहगते खन्धे पटिच्च पीतिसहगता चेतना.

पीतिसहगतं धम्मं पटिच्च सुखसहगतो धम्मो उप्पज्जति नकम्मपच्चया – पीतिसहगते खन्धे पटिच्च सुखसहगता चेतना.

(इमिना कारणेन दस पञ्हा वित्थारेतब्बा.)

नविपाकपच्चयो

१२. पीतिसहगतं धम्मं पटिच्च पीतिसहगतो धम्मो उप्पज्जति नविपाकपच्चया…पे… (परिपुण्णं, पटिसन्धि नत्थि).

नझानपच्चयादि

१३. सुखसहगतं धम्मं पटिच्च सुखसहगतो धम्मो उप्पज्जति नझानपच्चया – सुखसहगतं कायविञ्ञाणसहगतं एकं खन्धं पटिच्च द्वे खन्धा, द्वे खन्धे पटिच्च एको खन्धो. (१)

उपेक्खासहगतं धम्मं पटिच्च उपेक्खासहगतो धम्मो उप्पज्जति नझानपच्चया – चतुविञ्ञाणसहगतं एकं खन्धं पटिच्च द्वे खन्धा, द्वे खन्धे पटिच्च एको खन्धो. (१)

(नमग्गपच्चया नहेतुपच्चयसदिसं. मोहो नत्थि. नविप्पयुत्तपच्चया परिपुण्णं अरूपपञ्हमेव.)