१. विभङ्गवारो

नहेतुपच्चयो

१७. अनिदस्सनसप्पटिघं धम्मं पटिच्च अनिदस्सनसप्पटिघो धम्मो उप्पज्जति नहेतुपच्चया – अनिदस्सनसप्पटिघं एकं महाभूतं पटिच्च द्वे महाभूता, द्वे महाभूते पटिच्च एकं महाभूतं. अनिदस्सनसप्पटिघे महाभूते पटिच्च अनिदस्सनसप्पटिघं चित्तसमुट्ठानं रूपं कटत्तारूपं उपादारूपं. फोट्ठब्बायतनं पटिच्च चक्खायतनं…पे… रसायतनं. बाहिरं… आहारसमुट्ठानं… उतुसमुट्ठानं… असञ्ञसत्तानं अनिदस्सनसप्पटिघं एकं महाभूतं पटिच्च द्वे महाभूता, द्वे महाभूते पटिच्च एकं महाभूतं, महाभूते पटिच्च…पे….

(अनिदस्सनसप्पटिघमूलके इमिना कारणेन सत्तपि पञ्हा विभजितब्बा.)

१८. अनिदस्सनअप्पटिघं धम्मं पटिच्च अनिदस्सनअप्पटिघो धम्मो उप्पज्जति नहेतुपच्चया – अहेतुकं अनिदस्सनअप्पटिघं एकं खन्धं पटिच्च तयो खन्धा अनिदस्सनअप्पटिघञ्च चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे अनिदस्सनअप्पटिघं एकं खन्धं पटिच्च तयो खन्धा अनिदस्सनअप्पटिघञ्च कटत्तारूपं…पे… खन्धे पटिच्च वत्थु, वत्थुं पटिच्च खन्धा. आपोधातुं पटिच्च अनिदस्सनअप्पटिघं चित्तसमुट्ठानं रूपं कटत्तारूपं उपादारूपं. आपोधातुं पटिच्च इत्थिन्द्रियं…पे… कबळीकारो आहारो. बाहिरं… आहारसमुट्ठानं… उतुसमुट्ठानं… असञ्ञसत्तानं आपोधातुं पटिच्च अनिदस्सनअप्पटिघं कटत्तारूपं उपादारूपं. विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो.

(अनिदस्सनअप्पटिघमूलका इमिना कारणेन सत्त पञ्हा विभजितब्बा.)

१९. अनिदस्सनसप्पटिघञ्च अनिदस्सनअप्पटिघञ्च धम्मं पटिच्च सनिदस्सनसप्पटिघो धम्मो उप्पज्जति नहेतुपच्चया – अहेतुके अनिदस्सनअप्पटिघे खन्धे च महाभूते च पटिच्च सनिदस्सनसप्पटिघं चित्तसमुट्ठानं रूपं. अहेतुकपटिसन्धिक्खणे अनिदस्सनअप्पटिघे खन्धे च महाभूते च पटिच्च सनिदस्सनसप्पटिघं कटत्तारूपं. अनिदस्सनसप्पटिघे महाभूते च आपोधातुञ्च पटिच्च सनिदस्सनसप्पटिघं चित्तसमुट्ठानं रूपं कटत्तारूपं उपादारूपं. फोट्ठब्बायतनञ्च आपोधातुञ्च पटिच्च रूपायतनं. बाहिरं… आहारसमुट्ठानं… उतुसमुट्ठानं… असञ्ञसत्तानं अनिदस्सनसप्पटिघे महाभूते च आपोधातुञ्च पटिच्च सनिदस्सनसप्पटिघं कटत्तारूपं उपादारूपं.

(इमिना कारणेन सत्त पञ्हा वित्थारेतब्बा असम्मोहन्तेन.)

नआरम्मणपच्चयो

२०. अनिदस्सनसप्पटिघं धम्मं पटिच्च अनिदस्सनसप्पटिघो धम्मो उप्पज्जति नआरम्मणपच्चया – अनिदस्सनसप्पटिघं एकं महाभूतं पटिच्च द्वे महाभूता, द्वे महाभूते पटिच्च एकं महाभूतं. अनिदस्सनसप्पटिघे महाभूते पटिच्च अनिदस्सनसप्पटिघं चित्तसमुट्ठानं रूपं कटत्तारूपं उपादारूपं. फोट्ठब्बायतनं पटिच्च चक्खायतनं…पे… रसायतनं. बाहिरं… आहारसमुट्ठानं…, उतुसमुट्ठानं… असञ्ञसत्तानं अनिदस्सनसप्पटिघं एकं महाभूतं पटिच्च द्वे महाभूता, द्वे महाभूते पटिच्च एकं महाभूतं…पे….

(अनिदस्सनसप्पटिघमूलका इमिना कारणेन सत्तपि पञ्हा वित्थारेतब्बा.)

२१. अनिदस्सनअप्पटिघं धम्मं पटिच्च अनिदस्सनअप्पटिघो धम्मो उप्पज्जति नआरम्मणपच्चया – अनिदस्सनअप्पटिघे खन्धे पटिच्च अनिदस्सनअप्पटिघं चित्तसमुट्ठानं रूपं. पटिसन्धिक्खणे अनिदस्सनअप्पटिघे खन्धे पटिच्च अनिदस्सनअप्पटिघं कटत्तारूपं. खन्धे पटिच्च वत्थु…पे… आपोधातुं पटिच्च अनिदस्सनअप्पटिघं चित्तसमुट्ठानं रूपं कटत्तारूपं उपादारूपं. आपोधातुं पटिच्च इत्थिन्द्रियं…पे… कबळीकारो आहारो. बाहिरं… आहारसमुट्ठानं… उतुसमुट्ठानं… असञ्ञसत्तानं आपोधातुं पटिच्च अनिदस्सनअप्पटिघं कटत्तारूपं उपादारूपं.

(अनिदस्सनअप्पटिघमूलके इमिना कारणेन सत्तपि पञ्हा वित्थारेतब्बा.)

२२. अनिदस्सनसप्पटिघञ्च अनिदस्सनअप्पटिघञ्च धम्मं पटिच्च सनिदस्सनसप्पटिघो धम्मो उप्पज्जति नआरम्मणपच्चया – अनिदस्सनअप्पटिघे खन्धे च महाभूते च पटिच्च सनिदस्सनसप्पटिघं चित्तसमुट्ठानं रूपं. पटिसन्धिक्खणे अनिदस्सनअप्पटिघे खन्धे च महाभूते च पटिच्च सनिदस्सनसप्पटिघं कटत्तारूपं. अनिदस्सनसप्पटिघे महाभूते च आपोधातुञ्च पटिच्च सनिदस्सनसप्पटिघं चित्तसमुट्ठानं रूपं कटत्तारूपं उपादारूपं. फोट्ठब्बायतनञ्च आपोधातुञ्च पटिच्च रूपायतनं. बाहिरं… आहारसमुट्ठानं… उतुसमुट्ठानं… असञ्ञसत्तानं अनिदस्सनसप्पटिघे महाभूते च आपोधातुञ्च पटिच्च सनिदस्सनसप्पटिघं कटत्तारूपं उपादारूपं.

(घटने इमिना कारणेन सत्तपि पञ्हा विभजितब्बा.)

नअधिपतिपच्चयादि

२३. अनिदस्सनसप्पटिघं धम्मं पटिच्च अनिदस्सनसप्पटिघो धम्मो उप्पज्जति नअधिपतिपच्चया (सहजातसदिसं)… नअनन्तरपच्चया… नसमनन्तरपच्चया… नअञ्ञमञ्ञपच्चया – अनिदस्सनसप्पटिघे महाभूते पटिच्च अनिदस्सनसप्पटिघं चित्तसमुट्ठानं रूपं कटत्तारूपं उपादारूपं. फोट्ठब्बायतनं पटिच्च चक्खायतनं…पे… रसायतनं… बाहिरं… आहारसमुट्ठानं… उतुसमुट्ठानं… असञ्ञसत्तानं महाभूते पटिच्च अनिदस्सनसप्पटिघं कटत्तारूपं उपादारूपं.

(इमिना कारणेन एकवीस पञ्हा विभजितब्बा.)

नउपनिस्सयपच्चया… नपुरेजातपच्चया… नपच्छाजातपच्चया… नआसेवनपच्चया… नकम्मपच्चया – बाहिरं… आहारसमुट्ठानं… उतुसमुट्ठानं… अनिदस्सनसप्पटिघं एकं महाभूतं पटिच्च द्वे महाभूता, द्वे महाभूते पटिच्च एकं महाभूतं. अनिदस्सनसप्पटिघे महाभूते पटिच्च अनिदस्सनसप्पटिघं उपादारूपं (कम्मं विभजित्वा नकम्मेनेव एकवीस पञ्हा कातब्बा), नविपाकपच्चया (पटिसन्धिपि कटत्तापि नत्थि, पञ्चवोकारेयेव कातब्बा), नआहारपच्चया – बाहिरं… उतुसमुट्ठानं… असञ्ञसत्तानं…पे… (इमिना कारणेन विभजितब्बा एकवीसापि).

नइन्द्रियपच्चयादि

२४. अनिदस्सनसप्पटिघं धम्मं पटिच्च अनिदस्सनसप्पटिघो धम्मो उप्पज्जति नइन्द्रियपच्चया – बाहिरं… आहारसमुट्ठानं… उतुसमुट्ठानं… अनिदस्सनसप्पटिघं एकं महाभूतं…पे… असञ्ञसत्तानं महाभूते पटिच्च रूपजीवितिन्द्रियं (संखित्तं, सब्बे पञ्हा विभजितब्बा)… नझानपच्चया – बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं (संखित्तं, सत्तपि पञ्हा विभजितब्बा).

अनिदस्सनअप्पटिघं धम्मं पटिच्च अनिदस्सनअप्पटिघो धम्मो उप्पज्जति नझानपच्चया – पञ्चविञ्ञाणसहगतं एकं खन्धं पटिच्च तयो खन्धा…पे… द्वे खन्धे…पे… बाहिरं… आहारसमुट्ठानं… उतुसमुट्ठानं… असञ्ञसत्तानं आपोधातुं पटिच्च अनिदस्सनअप्पटिघं कटत्तारूपं उपादारूपं.

(एवं सत्तपि पञ्हा विभजितब्बा.)

२५. अनिदस्सनसप्पटिघञ्च अनिदस्सनअप्पटिघञ्च धम्मं पटिच्च सनिदस्सनसप्पटिघो धम्मो उप्पज्जति नझानपच्चया – बाहिरं… आहारसमुट्ठानं… उतुसमुट्ठानं…, असञ्ञसत्तानं…पे… अनिदस्सनसप्पटिघे महाभूते च आपोधातुञ्च पटिच्च सनिदस्सनसप्पटिघं कटत्तारूपं उपादारूपं.

(एवं सत्तपि पञ्हा विभजितब्बा), नमग्गपच्चया… (नहेतुसदिसं कातब्बं. परिपुण्णं. मोहो नत्थि). नसम्पयुत्तपच्चया… नविप्पयुत्तपच्चया (परिपुण्णं)… नोनत्थिपच्चया… नोविगतपच्चया.