१. विभङ्गवारो

हेतुपच्चयो

२९. अनिदस्सनअप्पटिघो धम्मो अनिदस्सनअप्पटिघस्स धम्मस्स हेतुपच्चयेन पच्चयो – अनिदस्सनअप्पटिघा हेतू सम्पयुत्तकानं खन्धानं अनिदस्सनअप्पटिघानञ्च चित्तसमुट्ठानानं रूपानं हेतुपच्चयेन पच्चयो. पटिसन्धिक्खणे अनिदस्सनअप्पटिघा हेतू सम्पयुत्तकानं खन्धानं अनिदस्सनअप्पटिघानञ्च कटत्तारूपानं हेतुपच्चयेन पच्चयो. (१)

अनिदस्सनअप्पटिघो धम्मो सनिदस्सनसप्पटिघस्स धम्मस्स हेतुपच्चयेन पच्चयो – अनिदस्सनअप्पटिघा हेतू सनिदस्सनसप्पटिघानं चित्तसमुट्ठानानं रूपानं हेतुपच्चयेन पच्चयो. पटिसन्धिक्खणे…पे…. (२)

(अनिदस्सनअप्पटिघमूलकेयेव इमिना कारणेन सत्त पञ्हा विभजितब्बा.)

आरम्मणपच्चयो

३०. सनिदस्सनसप्पटिघो धम्मो अनिदस्सनअप्पटिघस्स धम्मस्स आरम्मणपच्चयेन पच्चयो – रूपे अनिच्चतो दुक्खतो अनत्ततो विपस्सति, अस्सादेति अभिनन्दति, तं आरब्भ रागो उप्पज्जति, दिट्ठि उप्पज्जति, विचिकिच्छा उप्पज्जति, उद्धच्चं उप्पज्जति, दोमनस्सं उप्पज्जति, दिब्बेन चक्खुना रूपं पस्सति, रूपायतनं चक्खुविञ्ञाणस्स आरम्मणपच्चयेन पच्चयो. सनिदस्सनसप्पटिघा खन्धा इद्धिविधञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अनिदस्सनसप्पटिघो धम्मो अनिदस्सनअप्पटिघस्स धम्मस्स आरम्मणपच्चयेन पच्चयो. चक्खुं…पे… कायं… सद्दे… गन्धे… रसे… फोट्ठब्बे… अनिच्चतो…पे… दोमनस्सं उप्पज्जति, दिब्बाय सोतधातुया सद्दं सुणाति, सद्दायतनं सोतविञ्ञाणस्स…पे… फोट्ठब्बायतनं कायविञ्ञाणस्स…पे… अनिदस्सनसप्पटिघा खन्धा इद्धिविधञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

३१. अनिदस्सनअप्पटिघो धम्मो अनिदस्सनअप्पटिघस्स धम्मस्स आरम्मणपच्चयेन पच्चयो – दानं दत्वा सीलं समादियित्वा उपोसथकम्मं कत्वा तं पच्चवेक्खति, पुब्बे सुचिण्णानि पच्चवेक्खति, झाना…पे… अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, निब्बानं पच्चवेक्खन्ति, निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो. अरिया पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति…पे… वत्थुं… इत्थिन्द्रियं… पुरिसिन्द्रियं… जीवितिन्द्रियं… आपोधातुं… कबळीकारं आहारं… अनिदस्सनअप्पटिघे खन्धे अनिच्चतो…पे… दोमनस्सं उप्पज्जति, चेतोपरियञाणेन अनिदस्सनअप्पटिघचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स आरम्मणपच्चयेन पच्चयो. आकिञ्चञ्ञायतनं नेवसञ्ञानासञ्ञायतनस्स…पे… अनिदस्सनअप्पटिघा खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अधिपतिपच्चयो

३२. सनिदस्सनसप्पटिघो धम्मो अनिदस्सनअप्पटिघस्स धम्मस्स अधिपतिपच्चयेन पच्चयो. आरम्मणाधिपति – रूपं गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. (१)

अनिदस्सनसप्पटिघो धम्मो अनिदस्सनअप्पटिघस्स धम्मस्स अधिपतिपच्चयेन पच्चयो. आरम्मणाधिपति – चक्खुं…पे… कायं… सद्दे… गन्धे… रसे… फोट्ठब्बे… गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. (१)

३३. अनिदस्सनअप्पटिघो धम्मो अनिदस्सनअप्पटिघस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा सीलं समादियित्वा उपोसथकम्मं कत्वा तं गरुं कत्वा…पे… झाना वुट्ठहित्वा…पे… अरिया मग्गा वुट्ठहित्वा…पे… फला वुट्ठहित्वा…पे… फलं गरुं कत्वा…पे… निब्बानं गरुं कत्वा… निब्बानं गोत्रभुस्स, वोदानस्स, मग्गस्स, फलस्स अधिपतिपच्चयेन पच्चयो. वत्थुं… इत्थिन्द्रियं… पुरिसिन्द्रियं… जीवितिन्द्रियं… आपोधातुं… कबळीकारं आहारं… अनिदस्सनअप्पटिघे खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – अनिदस्सनअप्पटिघाधिपति सम्पयुत्तकानं खन्धानं अनिदस्सनअप्पटिघानञ्च चित्तसमुट्ठानानं रूपानं अधिपतिपच्चयेन पच्चयो. (१)

अनिदस्सनअप्पटिघो धम्मो सनिदस्सनसप्पटिघस्स धम्मस्स अधिपतिपच्चयेन पच्चयो. सहजाताधिपति – अनिदस्सनअप्पटिघाधिपति सनिदस्सनसप्पटिघानं चित्तसमुट्ठानानं रूपानं अधिपतिपच्चयेन पच्चयो. (२)

(अनिदस्सनअप्पटिघमूलके सत्तपि पञ्हा विभजितब्बा, अधिपति तिविधरूपसङ्गहेन.)

अनन्तरपच्चयो

३४. अनिदस्सनअप्पटिघो धम्मो अनिदस्सनअप्पटिघस्स धम्मस्स अनन्तरपच्चयेन पच्चयो – पुरिमा पुरिमा अनिदस्सनअप्पटिघा खन्धा पच्छिमानं पच्छिमानं अनिदस्सनअप्पटिघानं खन्धानं अनन्तरपच्चयेन पच्चयो. अनुलोमं गोत्रभुस्स… अनुलोमं वोदानस्स… गोत्रभु मग्गस्स… वोदानं मग्गस्स… मग्गो फलस्स… फलं फलस्स… अनुलोमं फलसमापत्तिया… निरोधा वुट्ठहन्तस्स नेवसञ्ञानासञ्ञायतनं फलसमापत्तिया अनन्तरपच्चयेन पच्चयो. (१)

समनन्तरपच्चयो

३५. अनिदस्सनअप्पटिघो धम्मो अनिदस्सनअप्पटिघस्स धम्मस्स समनन्तरपच्चयेन पच्चयो (अनन्तरसदिसं).

सहजातपच्चयादि

३६. अनिदस्सनसप्पटिघो धम्मो अनिदस्सनसप्पटिघस्स धम्मस्स सहजातपच्चयेन पच्चयो (पटिच्चवारसदिसं साधुकं कातब्बं. अञ्ञमञ्ञपच्चये पटिच्चवारे अञ्ञमञ्ञसदिसं, निस्सयपच्चये पटिच्चवारसदिसं).

उपनिस्सयपच्चयो

३७. सनिदस्सनसप्पटिघो धम्मो अनिदस्सनअप्पटिघस्स धम्मस्स उपनिस्सयपच्चयेन पच्चयो – आरम्मणूपनिस्सयो, पकतूपनिस्सयो…पे…. पकतूपनिस्सयो – वण्णसम्पदं पत्थयमानो दानं देति, सीलं समादियति, उपोसथकम्मं…पे… वण्णसम्पदा सद्धाय…पे… पञ्ञाय, रागस्स…पे… पत्थनाय, कायिकस्स सुखस्स, कायिकस्स दुक्खस्स, मग्गस्स, फलसमापत्तिया उपनिस्सयपच्चयेन पच्चयो. (१)

अनिदस्सनसप्पटिघो धम्मो अनिदस्सनअप्पटिघस्स धम्मस्स उपनिस्सयपच्चयेन पच्चयो – आरम्मणूपनिस्सयो, पकतूपनिस्सयो…पे…. पकतूपनिस्सयो – चक्खुसम्पदं पत्थयमानो…पे… कायसम्पदं… सद्दसम्पदं…पे… फोट्ठब्बसम्पदं पत्थयमानो दानं देति, सीलं समादियति, उपोसथकम्मं… उतुं… सेनासनं उपनिस्साय दानं देति सीलं समादियति. उपोसथकम्मं, झानं… विपस्सनं… मग्गं… अभिञ्ञं… समापत्तिं उप्पादेति पाणं हनति…पे… सङ्घं भिन्दति. चक्खुसम्पदा…पे… फोट्ठब्बसम्पदा, उतु, सेनासनं सद्धाय…पे… पञ्ञाय, रागस्स…पे… पत्थनाय, कायिकस्स सुखस्स, कायिकस्स दुक्खस्स, मग्गस्स, फलसमापत्तिया उपनिस्सयपच्चयेन पच्चयो. (१)

३८. अनिदस्सनअप्पटिघो धम्मो अनिदस्सनअप्पटिघस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति, सीलं समादियति, उपोसथकम्मं… झानं… समापत्तिं उप्पादेति, मानं जप्पेति, दिट्ठिं गण्हाति. सीलं…पे… पञ्ञं… रागं…पे… पत्थनं, कायिकं सुखं… कायिकं दुक्खं… भोजनं उपनिस्साय दानं देति…पे… सङ्घं भिन्दति. सद्धा …पे… पञ्ञा, रागो…पे… पत्थना, कायिकं सुखं… कायिकं दुक्खं… भोजनं सद्धाय…पे… पञ्ञाय, मग्गस्स, फलसमापत्तिया उपनिस्सयपच्चयेन पच्चयो. (१)

पुरेजातपच्चयो

३९. सनिदस्सनसप्पटिघो धम्मो अनिदस्सनअप्पटिघस्स धम्मस्स पुरेजातपच्चयेन पच्चयो. आरम्मणपुरेजातं – रूपे अनिच्चतो दुक्खतो अनत्ततो विपस्सति, अस्सादेति अभिनन्दति, तं आरब्भ रागो उप्पज्जति, दिट्ठि…पे… विचिकिच्छा…पे… उद्धच्चं…पे… दोमनस्सं उप्पज्जति, दिब्बेन चक्खुना रूपं पस्सति, रूपायतनं चक्खुविञ्ञाणस्स पुरेजातपच्चयेन पच्चयो. (१)

अनिदस्सनसप्पटिघो धम्मो अनिदस्सनअप्पटिघस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… कायं… सद्दे…पे… फोट्ठब्बे अनिच्चतो…पे… दोमनस्सं उप्पज्जति, दिब्बाय सोतधातुया सद्दं सुणाति, सद्दायतनं सोतविञ्ञाणस्स…पे… फोट्ठब्बायतनं कायविञ्ञाणस्स पुरेजातपच्चयेन पच्चयो. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स पुरेजातपच्चयेन पच्चयो. (१)

अनिदस्सनअप्पटिघो धम्मो अनिदस्सनअप्पटिघस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – वत्थुं… इत्थिन्द्रियं… पुरिसिन्द्रियं… जीवितिन्द्रियं… आपोधातुं… कबळीकारं आहारं… अनिच्चतो…पे… दोमनस्सं उप्पज्जति. वत्थुपुरेजातं – वत्थु अनिदस्सनअप्पटिघानं खन्धानं पुरेजातपच्चयेन पच्चयो. (१)

४०. सनिदस्सनसप्पटिघो च अनिदस्सनअप्पटिघो च धम्मा अनिदस्सनअप्पटिघस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. रूपायतनञ्च वत्थु च अनिदस्सनअप्पटिघानं खन्धानं पुरेजातपच्चयेन पच्चयो. (१)

अनिदस्सनसप्पटिघो च अनिदस्सनअप्पटिघो च धम्मा अनिदस्सनअप्पटिघस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. चक्खायतनञ्च वत्थु च…पे… फोट्ठब्बायतनञ्च वत्थु च अनिदस्सनअप्पटिघानं खन्धानं पुरेजातपच्चयेन पच्चयो. (१)

सनिदस्सनसप्पटिघो च अनिदस्सनअप्पटिघो च धम्मा अनिदस्सनअप्पटिघस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. रूपायतनञ्च चक्खायतनञ्च चक्खुविञ्ञाणस्स पुरेजातपच्चयेन पच्चयो. (१)

पच्छाजातपच्चयो

४१. अनिदस्सनअप्पटिघो धम्मो अनिदस्सनअप्पटिघस्स धम्मस्स पच्छाजातपच्चयेन पच्चयो – पच्छाजाता अनिदस्सनअप्पटिघा खन्धा पुरेजातस्स इमस्स अनिदस्सनअप्पटिघस्स कायस्स पच्छाजातपच्चयेन पच्चयो. (१)

अनिदस्सनअप्पटिघो धम्मो सनिदस्सनसप्पटिघस्स धम्मस्स पच्छाजातपच्चयेन पच्चयो – पच्छाजाता अनिदस्सनअप्पटिघा खन्धा पुरेजातस्स इमस्स सनिदस्सनसप्पटिघस्स कायस्स पच्छाजातपच्चयेन पच्चयो. (२)

(एवं सत्त पञ्हा विभजितब्बा, तिविधरूपसङ्गहो.) (७)

आसेवनपच्चयो

४२. अनिदस्सनअप्पटिघो धम्मो अनिदस्सनअप्पटिघस्स धम्मस्स आसेवनपच्चयेन पच्चयो – पुरिमा पुरिमा अनिदस्सनअप्पटिघा खन्धा पच्छिमानं पच्छिमानं अनिदस्सनअप्पटिघानं खन्धानं आसेवनपच्चयेन पच्चयो. अनुलोमं गोत्रभुस्स… अनुलोमं वोदानस्स… गोत्रभु मग्गस्स… वोदानं मग्गस्स आसेवनपच्चयेन पच्चयो. (१)

कम्मपच्चयो

४३. अनिदस्सनअप्पटिघो धम्मो अनिदस्सनअप्पटिघस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – अनिदस्सनअप्पटिघा चेतना सम्पयुत्तकानं खन्धानं अनिदस्सनअप्पटिघानञ्च चित्तसमुट्ठानानं रूपानं कम्मपच्चयेन पच्चयो. पटिसन्धिक्खणे…पे…. नानाक्खणिका – अनिदस्सनअप्पटिघा चेतना विपाकानं खन्धानं अनिदस्सनअप्पटिघानञ्च कटत्तारूपानं कम्मपच्चयेन पच्चयो. (१)

अनिदस्सनअप्पटिघो धम्मो सनिदस्सनसप्पटिघस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – अनिदस्सनअप्पटिघा चेतना सनिदस्सनसप्पटिघानं चित्तसमुट्ठानानं रूपानं कम्मपच्चयेन पच्चयो. पटिसन्धिक्खणे…पे…. नानाक्खणिका – अनिदस्सनअप्पटिघा चेतना सनिदस्सनसप्पटिघानं कटत्तारूपानं कम्मपच्चयेन पच्चयो. (२)

(एवं सत्त पञ्हा सहजाता नानाक्खणिका इमिना कारणेन विभजितब्बा, तिविधरूपसङ्गहो.) (७)

विपाकपच्चयो

४४. अनिदस्सनअप्पटिघो धम्मो अनिदस्सनअप्पटिघस्स धम्मस्स विपाकपच्चयेन पच्चयो – विपाको अनिदस्सनअप्पटिघो एको खन्धो तिण्णन्नं खन्धानं अनिदस्सनअप्पटिघानं चित्तसमुट्ठानानञ्च रूपानं विपाकपच्चयेन पच्चयो…पे… द्वे खन्धा…पे… पटिसन्धिक्खणे अनिदस्सनअप्पटिघो एको खन्धो तिण्णन्नं खन्धानं अनिदस्सनअप्पटिघानञ्च कटत्तारूपानं विपाकपच्चयेन पच्चयो…पे… खन्धा वत्थुस्स विपाकपच्चयेन पच्चयो. (१)

अनिदस्सनअप्पटिघो धम्मो सनिदस्सनसप्पटिघस्स धम्मस्स विपाकपच्चयेन पच्चयो – विपाका अनिदस्सनअप्पटिघा खन्धा सनिदस्सनसप्पटिघानं चित्तसमुट्ठानानं रूपानं विपाकपच्चयेन पच्चयो. पटिसन्धिक्खणे अनिदस्सनअप्पटिघा खन्धा सनिदस्सनसप्पटिघानं कटत्तारूपानं विपाकपच्चयेन पच्चयो. (२)

(एवं सत्त पञ्हा वित्थारेतब्बा, पवत्तिपटिसन्धि.) (७)

आहारपच्चयो

४५. अनिदस्सनअप्पटिघो धम्मो अनिदस्सनअप्पटिघस्स धम्मस्स आहारपच्चयेन पच्चयो – अनिदस्सनअप्पटिघा आहारा सम्पयुत्तकानं खन्धानं अनिदस्सनअप्पटिघानञ्च चित्तसमुट्ठानानं रूपानं आहारपच्चयेन पच्चयो. पटिसन्धिक्खणे अनिदस्सनअप्पटिघा आहारा सम्पयुत्तकानं खन्धानं अनिदस्सनअप्पटिघानञ्च कटत्तारूपानं आहारपच्चयेन पच्चयो. कबळीकारो आहारो इमस्स अनिदस्सनअप्पटिघस्स कायस्स आहारपच्चयेन पच्चयो. (१)

अनिदस्सनअप्पटिघो धम्मो सनिदस्सनसप्पटिघस्स धम्मस्स आहारपच्चयेन पच्चयो – अनिदस्सनअप्पटिघा आहारा सनिदस्सनसप्पटिघानं चित्तसमुट्ठानानं रूपानं आहारपच्चयेन पच्चयो. पटिसन्धिक्खणे अनिदस्सनअप्पटिघा आहारा सनिदस्सनसप्पटिघानं कटत्तारूपानं आहारपच्चयेन पच्चयो. कबळीकारो आहारो इमस्स सनिदस्सनसप्पटिघस्स कायस्स आहारपच्चयेन पच्चयो. (२)

(एवं सत्त पञ्हा पवत्तिपटिसन्धि विभजितब्बा, सत्तसुपि कबळीकारो आहारो कातब्बो.) (७)

इन्द्रियपच्चयो

४६. अनिदस्सनसप्पटिघो धम्मो अनिदस्सनअप्पटिघस्स धम्मस्स इन्द्रियपच्चयेन पच्चयो – चक्खुन्द्रियं चक्खुविञ्ञाणस्स…पे… कायिन्द्रियं कायविञ्ञाणस्स इन्द्रियपच्चयेन पच्चयो. (१)

अनिदस्सनअप्पटिघो धम्मो अनिदस्सनअप्पटिघस्स धम्मस्स इन्द्रियपच्चयेन पच्चयो – अनिदस्सनअप्पटिघा इन्द्रिया सम्पयुत्तकानं खन्धानं अनिदस्सनअप्पटिघानं चित्तसमुट्ठानानञ्च रूपानं इन्द्रियपच्चयेन पच्चयो. पटिसन्धिक्खणे अनिदस्सनअप्पटिघा इन्द्रिया सम्पयुत्तकानं खन्धानं अनिदस्सनअप्पटिघानञ्च कटत्तारूपानं इन्द्रियपच्चयेन पच्चयो. रूपजीवितिन्द्रियं अनिदस्सनअप्पटिघानं कटत्तारूपानं इन्द्रियपच्चयेन पच्चयो. (१)

अनिदस्सनअप्पटिघो धम्मो सनिदस्सनसप्पटिघस्स धम्मस्स इन्द्रियपच्चयेन पच्चयो – अनिदस्सनअप्पटिघा इन्द्रिया सनिदस्सनसप्पटिघानं चित्तसमुट्ठानानं रूपानं इन्द्रियपच्चयेन पच्चयो. पटिसन्धिक्खणे अनिदस्सनअप्पटिघा इन्द्रिया सनिदस्सनसप्पटिघानं कटत्तारूपानं इन्द्रियपच्चयेन पच्चयो. रूपजीवितिन्द्रियं सनिदस्सनसप्पटिघानं कटत्तारूपानं इन्द्रियपच्चयेन पच्चयो. (२)

(एवं पवत्तिपटिसन्धि सत्त पञ्हा विभजितब्बा, रूपजीवितिन्द्रियञ्च अन्ते अन्ते.) (७)

४७. अनिदस्सनसप्पटिघो च अनिदस्सनअप्पटिघो च धम्मा अनिदस्सनअप्पटिघस्स धम्मस्स इन्द्रियपच्चयेन पच्चयो – चक्खुन्द्रियञ्च चक्खुविञ्ञाणञ्च चक्खुविञ्ञाणसहगतानं खन्धानं इन्द्रियपच्चयेन पच्चयो…पे… कायिन्द्रियञ्च कायविञ्ञाणञ्च कायविञ्ञाणसहगतानं खन्धानं इन्द्रियपच्चयेन पच्चयो. (१)

झानपच्चयादि

४८. अनिदस्सनअप्पटिघो धम्मो अनिदस्सनअप्पटिघस्स धम्मस्स झानपच्चयेन पच्चयो… मग्गपच्चयेन पच्चयो… सम्पयुत्तपच्चयेन पच्चयो – अनिदस्सनअप्पटिघो एको खन्धो तिण्णन्नं खन्धानं सम्पयुत्तपच्चयेन पच्चयो…पे… द्वे खन्धा…पे… पटिसन्धिक्खणे…पे….

विप्पयुत्तपच्चयो

४९. अनिदस्सनसप्पटिघो धम्मो अनिदस्सनअप्पटिघस्स धम्मस्स विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स विप्पयुत्तपच्चयेन पच्चयो. (१)

अनिदस्सनअप्पटिघो धम्मो अनिदस्सनअप्पटिघस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजाता – अनिदस्सनअप्पटिघा खन्धा अनिदस्सनअप्पटिघानं चित्तसमुट्ठानानं रूपानं विप्पयुत्तपच्चयेन पच्चयो. पटिसन्धिक्खणे अनिदस्सनअप्पटिघा खन्धा अनिदस्सनअप्पटिघानं कटत्तारूपानं विप्पयुत्तपच्चयेन पच्चयो. खन्धा वत्थुस्स विप्पयुत्तपच्चयेन पच्चयो. वत्थु खन्धानं विप्पयुत्तपच्चयेन पच्चयो. पुरेजातं – वत्थु अनिदस्सनअप्पटिघानं खन्धानं विप्पयुत्तपच्चयेन पच्चयो. पच्छाजाता – अनिदस्सनअप्पटिघा खन्धा पुरेजातस्स इमस्स अनिदस्सनअप्पटिघस्स कायस्स विप्पयुत्तपच्चयेन पच्चयो. (१)

अनिदस्सनअप्पटिघो धम्मो सनिदस्सनसप्पटिघस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – अनिदस्सनअप्पटिघा खन्धा सनिदस्सनसप्पटिघानं चित्तसमुट्ठानानं रूपानं विप्पयुत्तपच्चयेन पच्चयो. पटिसन्धिक्खणे अनिदस्सनअप्पटिघा खन्धा सनिदस्सनसप्पटिघानं कटत्तारूपानं विप्पयुत्तपच्चयेन पच्चयो. पच्छाजाता – अनिदस्सनअप्पटिघा खन्धा पुरेजातस्स इमस्स सनिदस्सनसप्पटिघस्स कायस्स विप्पयुत्तपच्चयेन पच्चयो. (२)

(अवसेसा पञ्च पञ्हा एवं वित्थारेतब्बा. सहजाता, पच्छाजाता.)

अत्थिपच्चयो

५०. सनिदस्सनसप्पटिघो धम्मो अनिदस्सनअप्पटिघस्स धम्मस्स अत्थिपच्चयेन पच्चयो. पुरेजातं – रूपे अनिच्चतो…पे… दोमनस्सं उप्पज्जति, दिब्बेन चक्खुना रूपं पस्सति, रूपायतनं चक्खुविञ्ञाणस्स अत्थिपच्चयेन पच्चयो. (१)

५१. अनिदस्सनसप्पटिघो धम्मो अनिदस्सनसप्पटिघस्स धम्मस्स अत्थिपच्चयेन पच्चयो – अनिदस्सनसप्पटिघं एकं महाभूतं द्विन्नं महाभूतानं अत्थिपच्चयेन पच्चयो. द्वे महाभूता एकस्स महाभूतस्स अत्थिपच्चयेन पच्चयो. अनिदस्सनसप्पटिघा महाभूता अनिदस्सनसप्पटिघानं चित्तसमुट्ठानानं रूपानं कटत्तारूपानं उपादारूपानं अत्थिपच्चयेन पच्चयो. फोट्ठब्बायतनं चक्खायतनस्स…पे… रसायतनस्स अत्थिपच्चयेन पच्चयो. बाहिरं… आहारसमुट्ठानं… उतुसमुट्ठानं… एकं महाभूतं द्विन्नं महाभूतानं अत्थिपच्चयेन पच्चयो. द्वे महाभूता एकस्स महाभूतस्स अत्थिपच्चयेन पच्चयो. उतुसमुट्ठाना महाभूता अनिदस्सनसप्पटिघानं उपादारूपानं अत्थिपच्चयेन पच्चयो. असञ्ञसत्तानं अनिदस्सनसप्पटिघं एकं महाभूतं द्विन्नं महाभूतानं अत्थिपच्चयेन पच्चयो. द्वे महाभूता…पे…. (१)

अनिदस्सनसप्पटिघो धम्मो सनिदस्सनसप्पटिघस्स धम्मस्स अत्थिपच्चयेन पच्चयो. (२)

(पटिच्चवारे निस्सयपच्चयसदिसं.)

अनिदस्सनसप्पटिघो धम्मो अनिदस्सनअप्पटिघस्स धम्मस्स अत्थिपच्चयेन पच्चयो – सहजातं, पुरेजातं. सहजाता – अनिदस्सनसप्पटिघा महाभूता अनिदस्सनअप्पटिघानं चित्तसमुट्ठानानं रूपानं कटत्तारूपानं उपादारूपानं अत्थिपच्चयेन पच्चयो (याव असञ्ञसत्ता वित्थारेतब्बा). पुरेजातं – चक्खुं…पे… कायं, सद्दे…पे… फोट्ठब्बे अनिच्चतो…पे… दोमनस्सं उप्पज्जति, चक्खायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स अत्थिपच्चयेन पच्चयो. (३)

(अवसेसा चत्तारो पञ्हा वित्थारेतब्बा. पटिच्चवारे सहजातपच्चयसदिसा, निन्नानाकरणा.) (७)

५२. अनिदस्सनअप्पटिघो धम्मो अनिदस्सनअप्पटिघस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजातो – अनिदस्सनअप्पटिघो एको खन्धो तिण्णन्नं खन्धानं अनिदस्सनअप्पटिघानं चित्तसमुट्ठानानञ्च रूपानं अत्थिपच्चयेन पच्चयो. द्वे खन्धा…पे… पटिसन्धिक्खणे…पे… आपोधातु अनिदस्सनअप्पटिघानं चित्तसमुट्ठानानं रूपानं कटत्तारूपानं उपादारूपानं…पे… आपोधातु इत्थिन्द्रियस्स…पे… कबळीकाराहारस्स च अत्थिपच्चयेन पच्चयो. बाहिरं… आहारसमुट्ठानं… उतुसमुट्ठानं… असञ्ञसत्तानं आपोधातु अनिदस्सनअप्पटिघानं कटत्तारूपानं उपादारूपानं अत्थिपच्चयेन पच्चयो. पुरेजातं – वत्थुं… इत्थिन्द्रियं… पुरिसिन्द्रियं… जीवितिन्द्रियं… आपोधातुं… कबळीकारं आहारं… अनिच्चतो…पे… दोमनस्सं उप्पज्जति, वत्थु अनिदस्सनअप्पटिघानं खन्धानं अत्थिपच्चयेन पच्चयो. पच्छाजाता – अनिदस्सनअप्पटिघा खन्धा पुरेजातस्स इमस्स अनिदस्सनअप्पटिघस्स कायस्स अत्थिपच्चयेन पच्चयो. कबळीकारो आहारो इमस्स अनिदस्सनअप्पटिघस्स कायस्स अत्थिपच्चयेन पच्चयो. रूपजीवितिन्द्रियं अनिदस्सनअप्पटिघानं कटत्तारूपानं अत्थिपच्चयेन पच्चयो (एवं अवसेसा छ पञ्हा विभजितब्बा. सहजातं, पच्छाजातं, आहारं, इन्द्रियम्पि कातब्बा). (७)

५३. सनिदस्सनसप्पटिघो च अनिदस्सनअप्पटिघो च धम्मा अनिदस्सनअप्पटिघस्स धम्मस्स अत्थिपच्चयेन पच्चयो. पुरेजातं – रूपायतनञ्च वत्थु च अनिदस्सनअप्पटिघानं खन्धानं अत्थिपच्चयेन पच्चयो. (१)

अनिदस्सनसप्पटिघो च अनिदस्सनअप्पटिघो च धम्मा सनिदस्सनसप्पटिघस्स धम्मस्स अत्थिपच्चयेन पच्चयो – अनिदस्सनअप्पटिघा खन्धा च महाभूता च सनिदस्सनसप्पटिघानं चित्तसमुट्ठानानं रूपानं अत्थिपच्चयेन पच्चयो. पटिसन्धिक्खणे… (संखित्तं, असञ्ञसत्तानञ्च कातब्बा). (१)

अनिदस्सनसप्पटिघो च अनिदस्सनअप्पटिघो च धम्मा अनिदस्सनसप्पटिघस्स धम्मस्स अत्थिपच्चयेन पच्चयो (संखित्तं). (२)

५४. अनिदस्सनसप्पटिघो च अनिदस्सनअप्पटिघो च धम्मा अनिदस्सनअप्पटिघस्स धम्मस्स अत्थिपच्चयेन पच्चयो – सहजातं, पुरेजातं. सहजाता – अनिदस्सनअप्पटिघा खन्धा च महाभूता च अनिदस्सनअप्पटिघानं चित्तसमुट्ठानानं रूपानं…पे… (याव असञ्ञसत्ता कातब्बा). पुरेजातं – चक्खायतनञ्च वत्थु च…पे… फोट्ठब्बायतनञ्च वत्थु च अनिदस्सनअप्पटिघानं खन्धानं अत्थिपच्चयेन पच्चयो. (३) (अवसेसा चतस्सो पञ्हा विभजितब्बा.) (७)

५५. सनिदस्सनसप्पटिघो च अनिदस्सनसप्पटिघो च धम्मा अनिदस्सनअप्पटिघस्स धम्मस्स अत्थिपच्चयेन पच्चयो. पुरेजातं – रूपायतनञ्च चक्खायतनञ्च चक्खुविञ्ञाणस्स अत्थिपच्चयेन पच्चयो. (१)

सनिदस्सनसप्पटिघो च अनिदस्सनसप्पटिघो च अनिदस्सनअप्पटिघो च धम्मा अनिदस्सनअप्पटिघस्स धम्मस्स अत्थिपच्चयेन पच्चयो – सहजातं, पुरेजातं. रूपायतनञ्च चक्खायतनञ्च चक्खुविञ्ञाणञ्च चक्खुविञ्ञाणसहगतानं खन्धानं अत्थिपच्चयेन पच्चयो. (१)

(नत्थिविगतपच्चयं अनन्तरसदिसं. अविगतपच्चयं अत्थिसदिसं.)