१. विभङ्गवारो

हेतुपच्चयो

१. अज्झत्तं धम्मं पटिच्च अज्झत्तो धम्मो उप्पज्जति हेतुपच्चया – अज्झत्तं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे अज्झत्तं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे… खन्धे पटिच्च वत्थु, वत्थुं पटिच्च खन्धा. एकं महाभूतं पटिच्च तयो महाभूता…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

बहिद्धा धम्मं पटिच्च बहिद्धा धम्मो उप्पज्जति हेतुपच्चया – बहिद्धा एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे बहिद्धा एकं खन्धं पटिच्च तयो खन्धा कटत्ता च रूपं…पे… द्वे खन्धे पटिच्च द्वे खन्धा…पे… खन्धे पटिच्च वत्थु, वत्थुं पटिच्च खन्धा. एकं महाभूतं पटिच्च तयो महाभूता…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

आरम्मणपच्चयो

२. अज्झत्तं धम्मं पटिच्च अज्झत्तो धम्मो उप्पज्जति आरम्मणपच्चया – अज्झत्तं एकं खन्धं पटिच्च तयो खन्धा…पे… द्वे खन्धे पटिच्च…पे… पटिसन्धिक्खणे अज्झत्तं एकं खन्धं पटिच्च तयो खन्धा…पे… वत्थुं पटिच्च खन्धा. (१)

बहिद्धा धम्मं पटिच्च बहिद्धा धम्मो उप्पज्जति आरम्मणपच्चया – बहिद्धा एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे… वत्थुं पटिच्च खन्धा. (१)

अधिपतिपच्चयो

३. अज्झत्तं धम्मं पटिच्च अज्झत्तो धम्मो उप्पज्जति अधिपतिपच्चया – अज्झत्तं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… एकं महाभूतं पटिच्च…पे… महाभूते पटिच्च चित्तसमुट्ठानं रूपं उपादारूपं. (१)

बहिद्धा धम्मं पटिच्च बहिद्धा धम्मो उप्पज्जति अधिपतिपच्चया – बहिद्धा एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… एकं महाभूतं पटिच्च…पे… महाभूते पटिच्च चित्तसमुट्ठानं रूपं उपादारूपं. (१)

अनन्तरपच्चयादि

४. अज्झत्तं धम्मं पटिच्च अज्झत्तो धम्मो उप्पज्जति अनन्तरपच्चया, समनन्तरपच्चया, सहजातपच्चया – अज्झत्तं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे अज्झत्तं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे… खन्धे पटिच्च वत्थु, वत्थुं पटिच्च खन्धा. एकं महाभूतं पटिच्च तयो महाभूता…पे… महाभूते पटिच्च चित्तसमुट्ठानं रूपं कटत्तारूपं उपादारूपं. आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च…पे… महाभूते पटिच्च कटत्तारूपं उपादारूपं. (१)

बहिद्धा धम्मं पटिच्च बहिद्धा धम्मो उप्पज्जति सहजातपच्चया – बहिद्धा एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे बहिद्धा एकं खन्धं पटिच्च तयो खन्धा कटत्ता च रूपं…पे… द्वे खन्धे…पे… खन्धे पटिच्च वत्थु, वत्थुं पटिच्च खन्धा. एकं महाभूतं पटिच्च…पे… महाभूते पटिच्च चित्तसमुट्ठानं रूपं कटत्तारूपं उपादारूपं. बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं पटिच्च…पे… महाभूते पटिच्च कटत्तारूपं उपादारूपं. (१)

अञ्ञमञ्ञपच्चयादि

५. अज्झत्तं धम्मं पटिच्च अज्झत्तो धम्मो उप्पज्जति अञ्ञमञ्ञपच्चया… निस्सयपच्चया… उपनिस्सयपच्चया… पुरेजातपच्चया… आसेवनपच्चया (पुरेजातेपि आसेवनेपि पटिसन्धि नत्थि)… कम्मपच्चया… विपाकपच्चया… आहारपच्चया… इन्द्रियपच्चया… झानपच्चया… मग्गपच्चया… सम्पयुत्तपच्चया… विप्पयुत्तपच्चया… अत्थिपच्चया… नत्थिपच्चया… विगतपच्चया… अविगतपच्चया.