१. विभङ्गवारो

हेतुपच्चयो

२७. अज्झत्तो धम्मो अज्झत्तस्स धम्मस्स हेतुपच्चयेन पच्चयो – अज्झत्ता हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. पटिसन्धिक्खणे…पे…. (१)

बहिद्धा धम्मो बहिद्धा धम्मस्स हेतुपच्चयेन पच्चयो – बहिद्धा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. पटिसन्धिक्खणे…पे…. (१)

आरम्मणपच्चयो

२८. अज्झत्तो धम्मो अज्झत्तस्स धम्मस्स आरम्मणपच्चयेन पच्चयो – दानं दत्वा सीलं समादियित्वा उपोसथकम्मं कत्वा तं पच्चवेक्खति, पुब्बे सुचिण्णानि…पे… झाना वुट्ठहित्वा…पे… अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति. अज्झत्तं चक्खुं…पे… कायं… रूपे…पे… फोट्ठब्बे… वत्थुं… अज्झत्ते खन्धे अनिच्चतो दुक्खतो अनत्ततो विपस्सति, अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति. दिब्बेन चक्खुना रूपं पस्सति, दिब्बाय सोतुधातुया सद्दं सुणाति, आकासानञ्चायतनं विञ्ञाणञ्चायतनस्स आरम्मणपच्चयेन पच्चयो. आकिञ्चञ्ञायतनं नेवसञ्ञानासञ्ञायतनस्स आरम्मणपच्चयेन पच्चयो. रूपायतनं…पे… फोट्ठब्बायतनं कायविञ्ञाणस्स आरम्मणपच्चयेन पच्चयो. अज्झत्ता खन्धा इद्धिविधञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अज्झत्तो धम्मो बहिद्धा धम्मस्स आरम्मणपच्चयेन पच्चयो – परो अज्झत्तं चक्खुं…पे… वत्थुं… अज्झत्ते खन्धे अनिच्चतो दुक्खतो अनत्ततो विपस्सति, अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. चेतोपरियञाणेन अज्झत्तचित्तसमङ्गिस्स चित्तं जानाति. अज्झत्तं रूपायतनं बहिद्धा चक्खुविञ्ञाणस्स…पे… अज्झत्तं फोट्ठब्बायतनं बहिद्धा कायविञ्ञाणस्स आरम्मणपच्चयेन पच्चयो. अज्झत्ता खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

२९. बहिद्धा धम्मो बहिद्धा धम्मस्स आरम्मणपच्चयेन पच्चयो – परो दानं दत्वा सीलं समादियित्वा उपोसथकम्मं कत्वा तं पच्चवेक्खति, पुब्बे सुचिण्णानि पच्चवेक्खति, झाना वुट्ठहित्वा…पे… अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति… निब्बानं पच्चवेक्खन्ति. निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो. अरिया पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे…पे… परो बहिद्धा चक्खुं…पे… वत्थुं… बहिद्धा खन्धे अनिच्चतो…पे… दोमनस्सं उप्पज्जति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. चेतोपरियञाणेन बहिद्धा चित्तसमङ्गिस्स…पे… आकासानञ्चायतनं विञ्ञाणञ्चायतनस्स आरम्मणपच्चयेन पच्चयो. आकिञ्चञ्ञायतनं नेवसञ्ञानासञ्ञायतनस्स आरम्मणपच्चयेन पच्चयो. बहिद्धा रूपायतनं बहिद्धा चक्खुविञ्ञाणस्स…पे… बहिद्धा फोट्ठब्बायतनं बहिद्धा कायविञ्ञाणस्स…पे… बहिद्धा खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

बहिद्धा धम्मो अज्झत्तस्स धम्मस्स आरम्मणपच्चयेन पच्चयो – अरिया निब्बानं पच्चवेक्खन्ति. निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो. बहिद्धा चक्खुं…पे… वत्थुं… बहिद्धा खन्धे अनिच्चतो…पे… दोमनस्सं उप्पज्जति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. चेतोपरियञाणेन बहिद्धा चित्तसमङ्गिस्स चित्तं जानाति. बहिद्धा रूपायतनं अज्झत्तं चक्खुविञ्ञाणस्स…पे… बहिद्धा फोट्ठब्बायतनं अज्झत्तं कायविञ्ञाणस्स…पे… बहिद्धा खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

अधिपतिपच्चयो

३०. अज्झत्तो धम्मो अज्झत्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा सीलं समादियित्वा उपोसथकम्मं कत्वा, तं गरुं कत्वा पच्चवेक्खति, पुब्बे सुचिण्णानि गरुं कत्वा…पे… झाना वुट्ठहित्वा झानं गरुं कत्वा…पे… अरिया मग्गा वुट्ठहित्वा मग्गं गरुं कत्वा…पे… फलं गरुं कत्वा पच्चवेक्खन्ति. अज्झत्तं चक्खुं…पे… वत्थुं… अज्झत्ते खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – अज्झत्ताधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

अज्झत्तो धम्मो बहिद्धा धम्मस्स अधिपतिपच्चयेन पच्चयो. आरम्मणाधिपति – परो अज्झत्तं चक्खुं…पे… वत्थुं… अज्झत्ते खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. (२)

३१. बहिद्धा धम्मो बहिद्धा धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – परो दानं दत्वा सीलं समादियित्वा उपोसथकम्मं कत्वा, तं गरुं कत्वा पच्चवेक्खति, पुब्बे सुचिण्णानि गरुं कत्वा…पे… झाना वुट्ठहित्वा…पे… अरिया मग्गा वुट्ठहित्वा मग्गं गरुं कत्वा…पे… फलं गरुं कत्वा…पे… निब्बानं गरुं कत्वा पच्चवेक्खन्ति. निब्बानं गोत्रभुस्स, वोदानस्स, मग्गस्स, फलस्स अधिपतिपच्चयेन पच्चयो. बहिद्धा चक्खुं…पे… वत्थुं… बहिद्धा खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – बहिद्धाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

बहिद्धा धम्मो अज्झत्तस्स धम्मस्स अधिपतिपच्चयेन पच्चयो. आरम्मणाधिपति – अरिया निब्बानं गरुं कत्वा पच्चवेक्खन्ति. निब्बानं गोत्रभुस्स, वोदानस्स, मग्गस्स, फलस्स, अधिपतिपच्चयेन पच्चयो. बहिद्धा चक्खुं…पे… वत्थुं… बहिद्धा खन्धे गरुं कत्वा अस्सादेति, अभिनन्दति, तं गरुं कत्वा रागो…पे… दिट्ठि उप्पज्जति. (२)

अनन्तरपच्चयो

३२. अज्झत्तो धम्मो अज्झत्तस्स धम्मस्स अनन्तरपच्चयेन पच्चयो – पुरिमा पुरिमा अज्झत्ता खन्धा पच्छिमानं पच्छिमानं अज्झत्तानं खन्धानं अनन्तरपच्चयेन पच्चयो. अनुलोमं गोत्रभुस्स, अनुलोमं वोदानस्स, गोत्रभु मग्गस्स, वोदानं मग्गस्स, मग्गो फलस्स, फलं फलस्स, अनुलोमं फलसमापत्तिया, निरोधा वुट्ठहन्तस्स नेवसञ्ञानासञ्ञायतनं फलसमापत्तिया अनन्तरपच्चयेन पच्चयो. (१)

बहिद्धा धम्मो बहिद्धा धम्मस्स अनन्तरपच्चयेन पच्चयो (पुरिमा पुरिमा बहिद्धाति नानाकरणं, तंयेव गमनं). (१)

समनन्तरपच्चयादि

३३. अज्झत्तो धम्मो अज्झत्तस्स धम्मस्स समनन्तरपच्चयेन पच्चयो…पे… (अनन्तरसदिसं)… सहजातपच्चयेन पच्चयो… अञ्ञमञ्ञपच्चयेन पच्चयो… निस्सयपच्चयेन पच्चयो.

उपनिस्सयपच्चयो

३४. अज्झत्तो धम्मो अज्झत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – अज्झत्तं सद्धं उपनिस्साय दानं देति, सीलं समादियति, उपोसथकम्मं…पे… झानं…पे… विपस्सनं…पे… मग्गं…पे… अभिञ्ञं…पे… समापत्तिं उप्पादेति, मानं जप्पेति, दिट्ठिं गण्हाति. अज्झत्तं सीलं…पे… पञ्ञं… रागं…पे… पत्थनं… कायिकं सुखं… कायिकं दुक्खं… उतुं… भोजनं… सेनासनं उपनिस्साय दानं देति…पे… समापत्तिं उप्पादेति, पाणं हनति…पे… सङ्घं भिन्दति. अज्झत्ता सद्धा…पे… पञ्ञा, रागो…पे… पत्थना, कायिकं सुखं… कायिकं दुक्खं… सेनासनं अज्झत्ताय सद्धाय…पे… पञ्ञाय, रागस्स…पे… पत्थनाय, कायिकस्स सुखस्स, कायिकस्स दुक्खस्स, मग्गस्स फलसमापत्तिया उपनिस्सयपच्चयेन पच्चयो. (१)

अज्झत्तो धम्मो बहिद्धा धम्मस्स उपनिस्सयपच्चयेन पच्चयो – आरम्मणूपनिस्सयो, पकतूपनिस्सयो…पे…. पकतूपनिस्सयो – परो अज्झत्तं सद्धं उपनिस्साय दानं देति…पे… मानं जप्पेति, दिट्ठिं गण्हाति. परो अज्झत्तं सीलं…पे… सेनासनं उपनिस्साय दानं देति, पाणं हनति…पे… सङ्घं भिन्दति. अज्झत्ता सद्धा…पे… सेनासनं बहिद्धा सद्धाय…पे… मग्गस्स फलसमापत्तिया उपनिस्सयपच्चयेन पच्चयो. (२)

३५. बहिद्धा धम्मो बहिद्धा धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – परो बहिद्धा सद्धं…पे… पत्थनं, कायिकं सुखं…पे… सेनासनं उपनिस्साय दानं देति…पे… सङ्घं भिन्दति बहिद्धा सद्धा…पे… सेनासनं बहिद्धा सद्धाय…पे… फलसमापत्तिया उपनिस्सयपच्चयेन पच्चयो. (१)

बहिद्धा धम्मो अज्झत्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, पकतूपनिस्सयो…पे…. पकतूपनिस्सयो – बहिद्धा सद्धं…पे… सेनासनं उपनिस्साय दानं देति…पे… सङ्घं भिन्दति. बहिद्धा सद्धा…पे… सेनासनं अज्झत्ताय सद्धाय…पे… फलसमापत्तिया उपनिस्सयपच्चयेन पच्चयो. (२)

पुरेजातपच्चयो

३६. अज्झत्तो धम्मो अज्झत्तस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – अज्झत्तं चक्खुं…पे… वत्थुं अनिच्चतो दुक्खतो अनत्ततो विपस्सति…पे… दोमनस्सं उप्पज्जति, दिब्बेन चक्खुना रूपं पस्सति, दिब्बाय सोतधातुया सद्दं सुणाति, रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स पुरेजातपच्चयेन पच्चयो. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु अज्झत्तानं खन्धानं पुरेजातपच्चयेन पच्चयो. (१)

अज्झत्तो धम्मो बहिद्धा धम्मस्स पुरेजातपच्चयेन पच्चयो. आरम्मणपुरेजातं – परो अज्झत्तं चक्खुं…पे… वत्थुं अनिच्चतो…पे… दोमनस्सं उप्पज्जति, दिब्बेन चक्खुना रूपं पस्सति, दिब्बाय सोतधातुया सद्दं सुणाति. अज्झत्तं रूपायतनं बहिद्धा चक्खुविञ्ञाणस्स…पे… अज्झत्तं फोट्ठब्बायतनं बहिद्धा कायविञ्ञाणस्स पुरेजातपच्चयेन पच्चयो. (२)

३७. बहिद्धा धम्मो बहिद्धा धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – परो बहिद्धा चक्खुं…पे… वत्थुं अनिच्चतो…पे… दिब्बेन चक्खुना रूपं पस्सति, दिब्बाय सोतधातुया सद्दं सुणाति. बहिद्धा रूपायतनं बहिद्धा चक्खुविञ्ञाणस्स…पे… बहिद्धा फोट्ठब्बायतनं बहिद्धा कायविञ्ञाणस्स…पे…. वत्थुपुरेजातं – बहिद्धा चक्खायतनं…पे… कायायतनं…पे… वत्थु बहिद्धा खन्धानं पुरेजातपच्चयेन पच्चयो. (१)

बहिद्धा धम्मो अज्झत्तस्स धम्मस्स पुरेजातपच्चयेन पच्चयो. आरम्मणपुरेजातं – बहिद्धा चक्खुं…पे… वत्थुं अनिच्चतो…पे… दोमनस्सं उप्पज्जति, दिब्बेन चक्खुना रूपं पस्सति, दिब्बाय सोतधातुया सद्दं सुणाति. बहिद्धा रूपायतनं अज्झत्तस्स चक्खुविञ्ञाणस्स…पे… बहिद्धा फोट्ठब्बायतनं अज्झत्तस्स कायविञ्ञाणस्स पुरेजातपच्चयेन पच्चयो. (२)

३८. अज्झत्तो च बहिद्धा च धम्मा अज्झत्तस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. बहिद्धा रूपायतनञ्च अज्झत्तं चक्खायतनञ्च अज्झत्तस्स चक्खुविञ्ञाणस्स पुरेजातपच्चयेन पच्चयो…पे… बहिद्धा फोट्ठब्बायतनञ्च अज्झत्तं कायायतनञ्च अज्झत्तस्स कायविञ्ञाणस्स…पे… बहिद्धा रूपायतनञ्च अज्झत्तं वत्थु च…पे… बहिद्धा फोट्ठब्बायतनञ्च अज्झत्तं वत्थु च अज्झत्तानं खन्धानं पुरेजातपच्चयेन पच्चयो. (१)

अज्झत्तो च बहिद्धा च धम्मा बहिद्धा धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. अज्झत्तं रूपायतनञ्च बहिद्धा चक्खायतनञ्च बहिद्धा चक्खुविञ्ञाणस्स पुरेजातपच्चयेन पच्चयो…पे… अज्झत्तं फोट्ठब्बायतनञ्च बहिद्धा कायायतनञ्च बहिद्धा कायविञ्ञाणस्स पुरेजातपच्चयेन पच्चयो. अज्झत्तं रूपायतनञ्च बहिद्धा वत्थु च…पे… अज्झत्तं फोट्ठब्बायतनञ्च बहिद्धा वत्थु च बहिद्धा खन्धानं पुरेजातपच्चयेन पच्चयो. (२)

पच्छाजातपच्चयो

३९. अज्झत्तो धम्मो अज्झत्तस्स धम्मस्स पच्छाजातपच्चयेन पच्चयो – पच्छाजाता अज्झत्ता खन्धा पुरेजातस्स इमस्स कायस्स पच्छाजातपच्चयेन पच्चयो. (१)

बहिद्धा धम्मो बहिद्धा धम्मस्स पच्छाजातपच्चयेन पच्चयो – पच्छाजाता बहिद्धा खन्धा पुरेजातस्स इमस्स कायस्स पच्छाजातपच्चयेन पच्चयो. (१)

आसेवनपच्चयो

४०. अज्झत्तो धम्मो अज्झत्तस्स धम्मस्स आसेवनपच्चयेन पच्चयो – पुरिमा पुरिमा अज्झत्ता खन्धा पच्छिमानं पच्छिमानं अज्झत्तानं खन्धानं आसेवनपच्चयेन पच्चयो. अनुलोमं गोत्रभुस्स… अनुलोमं वोदानस्स… गोत्रभु मग्गस्स… वोदानं मग्गस्स आसेवनपच्चयेन पच्चयो. (१)

बहिद्धा धम्मो बहिद्धा धम्मस्स आसेवनपच्चयेन पच्चयो – पुरिमा पुरिमा…पे… (अज्झत्तसदिसंयेव).

कम्मपच्चयो

४१. अज्झत्तो धम्मो अज्झत्तस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – अज्झत्ता चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. नानाक्खणिका – अज्झत्ता चेतना विपाकानं अज्झत्तानं खन्धानं कटत्ता च रूपानं कम्मपच्चयेन पच्चयो. (१)

बहिद्धा धम्मो बहिद्धा धम्मस्स कम्मपच्चयेन पच्चयो – सहजाता, नानाक्खणिका. सहजाता – बहिद्धा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. नानाक्खणिका – बहिद्धा चेतना विपाकानं बहिद्धा खन्धानं कटत्ता च रूपानं कम्मपच्चयेन पच्चयो. (१)

विपाकपच्चयो

४२. अज्झत्तो धम्मो अज्झत्तस्स धम्मस्स विपाकपच्चयेन पच्चयो…पे… (परिपुण्णं, पटिच्चवारसदिसं).

आहारपच्चयो

४३. अज्झत्तो धम्मो अज्झत्तस्स धम्मस्स आहारपच्चयेन पच्चयो – अज्झत्ता आहारा सम्पयुत्तकानं खन्धानं चित्तसमुट्ठानानञ्च रूपानं आहारपच्चयेन पच्चयो. पटिसन्धिक्खणे…पे… अज्झत्तो कबळीकारो आहारो अज्झत्तस्स कायस्स आहारपच्चयेन पच्चयो. (१)

अज्झत्तो धम्मो बहिद्धा धम्मस्स आहारपच्चयेन पच्चयो – अज्झत्तो कबळीकारो आहारो बहिद्धा कायस्स आहारपच्चयेन पच्चयो. (२)

बहिद्धा धम्मो बहिद्धा धम्मस्स आहारपच्चयेन पच्चयो (पवत्तिपटिसन्धि) बहिद्धा कबळीकारो आहारो बहिद्धा कायस्स आहारपच्चयेन पच्चयो. (१)

बहिद्धा धम्मो अज्झत्तस्स धम्मस्स आहारपच्चयेन पच्चयो – बहिद्धा कबळीकारो आहारो अज्झत्तस्स कायस्स आहारपच्चयेन पच्चयो. (२)

४४. अज्झत्तो धम्मो च बहिद्धा धम्मो च अज्झत्तस्स धम्मस्स आहारपच्चयेन पच्चयो – अज्झत्तो कबळीकारो आहारो च बहिद्धा कबळीकारो आहारो च अज्झत्तस्स कायस्स आहारपच्चयेन पच्चयो. (१)

अज्झत्तो धम्मो च बहिद्धा धम्मो च बहिद्धा धम्मस्स आहारपच्चयेन पच्चयो – अज्झत्तो कबळीकारो आहारो च बहिद्धा कबळीकारो आहारो च बहिद्धा कायस्स आहारपच्चयेन पच्चयो. (२)

इन्द्रियपच्चयादि

४५. अज्झत्तो धम्मो अज्झत्तस्स धम्मस्स इन्द्रियपच्चयेन पच्चयो, अज्झत्तिका इन्द्रिया (रूपजीवितिन्द्रियम्पि वित्थारेतब्बं)… झानपच्चयेन पच्चयो… मग्गपच्चयेन पच्चयो… सम्पयुत्तपच्चयेन पच्चयो… विप्पयुत्तपच्चयेन पच्चयो – सहजातं, पुरेजातं, पच्छाजातं (मातिकापदानि अनुमज्जन्तेन वित्थारेतब्बानि).

बहिद्धा धम्मो बहिद्धा धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं (संखित्तं).

अत्थिपच्चयो

४६. अज्झत्तो धम्मो अज्झत्तस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजातो – अज्झत्तो एको खन्धो तिण्णन्नं खन्धानं चित्तसमुट्ठानानञ्च रूपानं…पे… द्वे खन्धे…पे… पटिसन्धिक्खणे…पे… खन्धा वत्थुस्स …पे… वत्थु खन्धानं…पे… एकं महाभूतं…पे… असञ्ञसत्तानं एकं महाभूतं तिण्णन्नं महाभूतानं…पे…. पुरेजातं – चक्खुं…पे… वत्थुं (पुरेजातसदिसं), वत्थु अज्झत्तानं खन्धानं अत्थिपच्चयेन पच्चयो. पच्छाजाता – अज्झत्ता खन्धा पुरेजातस्स इमस्स कायस्स अत्थिपच्चयेन पच्चयो. अज्झत्तो कबळीकारो आहारो अज्झत्तस्स कायस्स…पे… रूपजीवितिन्द्रियं कटत्तारूपानं…पे…. (१)

अज्झत्तो धम्मो बहिद्धा धम्मस्स अत्थिपच्चयेन पच्चयो – पुरेजातं, आहारं. पुरेजातं – परो अज्झत्तं चक्खुं…पे… वत्थुं अनिच्चतो…पे… विपस्सति, दिब्बेन चक्खुना रूपं पस्सति, दिब्बाय सोतधातुया सद्दं सुणाति, अज्झत्तं रूपायतनं…पे… फोट्ठब्बायतनं बहिद्धा कायविञ्ञाणस्स अत्थिपच्चयेन पच्चयो. अज्झत्तो कबळीकारो आहारो बहिद्धा कायस्स अत्थिपच्चयेन पच्चयो. (२)

४७. बहिद्धा धम्मो बहिद्धा धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (बहिद्धा निन्नानाकरणं, मातिकापदानि वित्थारेतब्बानि). (१)

बहिद्धा धम्मो अज्झत्तस्स धम्मस्स अत्थिपच्चयेन पच्चयो – पुरेजातं, आहारं. पुरेजातं – बहिद्धा चक्खुं…पे… वत्थुं…पे… दिब्बेन चक्खुना रूपं पस्सति, दिब्बाय सोतधातुया सद्दं सुणाति, बहिद्धा रूपायतनं…पे… फोट्ठब्बायतनं अज्झत्तस्स कायविञ्ञाणस्स अत्थिपच्चयेन पच्चयो. बहिद्धा कबळीकारो आहारो अज्झत्तस्स कायस्स अत्थिपच्चयेन पच्चयो. (२)

४८. अज्झत्तो धम्मो च बहिद्धा धम्मो च अज्झत्तस्स धम्मस्स अत्थिपच्चयेन पच्चयो – पुरेजातं, आहारं. पुरेजातं – बहिद्धा रूपायतनञ्च अज्झत्तं चक्खु च अज्झत्तस्स चक्खुविञ्ञाणस्स…पे… बहिद्धा फोट्ठब्बायतनञ्च अज्झत्तं कायायतनञ्च अज्झत्तस्स कायविञ्ञाणस्स अत्थिपच्चयेन पच्चयो. बहिद्धा रूपायतनञ्च अज्झत्तं वत्थु च…पे… बहिद्धा फोट्ठब्बायतनञ्च अज्झत्तं वत्थु च अज्झत्तानं खन्धानं अत्थिपच्चयेन पच्चयो. आहारं – अज्झत्तो कबळीकारो आहारो च बहिद्धा कबळीकारो आहारो च अज्झत्तस्स कायस्स अत्थिपच्चयेन पच्चयो. (१)

अज्झत्तो धम्मो च बहिद्धा धम्मो च बहिद्धा धम्मस्स अत्थिपच्चयेन पच्चयो – पुरेजातं, आहारं. पुरेजातं – अज्झत्तं रूपायतनञ्च बहिद्धा चक्खायतनञ्च बहिद्धा चक्खुविञ्ञाणस्स अत्थिपच्चयेन पच्चयो…पे… अज्झत्तं फोट्ठब्बायतनञ्च बहिद्धा कायायतनञ्च बहिद्धा कायविञ्ञाणस्स अत्थिपच्चयेन पच्चयो. अज्झत्तं रूपायतनञ्च बहिद्धा वत्थु च बहिद्धा खन्धानं अत्थिपच्चयेन पच्चयो…पे… अज्झत्तं फोट्ठब्बायतनञ्च बहिद्धा वत्थु च बहिद्धा खन्धानं अत्थिपच्चयेन पच्चयो. आहारं – अज्झत्तो कबळीकारो आहारो च बहिद्धा कबळीकारो आहारो च बहिद्धा कायस्स अत्थिपच्चयेन पच्चयो. (२)

नत्थिविगताविगतपच्चया

४९. अज्झत्तो धम्मो अज्झत्तस्स धम्मस्स नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो.