१. विभङ्गवारो

नहेतुपच्चयो

२२. अज्झत्तं धम्मं पच्चया अज्झत्तो धम्मो उप्पज्जति नहेतुपच्चया – अहेतुकं अज्झत्तं एकं खन्धं पच्चया तयो खन्धा…पे… अहेतुकपटिसन्धिक्खणे…पे… खन्धे पच्चया वत्थु, वत्थुं पच्चया खन्धा. एकं महाभूतं…पे… आहारसमुट्ठानं… उतुसमुट्ठानं… असञ्ञसत्तानं…पे… चक्खायतनं…पे… कायायतनं…पे… वत्थुं पच्चया अहेतुका अज्झत्ता खन्धा. विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१)

बहिद्धा धम्मं पच्चया बहिद्धा धम्मो उप्पज्जति नहेतुपच्चया (पवत्तिपटिसन्धिपि महाभूतापि कातब्बा) – चक्खायतनं…पे… कायायतनं…पे… वत्थुं पच्चया अहेतुका बहिद्धा खन्धा. विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१)

नआरम्मणपच्चयादि

२३. नआरम्मणपच्चया… नअधिपतिपच्चया (सहजातसदिसं)… नअनन्तरपच्चया… नसमनन्तरपच्चया… नअञ्ञमञ्ञपच्चया… नउपनिस्सयपच्चया… नपुरेजातपच्चया (पटिच्चवारसदिसं)… नपच्छाजातपच्चया… नआसेवनपच्चया… नकम्मपच्चया…पे… नविप्पयुत्तपच्चया (पटिच्चवारपच्चनीये विप्पयुत्तसदिसं)… नोनत्थिपच्चया… नोविगतपच्चया….