१. विभङ्गवारो

नहेतुपच्चयो

६. अतीतारम्मणं धम्मं पटिच्च अतीतारम्मणो धम्मो उप्पज्जति नहेतुपच्चया – अहेतुकं अतीतारम्मणं एकं खन्धं पटिच्च तयो खन्धा…पे… द्वे खन्धे…पे… अहेतुकपटिसन्धिक्खणे …पे… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

७. अनागतारम्मणं धम्मं पटिच्च अनागतारम्मणो धम्मो उप्पज्जति नहेतुपच्चया – अहेतुकं अनागतारम्मणं एकं खन्धं पटिच्च तयो खन्धा…पे… द्वे खन्धे…पे… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

८. पच्चुप्पन्नारम्मणं धम्मं पटिच्च पच्चुप्पन्नारम्मणो धम्मो उप्पज्जति नहेतुपच्चया – अहेतुकं पच्चुप्पन्नारम्मणं एकं खन्धं पटिच्च तयो खन्धा…पे… द्वे खन्धे…पे… अहेतुकपटिसन्धिक्खणे…पे… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

नअधिपतिपच्चयो

९. अतीतारम्मणं धम्मं पटिच्च अतीतारम्मणो धम्मो उप्पज्जति नअधिपतिपच्चया (अनुलोमसहजातसदिसं).

नपुरेजातपच्चयो

१०. अतीतारम्मणं धम्मं पटिच्च अतीतारम्मणो धम्मो उप्पज्जति नपुरेजातपच्चया – अरूपे अतीतारम्मणं एकं खन्धं पटिच्च…पे… द्वे खन्धे…पे… पटिसन्धिक्खणे…पे…. (१)

अनागतारम्मणं धम्मं पटिच्च अनागतारम्मणो धम्मो उप्पज्जति नपुरेजातपच्चया – अरूपे अनागतारम्मणं एकं खन्धं पटिच्च तयो खन्धा…पे… द्वे खन्धे…पे…. (१)

पच्चुप्पन्नारम्मणं धम्मं पटिच्च पच्चुप्पन्नारम्मणो धम्मो उप्पज्जति नपुरेजातपच्चया – पटिसन्धिक्खणे पच्चुप्पन्नारम्मणं एकं खन्धं पटिच्च…पे… द्वे खन्धे…पे…. (१)

नपच्छाजातपच्चयादि

११. अतीतारम्मणं धम्मं पटिच्च अतीतारम्मणो धम्मो उप्पज्जति नपच्छाजातपच्चया… नआसेवनपच्चया (नअधिपतिसदिसा)… नकम्मपच्चया – अतीतारम्मणे खन्धे पटिच्च अतीतारम्मणा चेतना. (१)

अनागतारम्मणं धम्मं पटिच्च अनागतारम्मणो धम्मो उप्पज्जति नकम्मपच्चया – अनागतारम्मणे खन्धे पटिच्च अनागतारम्मणा चेतना. (१)

पच्चुप्पन्नारम्मणं धम्मं पटिच्च पच्चुप्पन्नारम्मणो धम्मो उप्पज्जति नकम्मपच्चया – पच्चुप्पन्नारम्मणे खन्धे पटिच्च पच्चुप्पन्नारम्मणा चेतना. (१)

नविपाकपच्चयो

१२. अतीतारम्मणं धम्मं पटिच्च अतीतारम्मणो धम्मो उप्पज्जति नविपाकपच्चया…पे… (नविपाके पटिसन्धि नत्थि).

नझानपच्चयो

१३. पच्चुप्पन्नारम्मणं धम्मं पटिच्च पच्चुप्पन्नारम्मणो धम्मो उप्पज्जति नझानपच्चया – पञ्चविञ्ञाणसहगतं एकं खन्धं पटिच्च तयो खन्धा…पे… द्वे खन्धे…पे…. (१)

नमग्गपच्चयो

१४. अतीतारम्मणं धम्मं पटिच्च अतीतारम्मणो धम्मो उप्पज्जति नमग्गपच्चया – अहेतुकं अतीतारम्मणं एकं खन्धं पटिच्च तयो खन्धा…पे… (नहेतुसदिसा तिस्सो पञ्हा, मोहो नत्थि ).

नविप्पयुत्तपच्चयो

१५. अतीतारम्मणं धम्मं पटिच्च अतीतारम्मणो धम्मो उप्पज्जति नविप्पयुत्तपच्चया – अरूपे अतीतारम्मणं एकं खन्धं पटिच्च तयो खन्धा…पे… द्वे खन्धे…पे…. (१)

अनागतारम्मणं धम्मं पटिच्च अनागतारम्मणो धम्मो उप्पज्जति नविप्पयुत्तपच्चया – अरूपे अनागतारम्मणं एकं खन्धं पटिच्च तयो खन्धा…पे… द्वे खन्धे…पे…. (१)