१. विभङ्गवारो

नहेतुपच्चयो

१०. परित्तं धम्मं पटिच्च परित्तो धम्मो उप्पज्जति नहेतुपच्चया – अहेतुकं परित्तं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा; एकं महाभूतं…पे… बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं…पे… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

नआरम्मणपच्चयो

११. परित्तं धम्मं पटिच्च परित्तो धम्मो उप्पज्जति नआरम्मणपच्चया – परित्ते खन्धे पटिच्च चित्तसमुट्ठानं रूपं. पटिसन्धिक्खणे परित्ते खन्धे पटिच्च कटत्तारूपं, खन्धे पटिच्च वत्थु…पे… एकं महाभूतं…पे… बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं…पे…. (१)

महग्गतं धम्मं पटिच्च परित्तो धम्मो उप्पज्जति नआरम्मणपच्चया – महग्गते खन्धे पटिच्च चित्तसमुट्ठानं रूपं. पटिसन्धिक्खणे महग्गते खन्धे पटिच्च कटत्तारूपं. (१)

अप्पमाणं धम्मं पटिच्च परित्तो धम्मो उप्पज्जति नआरम्मणपच्चया – अप्पमाणे खन्धे पटिच्च चित्तसमुट्ठानं रूपं. (१)

परित्तञ्च अप्पमाणञ्च धम्मं पटिच्च परित्तो धम्मो उप्पज्जति नआरम्मणपच्चया – अप्पमाणे खन्धे च महाभूते च पटिच्च चित्तसमुट्ठानं रूपं. (१)

परित्तञ्च महग्गतञ्च धम्मं पटिच्च परित्तो धम्मो उप्पज्जति नआरम्मणपच्चया – महग्गते खन्धे च महाभूते च पटिच्च चित्तसमुट्ठानं रूपं. पटिसन्धिक्खणे महग्गते खन्धे च महाभूते च पटिच्च कटत्तारूपं. (१)

नअधिपतिपच्चयो

१२. परित्तं धम्मं पटिच्च परित्तो धम्मो उप्पज्जति नअधिपतिपच्चया – परित्तं एकं खन्धं पटिच्च तयो खन्धा…पे… पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा; एकं महाभूतं…पे… असञ्ञसत्तानं…पे…. (१)

परित्तं धम्मं पटिच्च महग्गतो धम्मो उप्पज्जति नअधिपतिपच्चया – पटिसन्धिक्खणे वत्थुं पटिच्च महग्गता खन्धा. (२)

परित्तं धम्मं पटिच्च परित्तो च महग्गतो च धम्मा उप्पज्जन्ति नअधिपतिपच्चया – पटिसन्धिक्खणे वत्थुं पटिच्च महग्गता खन्धा, महाभूते पटिच्च कटत्तारूपं. (३)

१३. महग्गतं धम्मं पटिच्च महग्गतो धम्मो उप्पज्जति नअधिपतिपच्चया – महग्गते खन्धे पटिच्च महग्गताधिपति, विपाकं महग्गतं एकं खन्धं पटिच्च…पे… पटिसन्धिक्खणे…पे…. (१)

महग्गतं धम्मं पटिच्च परित्तो धम्मो उप्पज्जति नअधिपतिपच्चया – विपाके महग्गते खन्धे पटिच्च चित्तसमुट्ठानं रूपं. पटिसन्धिक्खणे महग्गते खन्धे पटिच्च कटत्तारूपं. (२)

महग्गतं धम्मं पटिच्च परित्तो च महग्गतो च धम्मा उप्पज्जन्ति नअधिपतिपच्चया – विपाकं महग्गतं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (३)

१४. अप्पमाणं धम्मं पटिच्च अप्पमाणो धम्मो उप्पज्जति नअधिपतिपच्चया – अप्पमाणे खन्धे पटिच्च अप्पमाणाधिपति. (१)

परित्तञ्च महग्गतञ्च धम्मं पटिच्च परित्तो धम्मो उप्पज्जति नअधिपतिपच्चया – विपाके महग्गते खन्धे च महाभूते च पटिच्च चित्तसमुट्ठानं रूपं. पटिसन्धिक्खणे महग्गते खन्धे च महाभूते च पटिच्च कटत्तारूपं. (१)

परित्तञ्च महग्गतञ्च धम्मं पटिच्च महग्गतो धम्मो उप्पज्जति नअधिपतिपच्चया – पटिसन्धिक्खणे महग्गतं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे…. (२)

परित्तञ्च महग्गतञ्च धम्मं पटिच्च परित्तो च महग्गतो च धम्मा उप्पज्जन्ति नअधिपतिपच्चया – पटिसन्धिक्खणे महग्गतं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे… महग्गते खन्धे च महाभूते च पटिच्च कटत्तारूपं. (३)

नअनन्तरपच्चयादि

१५. परित्तं धम्मं पटिच्च परित्तो धम्मो उप्पज्जति नअनन्तरपच्चया… नसमनन्तरपच्चया… नअञ्ञमञ्ञपच्चया… नउपनिस्सयपच्चया.

नपुरेजातपच्चयो

१६. परित्तं धम्मं पटिच्च परित्तो धम्मो उप्पज्जति नपुरेजातपच्चया – अरूपे परित्तं एकं खन्धं पटिच्च तयो खन्धा…पे… द्वे खन्धे…पे… परित्ते खन्धे पटिच्च चित्तसमुट्ठानं रूपं. पटिसन्धिक्खणे परित्तं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे… (सब्बे महाभूता वित्थारेतब्बा, अरूपे परित्तमूलके तिस्सो पञ्हा).

महग्गतं धम्मं पटिच्च महग्गतो धम्मो उप्पज्जति नपुरेजातपच्चया – महग्गतं एकं खन्धं…पे… पटिसन्धिक्खणे…पे…. (१)

महग्गतं धम्मं पटिच्च परित्तो धम्मो उप्पज्जति नपुरेजातपच्चया – महग्गते खन्धे पटिच्च चित्तसमुट्ठानं रूपं. पटिसन्धिक्खणे महग्गते खन्धे पटिच्च कटत्तारूपं. (२)

महग्गतं धम्मं पटिच्च परित्तो च महग्गतो च धम्मा उप्पज्जन्ति नपुरेजातपच्चया – पटिसन्धिक्खणे महग्गतं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे…. (३)

१७. अप्पमाणं धम्मं पटिच्च अप्पमाणो धम्मो उप्पज्जति नपुरेजातपच्चया – अरूपे अप्पमाणं एकं खन्धं…पे…. (१)

अप्पमाणं धम्मं पटिच्च परित्तो धम्मो उप्पज्जति नपुरेजातपच्चया – अप्पमाणे खन्धे पटिच्च चित्तसमुट्ठानं रूपं.(२)

परित्तञ्च अप्पमाणञ्च धम्मं पटिच्च परित्तो धम्मो उप्पज्जति नपुरेजातपच्चया – अप्पमाणे खन्धे च महाभूते च पटिच्च चित्तसमुट्ठानं रूपं. (३)

परित्तञ्च महग्गतञ्च धम्मं पटिच्च परित्तो धम्मो उप्पज्जति नपुरेजातपच्चया – महग्गते खन्धे च महाभूते च पटिच्च चित्तसमुट्ठानं रूपं. पटिसन्धिक्खणे…पे…. (१)

परित्तञ्च महग्गतञ्च धम्मं पटिच्च महग्गतो धम्मो उप्पज्जति नपुरेजातपच्चया – पटिसन्धिक्खणे महग्गतं एकं खन्धञ्च वत्थुञ्च पटिच्च तयो खन्धा…पे…. (२)

परित्तञ्च महग्गतञ्च धम्मं पटिच्च परित्तो च महग्गतो च धम्मा उप्पज्जन्ति नपुरेजातपच्चया – पटिसन्धिक्खणे महग्गतं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे… महग्गते खन्धे च महाभूते च पटिच्च कटत्तारूपं. (३)

नपच्छाजातपच्चयादि

१८. परित्तं धम्मं पटिच्च परित्तो धम्मो उप्पज्जति नपच्छाजातपच्चया… नआसेवनपच्चया – परित्तं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा; एकं महाभूतं…पे… असञ्ञसत्तानं एकं महाभूतं…पे….(१)

परित्तं धम्मं पटिच्च महग्गतो धम्मो उप्पज्जति नआसेवनपच्चया – पटिसन्धिक्खणे वत्थुं पटिच्च महग्गता खन्धा. (२)

परित्तं धम्मं पटिच्च परित्तो च महग्गतो च धम्मा उप्पज्जन्ति नआसेवनपच्चया – पटिसन्धिक्खणे वत्थुं पटिच्च महग्गता खन्धा, महाभूते पटिच्च कटत्तारूपं. (३)

१९. महग्गतं धम्मं पटिच्च महग्गतो धम्मो उप्पज्जति नआसेवनपच्चया – विपाकं महग्गतं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे महग्गतं एकं खन्धं पटिच्च तयो खन्धा…पे…. (१) महग्गतं धम्मं पटिच्च परित्तो धम्मो उप्पज्जति नआसेवनपच्चया – महग्गते खन्धे पटिच्च चित्तसमुट्ठानं रूपं. पटिसन्धिक्खणे…पे…. (२)

महग्गतं धम्मं पटिच्च परित्तो च महग्गतो च धम्मा उप्पज्जन्ति नआसेवनपच्चया – विपाकं महग्गतं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे महग्गतं एकं खन्धं…पे…. (३)

२०. अप्पमाणं धम्मं पटिच्च अप्पमाणो धम्मो उप्पज्जति नआसेवनपच्चया – विपाकं अप्पमाणं एकं खन्धं पटिच्च तयो खन्धा…पे… द्वे खन्धे पटिच्च द्वे खन्धा. (१)

अप्पमाणं धम्मं पटिच्च परित्तो धम्मो उप्पज्जति नआसेवनपच्चया – अप्पमाणे खन्धे पटिच्च चित्तसमुट्ठानं रूपं. (२)

अप्पमाणं धम्मं पटिच्च परित्तो च अप्पमाणो च धम्मा उप्पज्जन्ति नआसेवनपच्चया – विपाकं अप्पमाणं एकं खन्धं पटिच्च तयो खन्धा चित्तसमुट्ठानञ्च रूपं…पे…. (३)

२१. परित्तञ्च अप्पमाणञ्च धम्मं पटिच्च परित्तो धम्मो उप्पज्जति नआसेवनपच्चया – अप्पमाणे खन्धे च महाभूते च पटिच्च चित्तसमुट्ठानं रूपं. (१)

परित्तञ्च महग्गतञ्च धम्मं पटिच्च परित्तो धम्मो उप्पज्जति नआसेवनपच्चया – महग्गते खन्धे च महाभूते च पटिच्च चित्तसमुट्ठानं रूपं. पटिसन्धिक्खणे महग्गते खन्धे च महाभूते च पटिच्च कटत्तारूपं. (१)

परित्तञ्च महग्गतञ्च धम्मं पटिच्च महग्गतो धम्मो उप्पज्जति नआसेवनपच्चया – पटिसन्धिक्खणे महग्गतं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे…. (२)

परित्तञ्च महग्गतञ्च धम्मं पटिच्च परित्तो च महग्गतो च धम्मा उप्पज्जन्ति नआसेवनपच्चया – पटिसन्धिक्खणे महग्गतं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे… महग्गते खन्धे च महाभूते च पटिच्च कटत्तारूपं. (३)

नकम्मपच्चयो

२२. परित्तं धम्मं पटिच्च परित्तो धम्मो उप्पज्जति नकम्मपच्चया – परित्ते खन्धे पटिच्च परित्ता चेतना. बाहिरं… आहारसमुट्ठानं… उतुसमुट्ठानं… एकं महाभूतं…पे…. (१)

महग्गतं धम्मं पटिच्च महग्गतो धम्मो उप्पज्जति नकम्मपच्चया – महग्गते खन्धे पटिच्च महग्गता चेतना. (१)

अप्पमाणं धम्मं पटिच्च अप्पमाणो धम्मो उप्पज्जति नकम्मपच्चया – कुसले अप्पमाणे खन्धे पटिच्च अप्पमाणा चेतना. (१)

नविपाकपच्चयो

२३. परित्तं धम्मं पटिच्च परित्तो धम्मो उप्पज्जति नविपाकपच्चया – परित्तं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… एकं महाभूतं पटिच्च तयो महाभूता…पे… महाभूते पटिच्च चित्तसमुट्ठानं रूपं उपादारूपं; बाहिरं… आहारसमुट्ठानं… उतुसमुट्ठानं… असञ्ञसत्तानं एकं महाभूतं…पे…. (१)

महग्गतं धम्मं पटिच्च महग्गतो धम्मो उप्पज्जति नविपाकपच्चया – महग्गतं एकं खन्धं पटिच्च तयो खन्धा…पे… द्वे खन्धे…पे…. (१)

महग्गतं धम्मं पटिच्च परित्तो धम्मो उप्पज्जति नविपाकपच्चया – महग्गते खन्धे पटिच्च चित्तसमुट्ठानं रूपं. (२)

महग्गतं धम्मं पटिच्च परित्तो च महग्गतो च धम्मा उप्पज्जन्ति नविपाकपच्चया – महग्गतं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

अप्पमाणं धम्मं पटिच्च अप्पमाणो धम्मो उप्पज्जति नविपाकपच्चया – कुसलं अप्पमाणं एकं खन्धं पटिच्च तयो खन्धा…पे…. (१)

अप्पमाणं धम्मं पटिच्च परित्तो धम्मो उप्पज्जति नविपाकपच्चया – कुसले अप्पमाणे खन्धे पटिच्च चित्तसमुट्ठानं रूपं. (२)

अप्पमाणं धम्मं पटिच्च परित्तो च अप्पमाणो च धम्मा उप्पज्जन्ति नविपाकपच्चया – कुसलं अप्पमाणं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

परित्तञ्च अप्पमाणञ्च धम्मं पटिच्च परित्तो धम्मो उप्पज्जति नविपाकपच्चया – कुसले अप्पमाणे खन्धे च महाभूते च पटिच्च चित्तसमुट्ठानं रूपं. (१)

परित्तञ्च महग्गतञ्च धम्मं पटिच्च परित्तो धम्मो उप्पज्जति नविपाकपच्चया – महग्गते खन्धे च महाभूते च पटिच्च चित्तसमुट्ठानं रूपं. (१)

नआहारपच्चयादि

२४. परित्तं धम्मं पटिच्च परित्तो धम्मो उप्पज्जति नआहारपच्चया – बाहिरं… उतुसमुट्ठानं… असञ्ञसत्तानं (वित्थारेतब्बं)… नइन्द्रियपच्चया – बाहिरं… आहारसमुट्ठानं… उतुसमुट्ठानं… असञ्ञसत्तानं…पे… महाभूते पटिच्च रूपजीवितिन्द्रियं, नझानपच्चया – पञ्चविञ्ञाणसहगतं एकं खन्धं…पे… बाहिरं…पे… असञ्ञसत्तानं एकं महाभूतं …पे… (सब्बे महाभूता कातब्बा), नमग्गपच्चया – अहेतुकं परित्तं एकं खन्धं…पे… अहेतुकपटिसन्धिक्खणे एकं…पे… (सब्बे महाभूता कातब्बा) नसम्पयुत्तपच्चया… नविप्पयुत्तपच्चया – अरूपे परित्तं एकं खन्धं पटिच्च तयो खन्धा…पे… द्वे खन्धे…पे… बाहिरं… आहारसमुट्ठानं… उतुसमुट्ठानं… असञ्ञसत्तानं…पे….

महग्गतं धम्मं पटिच्च महग्गतो धम्मो उप्पज्जति नविप्पयुत्तपच्चया – अरूपे महग्गतं एकं खन्धं…पे…. (१)

अप्पमाणं धम्मं पटिच्च अप्पमाणो धम्मो उप्पज्जति नविप्पयुत्तपच्चया – अरूपे अप्पमाणं एकं खन्धं…पे… नोनत्थिपच्चया… नोविगतपच्चया.