१. विभङ्गवारो

हेतुपच्चयो

१. परित्तं धम्मं पटिच्च परित्तो धम्मो उप्पज्जति हेतुपच्चया – परित्तं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे परित्तं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे… खन्धे पटिच्च वत्थु, वत्थुं पटिच्च खन्धा, एकं महाभूतं पटिच्च तयो महाभूता…पे… द्वे महाभूते पटिच्च चित्तसमुट्ठानं रूपं…पे…. (१)

परित्तं धम्मं पटिच्च महग्गतो धम्मो उप्पज्जति हेतुपच्चया – पटिसन्धिक्खणे वत्थुं पटिच्च महग्गता खन्धा. (२)

परित्तं धम्मं पटिच्च परित्तो च महग्गतो च धम्मा उप्पज्जन्ति हेतुपच्चया – पटिसन्धिक्खणे वत्थुं पटिच्च महग्गता खन्धा, महाभूते पटिच्च कटत्तारूपं. (३)

२. महग्गतं धम्मं पटिच्च महग्गतो धम्मो उप्पज्जति हेतुपच्चया – महग्गतं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे…. (१)

महग्गतं धम्मं पटिच्च परित्तो धम्मो उप्पज्जति हेतुपच्चया – महग्गते खन्धे पटिच्च चित्तसमुट्ठानं रूपं. पटिसन्धिक्खणे महग्गते खन्धे पटिच्च कटत्तारूपं. (२)

महग्गतं धम्मं पटिच्च परित्तो च महग्गतो च धम्मा उप्पज्जन्ति हेतुपच्चया – महग्गतं एकं खन्धं पटिच्च तयो खन्धा चित्तसमुट्ठानञ्च रूपं…पे… पटिसन्धिक्खणे महग्गतं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे…. (३)

३. अप्पमाणं धम्मं पटिच्च अप्पमाणो धम्मो उप्पज्जति हेतुपच्चया – अप्पमाणं एकं खन्धं पटिच्च तयो खन्धा…पे… द्वे खन्धे…पे…. (१)

अप्पमाणं धम्मं पटिच्च परित्तो धम्मो उप्पज्जति हेतुपच्चया – अप्पमाणे खन्धे पटिच्च चित्तसमुट्ठानं रूपं. (२)

अप्पमाणं धम्मं पटिच्च परित्तो च अप्पमाणो च धम्मा उप्पज्जन्ति हेतुपच्चया – अप्पमाणं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

४. परित्तञ्च अप्पमाणञ्च धम्मं पटिच्च परित्तो धम्मो उप्पज्जति हेतुपच्चया – अप्पमाणे खन्धे च महाभूते च पटिच्च चित्तसमुट्ठानं रूपं. (१)

परित्तञ्च महग्गतञ्च धम्मं पटिच्च परित्तो धम्मो उप्पज्जति हेतुपच्चया – महग्गते खन्धे च महाभूते च पटिच्च चित्तसमुट्ठानं रूपं. पटिसन्धिक्खणे…पे…. (१)

परित्तञ्च महग्गतञ्च धम्मं पटिच्च महग्गतो धम्मो उप्पज्जति हेतुपच्चया – पटिसन्धिक्खणे महग्गतं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे…. (२)

परित्तञ्च महग्गतञ्च धम्मं पटिच्च परित्तो च महग्गतो च धम्मा उप्पज्जन्ति हेतुपच्चया – पटिसन्धिक्खणे महग्गतं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे… महग्गते खन्धे च महाभूते च पटिच्च कटत्तारूपं. (३)

आरम्मणपच्चयो

५. परित्तं धम्मं पटिच्च परित्तो धम्मो उप्पज्जति आरम्मणपच्चया – परित्तं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे… वत्थुं पटिच्च खन्धा. (१)

परित्तं धम्मं पटिच्च महग्गतो धम्मो उप्पज्जति आरम्मणपच्चया – पटिसन्धिक्खणे वत्थुं पटिच्च महग्गता खन्धा. (२)

महग्गतं धम्मं पटिच्च महग्गतो धम्मो उप्पज्जति आरम्मणपच्चया – महग्गतं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे…. (१)

अप्पमाणं धम्मं पटिच्च अप्पमाणो धम्मो उप्पज्जति आरम्मणपच्चया – अप्पमाणं एकं खन्धं पटिच्च तयो खन्धा…पे… द्वे खन्धे…पे…. (१)

परित्तञ्च महग्गतञ्च धम्मं पटिच्च महग्गतो धम्मो उप्पज्जति आरम्मणपच्चया – पटिसन्धिक्खणे महग्गतं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे…. (१)

अधिपतिपच्चयो

६. परित्तं धम्मं पटिच्च परित्तो धम्मो उप्पज्जति अधिपतिपच्चया – परित्तं एकं खन्धं पटिच्च तयो खन्धा चित्तसमुट्ठानञ्च रूपं, द्वे खन्धे…पे… एकं महाभूतं पटिच्च तयो महाभूता…पे… महाभूते पटिच्च चित्तसमुट्ठानं रूपं उपादारूपं. (१)

महग्गतं धम्मं पटिच्च महग्गतो धम्मो उप्पज्जति अधिपतिपच्चया – महग्गतं एकं खन्धं पटिच्च तयो खन्धा…पे… द्वे खन्धे…पे…. (१)

महग्गतं धम्मं पटिच्च परित्तो धम्मो उप्पज्जति अधिपतिपच्चया – महग्गते खन्धे पटिच्च चित्तसमुट्ठानं रूपं. (२)

महग्गतं धम्मं पटिच्च परित्तो च महग्गतो च धम्मा उप्पज्जन्ति अधिपतिपच्चया – महग्गतं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

अप्पमाणं धम्मं पटिच्च अप्पमाणो धम्मो उप्पज्जति अधिपतिपच्चया – अप्पमाणं एकं खन्धं पटिच्च तयो खन्धा…पे… द्वे खन्धे…पे…. (१)

अप्पमाणं धम्मं पटिच्च परित्तो धम्मो उप्पज्जति अधिपतिपच्चया – अप्पमाणे खन्धे पटिच्च चित्तसमुट्ठानं रूपं. (२)

अप्पमाणं धम्मं पटिच्च परित्तो च अप्पमाणो च धम्मा उप्पज्जन्ति अधिपतिपच्चया – अप्पमाणं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

७. परित्तञ्च अप्पमाणञ्च धम्मं पटिच्च परित्तो धम्मो उप्पज्जति अधिपतिपच्चया – अप्पमाणे खन्धे च महाभूते च पटिच्च चित्तसमुट्ठानं रूपं. (१)

परित्तञ्च महग्गतञ्च धम्मं पटिच्च परित्तो धम्मो उप्पज्जति अधिपतिपच्चया – महग्गते खन्धे च महाभूते च पटिच्च चित्तसमुट्ठानं रूपं. (१)

अनन्तरपच्चयादि

८. परित्तं धम्मं पटिच्च परित्तो धम्मो उप्पज्जति अनन्तरपच्चया… समनन्तरपच्चया… सहजातपच्चया (सब्बेपि महाभूता कातब्बा)… अञ्ञमञ्ञपच्चया… निस्सयपच्चया… उपनिस्सयपच्चया … पुरेजातपच्चया (तिस्सो पञ्हा कातब्बा)… आसेवनपच्चया (तिस्सो पञ्हा कातब्बा)… कम्मपच्चया… विपाकपच्चया (तेरस पञ्हा)… आहारपच्चया… इन्द्रियपच्चया… झानपच्चया… मग्गपच्चया,… सम्पयुत्तपच्चया… विप्पयुत्तपच्चया… अत्थिपच्चया… नत्थिपच्चया… विगतपच्चया… अविगतपच्चया.

१. पच्चयानुलोमं

२. सङ्ख्यावारो

९. हेतुया तेरस, आरम्मणे पञ्च, अधिपतिया नव, अनन्तरे पञ्च, समनन्तरे पञ्च, सहजाते तेरस, अञ्ञमञ्ञे सत्त, निस्सये तेरस, उपनिस्सये पञ्च, पुरेजाते तीणि, आसेवने तीणि, कम्मे तेरस, विपाके तेरस, आहारे इन्द्रिये झाने मग्गे तेरस, सम्पयुत्ते पञ्च, विप्पयुत्ते तेरस, अत्थिया तेरस, नत्थिया पञ्च, विगते पञ्च, अविगते तेरस.

अनुलोमं.